Bildiyimiz kimi ölkədə 2011/2012 futbol mövsümü başa çatdı. Komandamız bu mövsüm yalnız ikinciliyi əldə edərək gümüş medallara sahib çıxdı. Bu ölkə daxili yarışlarda əldə olunan nəticə olduğundan belə demək mümkündür. İkinciliyin əldə edilməsi isə bildiyimiz kimi həm də Avropa Liqasına vəsiqə qazanmaq deməkdir. Deməli, bu mövsüm hələ bizim üçün davam edəcək. 

            Planlarını Avstriyada hazırlıq keçməklə, Avropa Liqası öncəsi yəqin ki, həm heyət səviyyəli legionerlərlə gücləndiriləcək və həm də yerli futbolçularımız komandaya cəlb ediləcək. Belə ki, İyunun 2-də komanda üzvlərinin saat 11-də Bakıda bir araya gələcəyi planlaşdırılır. Bir neçə gün ardıcıl məşqlərdən sonra isə iyunun 5-də komanda Avstriyaya təlim-məşq toplanışına yola düşəcək. Hər bir azarkeşin bu təlim-məşq toiplanışını maraqla gözləyəcəyini bilirik. Belə ki, azarkeşlərimiz komandanın avropaya necə hazırlaşdığını və bu turnirdə göstərəcəyi nəticəni səbirsizliklə gözləməkdədirlər. Belə olan halda indicə aldığımız bir məlumatı azarkeşlərimizin nəzərinə çatdırmaq istəyirik.

            Növbəti çempionatın qaydalarında nəzərdə tutulmuş bir sıra dəyişikliklər digər klublar kimi "Xəzər Lənkəran”ı da yerli və gənc oyunçulara üstünlük verməyə vadar edib. Bunu həm də vadar edib kimi başa düşmək lazım deyil. Çünki artıq bir neçə gənc futbolçumuz göstərdikləri səylər və bacarıqlarına görə əsas komandada oynamağa layiq olduqlarını demək olar ki, sübut edə biliblər. Belə gənclərimizdən və xüsusən "Xəzər Lənkəran”ın öz yetirmələri olan gənc futbolçularımız da əsas komandaya qoşularaq, Avstriyaya yola düşəcəklər.

İndicə Lənkərandan Bakıya komandaya qoşulmaq üçün yola salınan bu dörd futbolçunun valideynlərindən aldığımız məlumata görə Avstriya təlim-məşq toplantısına U-17 nin üzvü Elnur Cəfərzadə, əvəzedici heyətdən isə Elvin Mirzəyev, Kamran Abdullazadə və Akif Tağıyev də yola düşəcək. Onu da qeyd edək ki, Akif Tağıyevdən başqa, adları çəkilən gənc futbolçular "Xəzər Lənkəran” komandasının yetirmələridir. Həm gənclərimizə və həm də bütün komandaya bu təlim-məşq toplanışında uğurlar arzu edərək, Avropa Liqasında xoş yeniliklərə imza atmalarını istəyirik.