BOSMAN Fanklubu

“Bosman” fanklubunun uzvlərinin və saytımızı izləyənlərin nəzərinə!

BOSSMAN — Thu, 05 Sep 2013 08:48:02 GMT

Əziz və hörmətli saytımızın izləyiciləri, 4 ildən artıqdır ki, "Bosman” fanklubunu təsis etmişik. Bu müddət ərzində "Bosman” fankubu olaraq "Xəzər Lənkəran” olan sevimli komandamızın daim yanında olmuşuq. Komandanın yaxşı və ya çətin günündə ondan üz döndərməmişik. Əksinə daha yaxından dəstək olub, çıxış yolları aramışıq. Bəzən bu yolda klub rəhbərliyi ilə yollarımız kəsişib, bəzən də düz yolda olmadıqlarından, aramızda fərqli baxışlar üzündən incikliklərimiz, mübahisəmiz və hətta qorxu və hədələrlə dolu vəziyyətlə üzləşmişik.

"Bosman” fanklubu təsis edildiyi gündən daim "Xəzər Lənkəran”ın uğurlarında öz əməyini görməkdən qürur duyub və bundan da sonra duyacaq. Bunun üçün fanklubumuz ölkədə yaxşı mənada çox-çox ilklərə imza atıb, böyük layihələr həyata keçirib. Bu layihələri həyata keçirmək və komandamız haqqında məlumat və materiallarla çıxış etmək, daim xaraktercə dəyişməyən və lakin irəliyə, inkişafa meylli olan strategiyamızı azarkeşlərimizə o cümlədən idman ictimaiyyətinə çatdırmaq üçün, bizə bir nəşr orqanı lazım idi. Çox gözəl olaraq bildiyiniz kimi günümüzün ayrılmaz reallığına çevrilən internetin verdiyi imkanlardan yararlanaraq bu orqanı fanklubumuzun 1 illiyindən başlayaraq, "Bosman.at.ua” saytı vasitəsilə həyata keçirdik. Çox çətin keçən bu 3 ildən bir qədər artıq müddətdə "Bosman.at.ua” bizim və sizin ayrılmaz yoldaşınız oldu, bu ötən müddətdə.

Dövrün tələblərini nəzərə alaraq, "Bosman” fanklubu yeni müasir dizaynda və imkanlarda "az” domenini əldə edərək, bundan sonra yeni internet nəşrimiz olan "Bosman.az” ünvanında sizinlə yoluna davam edəcək. Bundan sonra http://bosman.az ünvanında sizinlə görüşməkdən qürur duyacaq, komandamız haqqında xəbər və yazılarla görüşünüzdə olacağıq. "Bosman.az” bütün izləyicilərindən xahiş edirik ki, ilk olaraq "Qaydalar” bölməsi ilə tanış olsunlar. Bütün nəzərdə tutulan bölmələrin fəaliyyəti bir neçə gündən sonra tam gücü ilə işləyəcək olan "Bosman.az” saytına hələlik əvvəlki saytın arxivi köçürülür və bununla əlaqədar olaraq, tam və çevik fəaliyyət bir müddətdən sonra bərpa olunacaq.

Tam və bütün mənalarda müstəqil fəaliyyət göstərən "Bosman”fanklubuna və onun yeni nəşri olan "Bosman.az” saytına Allahdan uğurlu fəaliyyət arzulayırıq və bunun yolu sevgimiz olan, "Xəzər Lənkəran”ın Allahdan uğuruna bağlıdır. Daim komandamız haqqında xoş xəbərlər vermək arzusuyla sizi "Bosman.az” saytında gözləyirik.

"Bosman” fanklubu 05. 09. 2013

Buzlaqda üzən gəmi, Aysberqə doğru

BOSSMAN — Wed, 04 Sep 2013 22:46:17 GMT

Son zamanlar minlərlə insanın sevgisi olan "Xəzər Lənkəran” enişə o qədər sürətlə düşür ki, bir növ onu sevən insanlar öyrəncəli olublar. Deyəsən öyrəncəli olmağın da bir dib nöqtəsi var. Mirça Rednikə tikilən torba o qədər haqsız və həyasızcasına baş verdi ki, indi həmin torbanı tikənlər özləri onun dibinə düşüb çapalamaqdaykən, Redniki torbaya salanlarla mübarizədə olan azarkeşləri də torbanın dibinə doğru çəkirlər. Rednik torbaya düşmədi, ağıllı insan olduğundan daha da yüksəkliyə qalxdı. Onun üçün torba tədarük edənlər isə çoxdan torbanın dibində vurnuxurlar və hətta bu torbanın ağzını kəsdirib Rednikin ora düşməməsi üçün maneə yaradan azarkeşlərin də bir hissəsini dartıb yaratdıqları çıxılmaz totbanın dərinliklərinə yuvarlatmaqdadırlar.

Son böyük oyundan daha da vüsət alan bu yuvarlanma hələ də davam edir. Eşidilən xəbərlərdə qarşıdakı oyunda bu bir çoxlarını da torbanın dibinə çəkmək planları var. Bu, ya bilərəkdəndir ya da bilməyərəkdən. Nəticədə "Xəzər Lənkəran” boyda gəmi, artıq bu torbaya doğru yön alıb və səsləndirilən bəzi şeylər baş versə, onda o böyüklükdə gəmi balıq tora düşən kimi bu torbanın dərinliyinə elə yuvarlanacaq ki, oradan çıxıb xilas olması çox müşkülə çevriləcək.

Yaxın kəndlərdən bir nəfər şəhərdə eşidir ki, şəhərin bir qism adamları dükanlardan yumurta alır və növbəti oyunda cənab Toşakı yumurta atəşinə tutacaqlar. Oyunda da olmasa istirahətdən qayıtdıqdan sonra. O, da fikirləşmədən həyətindəki toyuq hininə girir və toyuqların neçə dənə yumurtladığını sayır. Görür ki, kifayət qədər yumurta var. Onları yığıb saxlayır. Birdən narahat olur. Axı stadionda meydana oyun zamanı nə atırsan at, onu yad əşya kimi sayırlar. Bir dostunun PFL-də tanışları olduğunu yada salıb, məsələni dəqiqləşdirməyi planlayır. Dostu PFL-ə zəng edir və məsələdən xəbərdar edir. Öyrənmək istəyir ki, yumurta da yad əşya sayılacaq? PFL-dəki dostu deyir əlbəttə ki. Bu cavabı eşidən yumurta yığan kəndçi tez trubkanı alıb and aman eləməyə başlayır ki, vallah yad əşya deyil, ümumiyyətlə yad deyil. Öz hinimizdən yığmışam, özü də öz toyuqlarımız yumurtlayıb. Bunun harası yad oldu? Bəyəm mən də digərləri kimi yumurtanı dükanlardan almamışam ki, heç yumurtlayan toyuğu da tanımayım. Əgər elə olsa idi, mənim də topladığım yumurtalara yad yumurta və ya atılarkən, yad əşya demək olardı. Vallah, billah öz toyuqlarımızın yumurtasıdır! Onda PFL-dən telefonla danışan deyir ki, elə isə bəs sən atarsan. Amma kim ki, dükanlardan tanımadığı toyuğun yumurtasını alıb, biz onu yad əşya sayacağıq. Elə isə sən narahat olma at! Bunu eşidən yaxın kənddən olan kəs, o biri dostuna da sevinərək deyir ki, eşitdin? Sən də get yumurtaları yığmağa. Amma fikir ver öz toyuqlarınızın olsun, diqqətli ol! Beləliklə yumurtaatanlar arasında da ayrıseçkilik salınır.

Nə isə soruşanda ki, bala yumurtanı kimə atacaqsan? Deyir görmürsən o qocanı? Toşakı deyirəm də. Gör neçə oyundur qələbə qazana bilmir. Cəmi üç heç-heçədən elə üç xalımız var, onunla da axırıncı yeri bölüşürük. Buna dözmək olar? Onda sual verirsən ki, bunun yolu təkcə yumrta atmaqdı? Cavab verir ki, bəs nə edək? Özü uduzur amma istefa vermir. "İstefa” qışqırırıq, yenə getmir. Məcbur qalmışıq. Hər konfransda da deyir ki, olanlara çox üzülürəm, nəticələrə əlbəttə baş məşqçi kimi mən cavabdehəm. Əllərimi yuxarı qaldırıram və deyirəm, nəticələrə görə mən cavabdehəm. Daha bunları deyincə elə çıxıb getsin də… Bir də gör nə deyir? Heç vaxt deməyəcəklər ki, Toşak "Real”la kubok alıb, nə bilim kiminlə çempion olub. Sonuncu nəticələri yada salacaqlar. "Makkabi”yə 0:8 və sair və ilaxır.

Deyəndə ki, ay qardaş, bilirsən Toşak kimdir? Deyir ki, əşşi day qocalıb. Nə olsun ki, "Real”da, "Sent Etyendə”, nə bilim "Beşiktaş”da kubok alıb, çempion olub. Heç məşq də keçmir. Ya istirahət verir komandaya, ya da 40-45 dəqiqə məşq keçir vəssalam. Belə komanda hazırlamaq olar?

Bax indi də mən deyim sən qulaq as, yaxşı? Toşak dünya görmüş adamdı. Nəticələrini də özün sadaladın. Belə adamlar heç vaxt işi kal tutmurlar. O yəqin ki müqaviləyə imza atanda hər şeyi ətraflı düşünüb. Məsələn, sən maşın ustasısan. Gör neçə ildir ki, bu işlə məşğulsan. Kimin də maşınının motoru xarab olur, hamı deyir ki, gəlsin sənin yanına. Hələ elə bir maşın olmayıb ki, sən onu düzəldə bilməyəsən elədir?-Bəli, elədir! Deməli, sənin də öz sahəndə Toşak kimi uğurların bəs qədərdir. Belə bir misal gətirim, sən də cavab ver. Toşakı başa düşmək üçün bir az avropasayağı diplomat olmalısan. Səni gərək loru dildə başa salım. Deyəcəyim missal belədir. Kəndin o başında yaşayan Həsən kişinin maşını nədir? -"Rand Rover”! Ay, Allah səni saxlasın! İşdi şayəd onun maşınının motoru "töksə”, onu yığa bilərsən? –Əlbəttə canın da alaram. Birinci dəfədir bəyəm? Gör neçə "Rand Rover” motoru yığmışam. Hələ başqa "inomarka”ları demirəm. Yaxşı, necə oldu onları yığa bildin? –Heç… gəldilər dalımca, mən də getdim maşına baxdım. Sonra siyahı tutdum. Dedim ki, bu "orginal zapçast”ları alın mən də motoru saat kimi yığım verim sizə. Sağ olsunlar, onlar da dediyim "zapçast”ların hamısının "orginal”ını gətirdilər, mən də yığıb verdim, indidə sürürlər. Saat kimi də işləyir.-Ay sağ ol, bu başqa məsələ.

İndi təsəvvür elə ki, Həsən kişinin "Rand Rover”inin motoru "töküb”. Həsən kişi də səni çağırıb həyətinə deyir ki bunu düzəldə bilərsən? Sən də baxdın maşına və dedin ki, bu, bu "zapçast”ları gətizdir, 15 günə maşını saat kimi verim sənə. Siyahını verdin, özün də oturub gözləyəcəksən də, elə deyil? Toşak da gözləyir də…

Həsən kişi də sən verdiyin siyahıyla əvvəlcə razı olur, sən də gözləyirsən. Hərdən bir 40-45 dəqiqə maşınla maraqlanacaqsan, sonra da həyətdə gəzəcəksən, elə deyil? –Bəli, yəqin ki, elədir dostum. Mənim işim dediyim "zapçast”lar gələndən sonra başlayır da…

-10 gün sonra Həsən kişi birdən gəlib dedi ki, ay usta sənin dediyin "zapçast”lar bir az çox götürüre… Gəl sən get "ölüxana”ya (Bakıda yararsız vəziyyətə düşmüş maşınlardan çıxarılan ehtiyyat hissələrinin satıldığı bazar), ordan bu "zapçast”lardan bax hansını taparsan, tapmadığını da "peredelka” edərsən bir təhər. Onda sən ona nə deyərsən? Deməzsən ki, biz söz danışmışıq. "Ölüxana” "zapçast”larından, özü də "peredelka” ilə yığılan motor ya işləməz, ya da bir az səs-küylü işləyib, səni yarıyolda qoyar! Deməzlər ki, bunu kim yığıb? Məni biabır etmək istəyirsən? Ondan sonra kim mənə iş gördürər? Biabırçılıq olar! Mənə həm mənəvi zərbə olar, həm də maddi. Çünki ondan sonra mənə iş verən olmaz. Toşak da təcrübəli birisidir. O, hara gəldiyini də yaxşı bilir. Bəlkə də şərtlər daxilində alacağı pulun, şərtləri yerinə yetmədiyi halda, olacaq mənəvi zərbəyə görə, ikiqatını, beşqatını almaqla müqaviləyə qol çəkib?

Əslində Toşak 3-4 oyunda nəyə qadir olduğunu elə bu oyunçularla da göstərib. Amma bu oyunçularla ondan tələb olunan hədəflərə çatmağın mümkün olmadığını o, yaxşı bilir. Ona görə də təqdim etdiyi və razılaşdırdığı siyahıdakı bahalı futbolçuları gətirməmiş, qollarını çırmalamayacaq, elə istirahət verib komandaya, özü də gəzəcək. Bax buna görə ona yumurta atmağa və başqa hörmətsizlik etməyə haqqımız çatırmı? Onda gərək Həsən kişi də onun maşınını düzəltmədiyin üçün, girib hindəki yumurtaları sənə atsın. Belədə Həsən kişi düzmü edər? Onda sən də "kapot”u çıxardıb keçirərsən onun başına. Sonra da dava-dalaş, iş düşər məhkəməyə. İndi də sən bu yumurtaları haqsız yerə Toşaka atsan, vay bizim camiənin və "Xəzər Lənkəran”ın halına. Dunyada biabir olarıq. Onda AFFA yox ha… UEFA da, FİFA da bizi yer üzündən silər. Dünya futbol ictimaiyyəti bizim camiəyə vəhşi adı verər…

Belədə dostum usta yumurtaları tez-tələsik evə verdi və qayğanaq hazırlamalarını tapşırdı.

P.S. Toşakla bağlı müraciətə könülsüz imza qoymaq, çoxdan bəri gəzən bu yumurta biabırçılığından onu və camiəni qurtarmaq fikri idi. Axı hamını bizim bu maşın ustası kimi başa salmaq olmur. İnşallah camiəmizdə bu və bu kimi fikirdə olanlar, camiəmizin biabır olmaması üçün heç bir artıq hərəkətə yol verməz.

P.P.S Məsələnin xırdalıqlarına qədər ona görə getdim ki, çünki fanatlar arasında çoxlu gənc və belə şeyləri çılğınlıq kimi qavrayanlar var. Ümidvaram ki, bunların heç biri baş verməyəcək.

P.P.P.S Bəlkə də Toşakın klubla problemi heç də burda yazılanlar kimi deyil, daha asan həll olunandır. Hər halda buna ümid etmək istərdim.

Mirhafiz Babayev

Edu Oriol və Deyvid Sakkoni ”Xəzər Lənkəran”da!

BOSSMAN — Wed, 28 Aug 2013 09:42:56 GMT

Kamerunlu Mbilla Etamenin transferindən sonra, "Xəzər Lənkəran" Futbol Klubu daha iki futbolçunun transferini rəsmiləşdirdi. Bunlardan biri İspan futbolçu Eduard Oriol Qarsiya, digəri isə Deyvid Sacconidir.

26 yaşlı yarımmüdafiəçi Edu karyerasına Kataloniya klubu olan "Pobla Mafumet"də başlayıb. Ardından Oriol bu bölgənin digər komandası "Sant Andreu"da bir mövsüm ərzində çıxış edib. Həmin mövsümü olduqca uğurlu keçirən futbolçu "Barselona"nın diqqətini cəlb edib. 2009-2011-ci illərdə "Barselona B"də oynayan Edu bu komandanın "Sequnda"ya vəsiqə qazanmasında əsas rol oynayanlardan biri olub. Bir neçə dəfə "Barselona"nın əsas komandasının heyətinə də cəlb olunan oyunçu, ümumilikdə İspaniyanın ikinci divizionu olan "Sequnda"da 60 çempionat oyununda 9 dəfə fərqlənib.

2011-ci ildə isə sol cinah yarımmüdafiəçisi olan Oriol "La Liqa"da çıxış edən "Real Saraqosa"nın heyətinə keçib. Araqon klubunun tərkibində bütün turnirlərdə 45 oyun keçirən futbolçu bu gündən etibarən "Xəzər Lənkəran"ın uğurları üçün çalışacaq.

Edu Oriolla "Xəzər Lənkəran" arasında iki illik müddətinə müqavilə imzalanıb.

Digər yeni transferimiz olan Deyvid Braziliyalı hücumameyilli yarımmüdafiəçidir. Deyvid Frank Silva Sakkoni bu gün komandamızın sıralarına qoşuldu.

26 yaşlı futbolçu Braziliyanın A və B seriyalarında oynayan müxtəlif komandların heyətində çıxış edib. 3 il "Palmeiras"ın uğurları üçün çalışan Deyvid, sonradan "Qoias", "Qremio", "Nautiko" və son iş yeri olan "Branqantino" klubunun da formasını geyinib.

Klubla Deyvid Sakkoni arasında bir illik müqavilə imzalanıb.

Qeyd edək ki, bir müddət adları komandamızla birgə çəkilən hər iki futbolçunun rəsmi transferi haqqında klubun rəsmi saytı informasiya yayıb.

Etibar Cəbrayıloğlu: Tahirin üzündə həya gərəkdi...

BOSSMAN — Tue, 27 Aug 2013 14:19:19 GMT

Və ya Pelenin məşqçisi, Qaqarinin müəllimi kimdi?

Mayın 28-də futbol azarkeşlərinin bayramını qara gətirənlərdən biri Tahir Süleymanovun səsi yenə eşidilməyə başlayıb. İdman tarixində ən böyük şərəfsizlikdən birinə imza atan klubun- "Neftçi”nin vitse-prezidenti ötən bu aylar ərzində üzr istəməyə cəsarəti çatmasa da indi danışmaqdadı. Daha bir "Böyük oyun” bu adamın iç üzünü növbəti dəfə ortaya qoydu.

Ötən bazar Lənkəranda baş verənlər futbol adına ləkədi. Növbəti "Böyük oyun”dan sonra yaşananlar nə "Cənub mirvarisi”nin, nə də onun futbolun qeyrətini çəkən vicdanlı və namuslu azarkeşlərinin adına yaraşdı. Amma bu hadisədən yararlanıb ortada kəndirbazlıq edən Tahir Süleymanova xatırlatmaq istəyirəm ki, təqvimdə 25 avqust 28 maydan sonra gəlir.

Avqustun 25-dən əvvəl gələn mayın 28-də ölkənin ən böyük stadionunda dünyanın ən böyük rəzilliyi yaşandı. Kubokun finalı bitər-bitməz Neft Şirkətinin gül balası "Neftçi” şərəfsizliyin finalına başladı. "Neftçi”nin neft çəninə oxşayan rəsmi şəxsi gülüm oğlan Güloğlan Cabbarov "Xəzər Lənkəran”ın iki oyunçusunu- Kamran Abdullazadə ilə Rodomir Todorovu qanına qəltan etdi, "Neftçi”nin neft buruğuna oxşayan oyunçusu Mahir Şükürov yığmadakı oyundaşı Elnur Allahverdiyevə şıllaq atdı. Həmin vaxt yəqin ki, stadionun qadın azarkeşləri üçün nəzərdə tutulan ayaqyolusunda gizlənən vitse-prezident Tahir Süleymanov bu gün ortaya çıxaraq palaz-palaz müsahibələr verir, milli-əxlaqi dəyərlərdən danışır. Amma hansı haqla?

Adam ən populyar idman nəşrimiz sayılan "Futbol+” qəzetinə müsahibə verərək deyir ki, xarici futbollara baxanda stadionda 50-60-70 min tamaşaçı görür, amma oralarda Lənkərandakı kimi hadisələr yaşanmır. Belə oyunları yalnız xalqın adını, Neft Şirkətinin isə pulunu xərcləyən "Neftçi”nin vitse-prezidenti izləmir. Milyonlarla futbol azarkeşi kimi elə mən də baxıram. Lakin hələ bircə dəfə də görməmişəm ki, klub rəsmisi hamının gözü qarşısında qonaq komandanın oyunçularını şillə-təpiyə qonaq etsin, futbolçu rəqibinə oyundan sonra şıllaq atsın.

Yalanın sərhədlərini çoxdan keçən Tahir Süleymanov deyir ki, onun da maaş aldığı klub həmişə ev sahibi kimi üzərinə düşən öhdəlikləri yerinə yetirir. Bu adam unudur ki, mayın 28-də baş verənlərə görə Respublika Prokurorluğunda cinayət işi açılıb.

Tahir Süleymanov guya Lənkəranda xəsarət alan əsgərlərin halına acıyaraq az qala gözyaşı tökür, amma unudur ki, timsahın göz yaşlarına indi heç kim inanmır. Mayın 28-də gülüm oğlan Güloğlan Cabbarovun vəhşicəsinə, erməni dəsti-xətti ilə döydüyü Kamran Abdullazadə də bir neçə aydan sonra əsgər paltarı geyinərək Vətəni qoruyacaq. İgid əsgərlərimizin sayəsində evində xorultu ilə rahat yatan Tahir Süleymanov Kamran Abdullazadənin valideynlərinin üzünə necə baxa biləcək?

Əli Neft Şirkətinin cibindən çıxan xalq komandasının vitse-prezidenti yeri gəldi-gəlmədi klubun prezidentini tərifləyir. Çox vaxt da aşırı dərəcədə yaltaqlanır, necə deyərlər. barıtını bir qədər çox edir. Sadıq Sadıqovu az qala "Futbol kralı” Pelenin məşqçisi, göyə ilk uçan Qaqarinin müəllimi sayır. Bu adamdan soruşmaq lazımdı ki, tez-tez rəqib klubların mətbəxinə niyə boylanırsan? Əgər sənin də maaş aldığın klubda hər şey belə yerindədisə, bəs niyə ötən bazar Lənkərandakı böyük oyunda klubunuzun futbolçuları hər dəqiqə hamilə qadınlar kimi yerə uzanıb niyə zarıyırdı? Əgər xalq bütün işini gücünü buraxıb yalnız "Neftçi”yə dua etməklə məşğuldursa, bəs niyə xalq komandasını böyük oyunda cəmi 50 azarkeş dəstəkləyirdi? Lap tutaq ki, azarkeşləriniz mayın 28-də baş verən vəhşilikdən sonra Lənkəran camaatının üzünə çıxmaqdan utanırdı, bəs Bakının mərkəzində keçirdiyiniz oyunlarda niyə tərəfdarlarınızın sayı heç min nəfəri keçmir?

O qədər də sadəlövh deyiləm. Bilirəm ki, bu adam suallara cavab verməmək üçün dağı arana, aranı dağa qatacaq. Köhnə adətidi, təki başa çəkməyə tuman olsun.

Nakam şairimiz Mikayıl Müşfiq deyirdi ki, adamın üzünə hayə gərəkdir. Tahir Süleymanov da adam olduğu üçün yəqin bu sözün ona da aidiyyəti var...

Gündüz=Gecə və ya Aydın səhər!

BOSSMAN — Thu, 22 Aug 2013 12:40:53 GMT

Nəhayət, bu mövsümdə keçiriləcək ilk Böyük oyun gəlib yaxınlaşır. Bu ilk qarşılaşma avqustun 25-də Lənkəranda keçiriləcək. Böyük oyun adı, "Xəzər Lənkəran”ın bərpasından və milli çempionatda çıxışlarına başladıqdan sonra, mətbuat tərəfindən, konkret desək, ölkənin bir nömrəli idman nəşri olan "Futbol+” qəzeti tərəfindən bu oyuna verilib. Bu da təsadüfi deyildi. Papasının gül balası "Neftçi”nin önündəkiləri min bir hoqqayla əzişdirdiyi vaxt, bərpasının ilk ilindəcə qarşısında "Xəzər Lənkəran”ı görməsi oldu. Böyük oyunları çox seyr etmişik. Üzüldüyümüz də olub, üzüntülərimizi parlaq qələbələrimizə sevinərək, unutduğumuz da… Qısası həmişə dogma "Xəzər Lənkəran”ımızın yanında olmuşuq.

Biz bu dəfəki Böyük oyunda da sevimli komandamızın yanında olacağıq. Amma qarşı tərəf çaşqınlıq içindədir, yəni "Neftçi” klubu. "Neftçi” klubunun sözünü deyən, onun İctimaiyyətlə Əlaqələr Departamentinin rəhbəri Gündüz Abbaszadə "İdmanxeber.com” saytına əndrəbadi açıqlama verməsindən də görünür ki, "Neftçi” klubu çaşqınlıq içərisindədir. Təbii ki, Gündüz Abbaszadə öz sözünü demir. Bu barədə klubun rəsmi mövqeyini ortaya qoyur. Nə deyir, Gündüz Abbaszadə? Bunun üçün futbol ictimaiyyətinin acı xatirəsinə çevrilmiş bir qədər əvvələ səyahət etmək lazımdır. Yəni, son Böyük oyunda, qısası ölkə kubokunun finalında yaşananlar bu açıqlamaya səbəb olmuşdur. 28 may İstiqlal Bayramı günündə ölkə kubokunun finalında "Neftçi” klubunun rəsmilərinin oyun bitdikdən sonra, bir daha qeyd edirik, matç bitdikdən sonra komandamızın iki futbolçusunu, hörmət bəslədiyimiz legioner Radomir Todorovu və komandamızın gənc üzvü olan Kamran Abdullazadəni, futbol qurumlarının, klub rəsmilərinin, mətbuatın və iyirmi minə yaxın azarkeşlərin gözü qarşısında vəhşicəsinə döydü. Hətta Kamran Abdullazadənin qanını axıtdılar. Sonradan bu vəhşiliyi əks etdirən kadrlar internet vasitəsi ilə bütün dünyaya yayıldı. Etdiyi vəhşiliklərə görə klub rəsmən üzr istəmədi. Yalnız bir iki nəfər öz adından üzrxahlıq etsə də bu üzrxahlıq cinayət tərkibi olan hadisələrin təsirini soyutmadı. Əslində indi də gec deyil, RƏSMİ ÜZR İSTƏMƏK. Amma rəsmi üzr istəmək əvəzinə, görün klub öz sözçüsünə necə açıqlama verməyi tapşırıb. "İdmanxeber.com” saytına "Neftçi”nin sözçüsünün verdiyi açıqlamanı təqdim edirik: "Biz ümumiyyətlə ötən mövsümün sonlarından heç bir səfər matçına azarkeş aparmırıq. Yalnız gedənlər azad azarkeş qrupları olur. Buna görə də, bu dəfə də Lənkəran səfərinə heç bir azarkeş aparmayacağıq".

Bu sözləri İdmanxeber.com saytına açıqlamasında "Neftçi” klubunun İctimaiyyətlə Əlaqələr Departamentinin rəhbəri Gündüz Abbaszadə deyib.

Klub rəsmisi bildirib ki, Lənkərana özləri gedəcək azarkeşlərə isə cavabdehlik daşımayacaqlarını bildirib:

"Biz "Neftçi" klubu olaraq hər zaman azarkeşlərimizin yanındayıq. Ora gedən fanat hər şeyi göz önünə almalıdı. Biz heç kimi səfər matçlarına aparmırıq. Ora gedəcək azarkeşlər də məsuliyyətini daşımalıdı. Biz insident istəmirik. Bundan öncə də azarkeşlərimizi yanında olmuşuq. İndi də, belıə olacaq. Sadəcə yenədeyirəm, biz səfər oyununa azarkeş aparmırıq və ora gedəcək hər bir azarkeş öz məsuliyyətini daşımalıdı". (http://idmanxeber.com/xeber/408/ )

Heç nə olmayıbmış kimi sadəcə guya ötən mövsümün sonlarından heç bir səfər oyununa azarkeş aparmadıqlarını deyən klub rəsmisi, sonradan bu dəfə Lənkərana səfər edən azarkeş olacaqsa, buna görə məsuliyyət daşımadıqlarını dilə gətirir. Əslində bununla da klubun həmişə azarkeşlərinin yanında olması fikrinə rəsmən tüpürür. Daha sonra klub rəsmisi "ora gedən fanat hər şeyi göz önünə almalıdır”-deyir. "Biz incident istəmirik”. "…və ora gedəcək hər bir azarkeş öz məsuliyyətini daşımalıdı”. Azarkeşinin dalında durmamaqla ona tüpürən klub, həm də bununla 28 mayda törətdikləri vəhşiliyin miqyasını dərk etdiyini ortaya qoyur. Amma yenə üzr istəməyə ərinir. Qarşıda azarkeşinə böyük təhlükə olduğunu dilə gətirərək, üzr istəmədən və bir də azarkeşini insan yox, bir predmet kimi qiymətləndirən kluba daha nə deyəsən?!

"Bosman” fanklubu həmişə əmin-amanlığa, insanpərvərliyə çağırış etməklə kifayətlənməyib. Bunu əməli olaraq da yarandığı gündən həyata keçirib. Çox böyük nailiyyətlər əldə edib. Elə 28 maydakı haqqında danışdığımız oyunda da "Neftçi” fanatları ilə təmas quraraq azarkeşlər arasında tam sakitliyə nail olmuşduq. Yaşananlar azarkeşlər arasında yox, "Neftçi” klubu səviyyəsində baş vermişdi. Biz də azarkeşik və bunun nə demək olduğunu yaxşı bilirik. "Neftçi” klubu göründüyü kimi azarkeşinə tüpürərək, hörmət qoymursa, biz də bu səviyyəyə enməyərək, həm bu oyunda komandamızı tək qoymamaqla, Fırtınalar Meydanını doldurmalıyıq, həm də klubu tərəfindən hörmət qoyulmayan "Neftçi” fanatına lazım gəlsə, yanımızda yer verməliyik. Lap yuxarı başda yer verməliyik ki, öz qonaqpərvər Lənkəranımızın adı və hörməti xatirinə. Bir də yada salırıq ki, 28 mayda yaşananlar azarkeşlər səviyyəsində olmayıb.

"Neftçi” rəhbərliyinə isə yerini göstərmək üçün də aqressivlik lazım deyil. Onlar Radomir Todorovu və Kamran Abdullazadəni döyüb qanına bulaşdırmaqla etdiklərinin qorxusunu yaşayırlarsa biz, bütün azarkeşlər matç boyu bir dəqiqə dayanmadan, iki şüar səsləndirməliyik: "Xəzər Lənkəran”! və "Kamran, Radomir”! Bu şüarları səsləndirməklə onlara bu oyunçularımızı təkləyib döyürlərsə, bu futbolçuların dalında azı on beş min nəfərin olduğunu xatırladacağıq. Biz onları döyməyəcəyik. Futbolçularımızı həvəsləndirməklə, onları elə motivasiya edəcək, elə gözəl oyuna sövq edəcəyik ki, "Neftçi”nin qapısına vuracaqları bir neçə qolla onları nəinki, döyəcək, lap əzişdirəcəyik! İnanın ki, bu belə olacaq.

Bir daha yada salırıq, şüarlarımız belə olacaq:

"Xəzər Lənkəran”! və "Kamran, Radomir”!

"Bosman” fanklubu

Mübariz Mənsimovdan fantastik təklif

BOSSMAN — Thu, 15 Aug 2013 03:42:11 GMT

(Mətni həm də oxumadan, yazının sonundakı kiçik audiopleyer vasitəsi ilə dinləyə bilərsiniz. Bunun üçün audiopleyerin "Play" düyməsinə basın!)

Avroliqanın II təsnifat mərhələsində
«Makkabi»yə (İsrail) biabırçı hesabla məğlub olan «Xəzər Lənkəran»da baş
verənlərlə bağlı virtualaz.org-da məlumat vermişdik. Həmin yazıda vurğulamışdıq
ki, Lənkəran klubunun 0:8 hesablı məğlubiyyəti klubda gedən pərdəarxası
oyunların təzahürüdür.

Sonradan bu versiya
klub rəhbərliyi tərəfindən də təsdiqləndi və komandada müəyyən «təmizləmə»
əməliyyatı aparıldı. Ancaq bu «təmizləmə» «Xəzər Lənkəran»ın oyununa elə də
ciddi təsir göstərmədi. Artıq çempionatda iki tur arxada qalıb, «ağ-yaşıllar»
isə hələ də qələbə qazana bilməyib. Təbii ki, belə nəticə 10 illik yubileyində
çempionluğu hədəfləyən bir komanda üçün qənaətbəxş sayıla bilməz.

«Xəzər Lənkəran»ın
sahibi və fəxri prezidenti Mübariz Mənsimov bununla bağlı ciddi addımlar atmağı
düşünür. Əldə etdiyimiz məlumata görə, Mənsimov «Xəzər Lənkəran»ı yenidən rumın
çalışdırıcı Mirça Rednikə həvalə etmək istəyir. Mirca Rednik Lənkəranda olduqca
populyar şəxsdir. Cənub klubu onun rəhbərliyi altında Azərbaycan kubokunu
qazanmış, çempionatda isə 2-ci yeri tutmuşdu. Amma rəhbərlikdə təmsil olunan
bir neçə şəxs bəzi futbolçularla əlbir olaraq Rednikin komandadan qovulmasına
nail olmuşdular.

«Xəzər Lənkəran»ın
çöküşü elə həmin vaxtdan başlayıb və artıq kritik həddə çatıb.

Vəziyyətin çıxılmaz
olduğunu görən Mübariz Mənsimov yenidən M.Redniklə əlaqə qurub. Əldə etdiyimiz
məlumata görə, rumın məşqçini Lənkərana gəlməyə razı salmaq o qədər də asan
olmayıb. Rednikin Rumıniyanın adlı-sanlı klublarından olan CFR-lə müqaviləsi
olduğundan məşqçi əvvəlcə Lənkərana gəlməyə razılıq verməyib. Amma Mübariz
Mənsimovun ona fantastik təklifi hər şeyi dəyişib.

Virtualaz.org-un əldə
etdiyi məlumata görə, Rednikə illik 700 min dollarlıq müqavilə təklif olunub.
«Xəzər Lənkəran» bu mövsüm çempion olacağı təqdirdə isə çalışdırıcı 300 min
dollar da mükafat alacaq. Üstəlik Mənsimov Rednikə 5 bahalı transfer də söz
verib. Transferlərdən 2-si indi, 3-ü isə qışda həyata keçiriləcək.

Məhz belə fantastik
təklifdən sonra Mirça Rednik fikrini dəyişib və artıq CFR-lə müqaviləsini
qarşılıqlı razılıq əsasında pozub. Bizdə olan məlumata görə, Rednik buna görə
kluba kompensasiya da ödəyib. Bununla belə, Rednikin Lənkərana gəlişi hələ bir
müddət yubanacaq. Çünki «Xəzər Lənkəran»ın dünya şöhrətli məşqçi Con Toşakla
müqaviləsi var. Toşakı göndərmək üçün ona kompensasiya ödəmək lazımdır.
Virtualaz.org-un əldə etdiyi məlumata görə, Toşak müqavilədə tələb olunan
məbləğin tam şəkildə ödənilməsini tələb edir.

Rəhbərlik isə bununla
razılaşmır. Bu yöndə danışıqlar davam edir. Ola bilsin ki, Azərbaycan
çempionatının 3-cü turunda keçiriləcək «Qarabağ»-«Xəzər Lənkəran»
qarşılaşmasından sonra Toşak komandadan ayrılsın və Rednikin ikinci cənub
səfəri başlasın.

Mənbə:
Virtualaz.org

Etibar Cəbrayıloğlu: Təkliflərin biri məndən...

BOSSMAN — Wed, 14 Aug 2013 10:54:28 GMT

Redniki qovmaq üçün qaraçılıq salanlar "Xəzər Lənkəran”ı qara günə qoydular. Klubun düşdüyü miskin durumu izah etmək üçün söz tapmaq çətindi, çox çətin. Milyonlar xərcləyib dizini döyən rəhbərlik problemdən çıxış yolunu tapa bilmir, ingilis Toşak da müdrikcəsinə susmaqda davam edir. Çarə yenə bizə- azarkeşlərə qalıb. "Xəzər Lənkəran”ın çılğın fanatı dostum Səyavuş Moskvadan təngi nəfəs gəlib Azərbaycana. Özü də Putindən də bir neçə gün öncə. Amma indi geriyə qayıtmaq istəyir. Deyir ki, daha məndə səbir qalmadı.

Dostumu anlayır və seçiminə hörmət edirəm. Lakin bildiyim başqa bir şey də var. Hamımız çəkilib kənara dursaq, bəs "Ağ-yaşıl” gəmini kim xilas edəcək? Türkiyədəki təzyiqlər üzündən Moskvaya köçən, sığındığı kommunistlərin də ağ günə çıxara bilmədiyi böyük Nazim Hikmətin şedevri bu gün çox aktualdı:

Sən yanmasan,

mən yanmasam,

biz yanmasaq,

necə çıxar qaranlıqlar

aydınlığa...

Klub idarəçiliyini tənqid etmək asandı. Lakin biz azarkeşlər çıxış yolları da göstərməliyik. "Xəzər Lənkəran”ın minlərlə azarkeşindən biri kimi, mən bir neçə təklif hazırlamışam. Müsahidə etsəniz onu sizlərin diqqətinə çatdıraram.

Təkliflərimdən biri baş məşqçi məsələsi ilə bağlıdı. Klubun 10 illik tarixi sübut etdi ki, nə təcrübəli məşqçilər, nə də dəlləkliyi klubun başında məşq edənlər "Xəzər Lənkəran”ın dərdinə dərman ola bilmədilər. Pasulko, Kara, Mircavadov, Rednik, Toşak kimi təcrübəli isimlər bu işə çarə tapmadılar. Biçər, Bakes kimi məşqçilikdə piyadalar bizi çölün düzündə piyada qoydular. Belə görünür ki, "Xəzər Lənkəran”a baş məşqçi lazım deyil.

Məhz bu üzdən təklif edirəm ki, klubda futbolu yaxşı bilən azarkeşlərdən ibarət İctimai Şura yaradılsın. Böyük Bazardan, Kiçik Bazardan, Qaladan, Qalayçılardan, Çayqırağından, "Şındırovlar məhəlləsindən”, Baramadan, Su-8-dən, Birinci və İkinci mikrorayonlardan, Sütəmurdovdan, Kənarmeşədən, Şovudan, Bəlləburdan, İstisudan, Girdənidən, Havzavadan, Nərimanabaddan hərəsi iki nəfər olmaqla İctimai Şuraya namizədlər verilsin. "Xəzər Lənkəran”ı qarşıdakı oyunlara həmin İctimai Şuranın üzvləri hazırlasınlar. Şura üzvləri transfer məsələlərinə nəzarəti də öz üzərinə götürsün.

İctimai Şura hər iki aydan bir Dəhnədə azarkeşlərlə görüş keçirib öz fəaliyyəti barədə geniş hesabat versin.

Tam əminəm ki, bunun bir faydası olacaq, könül verdiyimiz "Xəzər Lənkəran” tezliklə düşdüyü böhrandan çıxa biləcək. Bəlkə də bəziləri bu təklifin zarafat olduğunu deyib onu ciddiyə almayacaq. Birincisi, bu zarafat-filan deyil. İkincisi də zarafat olanda nə olar ki? Klub yönəticiləri düz 10 ildi biz azarkeşlərlə mırt vura bilir, biz bu 10 ildə bircə dəfə zarafat edə bilmirik...

Etibar Cəbrayıloğlu: Ağsu aşırımındakı “Xəzər Lənkəran”

BOSSMAN — Mon, 12 Aug 2013 07:11:13 GMT

(Mətni həm də oxumadan, yazının sonundakı kiçik audiopleyer vasitəsi ilə dinləyə bilərsiniz. Bunun üçün audiopleyerin "Play" düyməsinə basın!)

"Xəzər Lənkəran” üçün
nələr etmədik. Hansı fədakarlıqlardan keçmədik. "Ağ-yaşıl” gəmi hər dəfə qəzaya
düşdükcə neçə yol ölüb-dirildik. Hər mövsümün əvvəlində nə xəyallar qurmadıq.
Sonda bizə qalan elə xəyallar oldu.

"Neftçi” ilə oyun
öncəsi məşqə getmək lazımdı, getdik. "Bakı” ilə oyunda dəstək olmaq vacibdi,
olduq. "İnter”lə görüşdə kluba ruh vermək lazımdı, verdik. "Qarabağ”la vacib
görüşdə dəstək olmaq lazımdı olduq. Sonu da belə.

İndi də yollarda
qalmışam. Səhər Neftçaladayam, günorta Ağsu aşırımında, axşam isə Şəmkirdə.
Yəqin soruşacaqsınız ki, sənin Neftçalaya getməyinin, Ağsu aşırımını aşmağının,
Şəmkirdə gecələməyinin "Xəzər Lənkəran”a nə aidiyyəti var? "Xəzər Lənkəran”
klubu həmin şəhərlərin komandaları ilə ki, oynamır.

Düzdü, tam
haqlısınız. "Ağ-yaşıl” birinci divizionda oynamır. Amma belə getsə, oynayacaq.
Klubdakı işlər Allah göstərməmiş belə davam etsə, "Xəzər Lənkəran” öz
meydanında "Neftçala”nı qəbul edəcək. "Şuşa” ilə oynamaq üçün Quzanlıya,
"Energetik”lə derbi üçün Mingəçevirə gedəcək.

Topaz
premyer-liqasının birinci turunda "Sumqayıt”la, ikinci turtunda isə "Simurq”la
oyunlarına baxandan sonra işimi möhkəm tutmağa başlamışam. Sərgilədiyi oyunla
"Ağ-yaşıl” gəmi onsuz da birinci diviziona tərəf üzəcək. Mən də indidən gedib
gələcək rəqiblərimizin şəraiti ilə yaxından tanış oluram, stadionların durumuna
göz gəzdirirəm. Necə deyərlər, ehtiyat igidin yaraşığıdı.

"Xəzər Lənkəran”
premyer-liqaya qədəm qoyan gündən Azərbaycan futboluna rəng qatdı, nüfuzunu
qaldırdı, ölkə futbolunu abıra mindirdi. Heç kimə sirr deyil ki, birinci
divizionun vəziyyəti acınacaqlıdı. "Xəzər Lənkəran” aşağı divizionun çəkisini,
hörmətini qaldıra bilər. "Xəzər Lənkəran”a könül verən sadiq azarkeşləri, bir
anlığa təsəvvür edin ki, "Ağsu” ilə derbi oyununa baxmaq üçün səfərə
çıxmısınız, Ağsu aşırımının gözəlliklərini göz önünə gətirin... Bu iş reallaşsa
illərdi aşağı divizionda yarışan komandalar necə inkişaf edəcək. "Şuşa”nın,
"Şəmkir”in, "Qaradağ-Lökbatan”ın gənc məşqçiləri dünya səviyyəli məşqçi Con
Toşakdan nə qədər öyrənəcəklər.

"Xəzər Lənkəran”ın
sadiq azarkeşi kimi kluba bu işdə nə kömək lazımdısa edə bilərəm. Heç vaxt
bundan imtina etməmişəm, etmərəm də. İlin-günün bu vaxtında bayaq dediyimi
kimi, yollardayam. "Həm ziyarət, həm ticarət” prinsipinə əməl edib səfərlərim
zamanı klub üçün yeni və bacarıqlı oyunçular axtarıram.

İnsan gərək hər
yaşında öyrənə. Mən də transfer işini yavaş-yavaş öyrənməyə çalışıram. Aşağı
divizionunda top qovan bəzi futbolçuları gözaltı etmişəm. Onların bir neçəsi bu
gün müqavilə bağlamağa razılaşsa "Xəzər Lənkəran” rəqiblərinə güclü zərbə
vurmuş olacaq. Götürək elə "Energetik”in 34 yaşlı gənc hücumçusunu. Çox məhsuldar
oyunçudu, yaxşı qol duyumu var. Aşağı dəstədə yuxarı məhsuldarlıq göstərib.
Dəqiq məlumatlara görə, aşağı divizionda keçirdiyi 164 oyunda 4 qol vura bilib.
"Şuşa”nın müdafiə xəttindəki bir oyunçu da diqqətimdədi. Çox etibarlı, səliqəli
oynayır. Təsadüfi deyil ki, hər iki oyundan bir qırmızı vərəqə alır. Hər oyunda
yox a, hər iki oyundan bir.

Daha bir neçə
səviyyəli, "Xəzər Lənkəran”ın gücünə güc qatan oyunçuları gözaltı etmişəm. Amma
hələ tam açıqlamaq istəmirəm. Hər şeyin vaxtı var. İmkan verək klubun avtobusu
Ağsu aşırımını keçsin, sonra baxarıq...

“Bosman.at.ua” saytının izləyicilərinin nəzərinə (YENİLİK)

BOSSMAN — Tue, 30 Jul 2013 08:43:38 GMT

"Bosman.at.ua” saytı izləyicilərimizə daha bir texnoloji
yenilik təqdim edir. Bu texnoloji yenilik, ondan ibarətdir ki, saytımızda təqdim
olunan hər hansı bir xəbər, və yaxyd da yazı, və məqalələri, mətni oxumadan da
dinləmək imkanı yaradır. Bunun üçün mətnin sonunda kiçik bir "pleyer”
yerləşdirmişik. Həmin "pleyerin” "Play” düyməsinə tıkladıqda, artıq siz mətni
oxumadan dinləyə biləcəksiniz.

Bəzən oxucular yorğun olduqlarından və ya görmədən əziyyət
çəkdiklərindən bu onların işinə olduqca yarayacaq. Mətndə bəzən durğu
işarələrindən yersiz istifadə olunduğunu düşünməyin. Bu mətn səsləndirilərkən,
səsin intonasiyasının "texnoloji insan” tərəfindən düzgün deyilməsi, və bununla da düzgün
anlaşmanı təmin etməkdir. Həmçinin Facebook şəbəkəsində də, paylaşacağımız
xəbərlər tıklandıqda "bosman.at.ua” saytındakı mənbəyə yönələcək, və həmin
mətnin altındakı, kiçik "pleyerlə” dinlənilməsi mümkün olacaq. Arzu edirik ki,
bundan sonrakı dönəmdə, komandamız olan "Xəzər Lənkəran” daim sevindirici
nəticələr əldə etsin, və biz də bu xəbərləri həm yazı şəklində, həm də dinləmə
modunda, sizlərə çatdıraq.

Bosman.at.ua saytının redaksiyası 30 .07. 2013

Etibar Cəbrayıloğlu: Şərəfi “kitayski” çıxanlar və savaba görə cəhənnəm çəkənlər

BOSSMAN — Sat, 27 Jul 2013 12:36:19 GMT

"Xəzər Lənkəran”a
könül verən dəyərli dostlardan biri zəng eləmişdi. "Kontur” sıxıntısı olmasa
da, ətraflı girişə ehtiyac görmədi. Söhbəti qısa elədi, dedi ki, qardaş, İsrail
komandası iki oyuna qapımıza 10 top vurdu. Klubumuzun 10 illik yubileyinə 10
qol hədiyyə etdilər. Nə yaxşı ki, "Xəzər Lənkəran”ın 20 yaşı yox imiş...

Təbii ki, dostum
zarafat eləmirdi. Baş verən rəzillikdən necə tüstüləndiyi telefondakı səsindən
də bəlli idi. Hayfa "Makkabi”sindən aldığımız utancverici məğlubiyyətə 50-60
dostum şahidlik etsə idi nə vardı ki... Heç bu yazını yazmağa da ehtiyac
qalmazdı. Nə yazıq ki, təkcə klub deyil, Lənkəran və Azərbaycan adına bu
rəzaləti bütün dünya gördü.

Nə Mübariz Mənsimovun
yaratdığı "Xəzər Lənkəran”, nə Lənkəran, nə də Azərbaycan bu biabırçı hadisəyə
layiq deyildi. İki oyunda qapımızı aşsüzənə döndərməyə "Makkabi”nin tək gücü
çatmazdı. İsrailli futbolçularla qələbəni xonçada bağışlayanlar oldu. Şərəfi
"kitayski” çıxanlar bizə bu rüsvayçı məğlubiyyəti yaşatdılar.

Klubda işlərin "ni
to” getdiyini görməyən, duymayan yox idi. Həyatda ən acı şey insanın
qorxduğunun başına gəlməsidi. Hayfalı futbolçularla cavab görüşündən öncə klub
rəsmilərindən biri ilə telefon danışığımızda oyunda bəzi futbolçuların "oyun
oynayacağından” şübhələrimi dilə gətirmişdim. Təəssüf, çox təəssüf ki,
proqnozum özünü doğrultdu. Sevinmirəm. Allah kəssin belə düz çıxan proqnozu.

Lənkəranın adına,
Mübariz Mənsimovun nüfuzuna, "Xəzər Lənkəran”ın 10 illik tarixinə qara ləkə
vurulub. Bunu yalnız qapımızdan qol keçirənlər etməyib. Bu gün adı əsas
heyətdən uzaqlaşdırılan futbolçular da rəzalətin tək günahkarları deyillər.
Mirzə İbrahimovun "Böyük dayaq” əsərində yazıldığı kimi, onlardan da təhlükəli
ilanlar daş altında yatır.

Könül verdiyimiz
"Xəzər Lənkəran”ın faciəli durumu göz qabağındadı. Bu acınacaqlı vəziyyətə görə
klubda çalışan hər bir kəs məsuliyyət daşıyır. Heç kim orda-burda gizlənməyə
cəhd göstərməsin. İnsanlardan qaçmağa, gizlənməyə nə var ki. Amma Allahdan
qaçmaq hələ heç bir bəndəyə nəsib olmayıb. Yarımcan "Turan”ı, "Gəncə”ni,
onlardan geri qalmayan Malta "Slima”sını güc-bəla ilə udanda telekanallardan,
qəzet və saytlardan gözümüzü yağır edən klub rəsmiləri niyə indi görünmürlər?
Çıxıb niyə azarkeşlərdən üzr istəmirlər? Mən bildiyim qədər ilə Mübariz
Mənsimov yalnız mətbuat xidmətinin rəhbərinə maaş vermir. Klubda ancaq rəhbər
vəzifə tutan bir "KAMAZ” adam var. Niyə indi biri də gözə dəymir? Onların da
şərəfinin "kitayski” çıxdığına inanmaq istəmirəm.

İnandığım bir şey
var. Klub azarkeşlərinin bu məsələdə heç bir günahı yoxdu. Buna yüzdə yüz
əminəm. Həmin faciəli və qara gündə heç bir "Xəzər Lənkəran” azarkeşi "Maral,
Maral, Maral” kimi düşük mahnını kefindən oxumayıb. Heç bir lənkəranlı
gülümoğlan Güloğlanın yumruğuna güvənən, Mahiri mahircəsinə şıllaq atan
"Neftçi”nin adını sevincindən qışqırmayıb. Bunları əsəbdən, ürək yanğısı və
sizə nifrətdən ediblər. Klub rəhbərliyi anlamır ki, azarkeşlərin onlara borcu
yoxdu. Klubun onlara borcu var. Təbii ki, söhbət mənəvi borcdan gedir. Maddi
yox, mənəvi borcdan. Bilmirəm, anlada bildimmi?

Gözəl şairimiz, dəyərli ziyalımız Musa Yaqubun çox
sevdiyim misrası var

Bəlkə də yeganə müsəlmanam mən,

Cəhənnəm çəkirəm savaba görə.

Dostum Musa Yaqub tək
deyil. "Xəzər Lənkəran”ın savaba- "ağ-yaşıllara” köül verdiyinə görə cəhənnəm
çəkən on minlərlə azarkeşi var.

Ola bilsin ki, yaxın
20-25 gündə klub rəsmilərindən kimsə mətbuatda peyda olmağa özündə güc tapsın
və "Biz baş məşqçinin işinə qarışmırıq” kimi köhnə bayatı oxusun.

Ola bilsin... Amma
beləsi varsa bilməlidi ki, Con Toşak kimi dünyaca məşhur məşqçinin işinə
qarışmağa onun səviyyəsi yetməz. İkincisi də, baş məşqçinin işinə qarışmamaq
hər hansı bir klub rəsmisini məsuliyyətdən azad etmir. Yenə söhbət maddi yox,
mənəvi məsuliyyətdən gedir. Bilmirəm, anlada bildimmi?

Yazıya nöqtə qoyanda
daha bir dostum zəng etdi. Soruşdu ki, Con Toşakın sehrli çubuğu nə oldu?
"Konturum” az olduğundan dostuma qısa cavab verdim:

- Toşakın sehrli
çubuğunun üstünə Rednikin pişikləri zad edib...