Bildiyimiz kimi final mərhələsinin ikinci dövrəsi XXVIII turla start götürdü. Final mərhələsinin ilk dövrəsində qələbə qazana bilməyərək xeyli xal itkisinə yol verən komandamız ikinci dövrəyə sanki "AZAL”la oyunda tilsimə düşmüşdü və bu tilsimi XXVIII turda elə "AZAL” üzərində qələbə qazanmaqla qırmaq istəyirdi. Düzü ilk final dövrəsində qələbə qazana bilməməyimizin səbəbi tək komandamızla və ya bəxt amili ilə əlaqədar deyildi bizcə. Bu uğursuzluqda hakimlərin də "payı” az olmamışdı. Hətta Emeka Oparanın qaygalar çərçivəsində vurduğu qol sayılmayınca komandamızın, oyunu heç-heçə ilə "bitirmiş” olması və daha iki xal "itirməsinə səbəb” olmuşdu. Hamı müəyyən reallıqları çoxdan bilir deyə bunun üzərində çox dayanmırıq. Çünki həm biz və həm də mətbuat bu barədə çoxlu sayda çıxış edib.

            XXVIII turda bu "uğursuz”  seriyaya son qoymaq üçün meydana çıxan doğma komandamız bütünlüklə bunun öhdəsindən gəlmiş oldu. Öz gücünə, öz komanda oyunu hesabına, öz məşqçilərinin düzgün taktiki sxeminə, rəqibi düzgün analiz edib, onu düzgün qiymətləndirməsi hesabına, öz azarkeşlərinin lazımi dəstəyi hesabına və sair. Bir də həmişə hakimlikdən şikayətlənməyimizi bəziləri tez-tez deyir ki, onlar da hakim səhv və ya qərəzlərini görmək istəməyənlərdir. Halbuki, bunu nəinki biz demək olar bütün mətbuat düzgün qiymətləndirməyi bacarır. Digəl ki, nəticə çıxarmalı olan qurumlar və şəxslər bütün bu tənqidlərdən utanmırlar. Bunu bu tur qələbə qazandığımız üçün söyləmirik. Oyunu şərh edən "Futbol+” qəzetinin həm hakimlik və həm də müəyyən məqamları çox diqqətli və düzgün işıqlandırdığına və fikirlərimizlə üst-üstə düşdüyünə görə adı çəkilən qəzetin dili ilə deyirik. Beləliklə, adı çəkilən qəzetin XXVIII turdan sonrakı çıxan sayında bəzi məqamları diqqətinizə çatdırırıq.

            Əvvəlcə, "Hakimlərin mühakiməsi" bölməsində aşağıdakı fikirlər yer alır:-”Güclü yağış altında və sürüşkən qazonda Vüsal Əliyevin ifasında əsl Avropa hakimliyi izlədik. Referi matç boyu çox sərt mübarizələrə belə fit çalmayıb, oyuna əlavə rəng qatdı. Məhz onun sayəsində matçın sürəti heç azalmadı ki, bu fonda bəzi kiçik qüsurlar kölgədə qaldı. Təcrübəli laysmanlar işlərinin öhdəsindən layiqincə gəlsə də, konkret iki epizodda - Kiyaku və Parks əlverişli vəziyyətdə olarkən – onlar hərəyə bir dəfə şübhəli ofsayd bayrağı qaldırdı ki, bunu da yalnız videotəkrarla dəqiq söyləmək olar.” Bununla da hesab edirik ki, hakimlərin işi düzgün qiymətləndirilmişdir. Bir məsələ də var ki, Vüsal Əliyev seçilən hakimlərimizdəndir. Bu oyunda "Xəzər Lənkəran”ın qələbəsi heç kimə mane olmadığından oyunun hakimliyi normal olaraq həyata keçirildi. Kim bilir əgər qələbəmiz kimə isə mane olsa idi onda oyunda bəlkə də başqa hakim və başqa hakimlik olardı. 

            Daha sonra "Reaksiyalar” bölməsi ilə sizi tanış edirik və burada da çox maraqlı fikirlərin qəzet tərəfindən qaçırılmamasını alqışlayırıq.

            Nazim Süleymanov: "Hesab özü elə hər şeyi deyir. "Xəzər Lənkəran”ı gözəl oyuna görə təbrik edirəm. Lənkəranda futbol oynamamaq günahdı. Gözəl qazon, gözəl azarkeş. Bu futboldu və səhvlər həlledici olur. Biz bu gün səhv etmədik, kobud səhvlər buraxdıq. İlk dəfədi belə hesabla uduzuruq. Bir çox yetirməmin oyunundan razı qalmadım. Matçı təhlil edib, bir daha belə səhvlərə yol verməməyə çalışacağıq. Yenə də rəqib baş məşqçini təbrik edirəm.”

            Mirça Rednik: "İlk növbədə azarkeşlərimizdən danışım. Final mərhələsində hələ də qələbə qazana bilməsək də, onlar bizi nə məşqlərdə, nə də oyunda tək qoymur, dəstək olur. Onlar həmişə yanımızdadı. Buna görə bütün azarkeşlərimizə təşəkkür edirəm. AZAL-ı 3-0 hesabıyla yenmək asan deyil. Bundan öncə də demişdim ki, AZAL ən təşkilatlanmış komandadı. Üstəlik,  final mərhələsində yeganə məğlubiyyətimizi də onlardan almışıq. Hər dəfə yetirmələrimə deyirdim ki, biz rəqiblərimizdən yaxşı oynayırıq və sadəcə, bəxtsizlik var. Belə davam etsək, qələbənin mütləq gələcəyinə onları inandırmışdım. Bu qələbə bizə çox lazım idi. Nazim Süleymanov hörmət etdiyim yerli mütəxəssisdi. Ona da uğurlar arzulayıram.”

            Simao Bruno: "Bu gün çox gözəl oynadıq. Qələbə bizə çox lazım idi. Biz, demək olar, əvvəlki oyunlarda da güclü oynamışdıq. Sadəcə, bəxt yanımızda deyildi. Bu gün isə hamımız əl-ələ verib bəxti də ayağımıza gətirdik. "İnter”lə oyunda mənim səhvimdən qol buraxdıq. Heç məşqə çıxmağa ürək etmirdim. Amma azarkeşlərimiz məşqdə "biz sizin arxanızdayıq, sizə inanırıq” banneri açıb hamımıza, o cümlədən də mənə daha çox dəstək oldular. Həmin gün çox duyğulanmışdım. Portuqaliyada olan dostlarıma, yaxınlarıma deyirəm ki, bizim azarkeşlər "Liverpul” azarkeşləri kimi sədaqətli və güclüdü. Hələ cüzi də olsa çempionluq şansımız qalır. Bu gün göstərdik ki, hələ yıxılmamışıq və ayaqdayıq.”