"Xəzər
Lənkəran”ın yanvarın 10-da, Antalyanın Bələk bölgəsində başlayan təlim-məşq
toplanışı yekunlaşmaq üzrədi. Düşərgədə 10-a yaxın futbolçunu sınayan cənubluların
dünən keçirdiyi məşqlərində maraqlı hadisələr də yaşandı. Öncə vurğulayaq ki,
baxışa gələn üç qapıçıdan ikisi artıq geri göndərilib. Bunlar Rumıniyadan gəlmiş
qolkiperlər – Marinesku və Dan Zdrinkadı. Birinci dünən "Metallurq”un 87-ci dəqiqədə
vurduğu cərimə zərbəsi zamanı topa gec reaksiya verməklə məşqçilər korpusunun
etimadını qazanmadısa, Zdrinka artıq iki gündü vətəninə yola salınıb (Burada,
daha əvvəl hətta komanda ilə ilkin müqavilə bağlamış olan Rumın qolkiper Kosmin
Vatçanın geri göndərilməsini də yada salaq. Mötərizədəki əlavə saytımıza məxsusdur).
Hazırda komanda ilə məşqlərə qoşulan ucaboy Alan Daltonu isə artıq "Xəzər Lənkəran”lı
saymaq olar. Belə ki, reportajı hazırlayarkən braziliyalı qapıçı ilə ilkin
müqavilə bağlanılmalıydı. Axşam məşqlərində Dalton Alan Murito ilə ayaqüstü
söhbətləşdik:- "Məşqlər çox gözəl keçir.
Gözəl komandaya gəldiyimə görə sevinirəm. Hamı məni mehriban qarşıladı. Elə şərait
də yüksək səviyyədədi. Bu onu göstərir ki, komanda çempion olmaq üçün çalışır.
Burda öyrəndim ki, "Xəzər Lənkəran”ın qarşıda çox çətin oyunları var. Hələ mənimlə
müqavilə bağlanmayıb. Bu, baş verərsə, çox sevinəcəm. 24 yaşında legioner həyatı
yaşamaq çox gözəl olar. Dərhal valideynlərimi arayıb, bu xoş xəbəri verməyi səbirsizliklə
gözləyirəm. Vətənimdə "A” seriyasında daim əsas qapıçı olmasam da, bir neçə
oyunda Braziliyanın tanınmış və lider klublarına qarşı oyunda "Fiqeyrense”nin
qapısını qorumuşam. "Xəzər Lənkəran”ın əsas qapıçısının millinizin də "bir nömrə”si
olduğunu mənə Dieqo Qusmao söylədi. Deməli, güclü qapıçıdı. Mən başımı aşağı salıb
məşqçinin tapşırıqlarını həyata keçirəcəm. Kimin qapıda duracağına da son anda
onlar qərar verir. Bu arada qapıçılarla çalışan məşqçi Hafiz Əliyevə minnətdarlığımı
bildirirəm. Burada qalıb-qalmamağımdan asılı olmayaraq, gəldiyim gündən onun üzərimdə
əziyyəti böyükdü”.
Düşərgəni
tərk edən növbəti futbolçu isə hücumçudu. Parksla birgə Rumıniya
"Timişoara”sında top qovmuş sloveniyalı Rusiç də dünən günorta saatlarında bəyənilmədiyindən
geri göndərilib. Açıq-aşkar səviyyəli forvard yoxluğu yaşayan "Xəzər Lənkəran”
artıq əməli işə girişib. Menecerlər vasitəsi ilə məhz hazır və güclü hücumçu
arayışına çıxan cənublular yaxın günlərdə bu transferin həyata keçirilməsini
istəyir. Klub prezidenti Mais Mənsimovun Türkiyəyə gəlib komandanı ziyarət etməsi
cənubluların düşərgəsində əlavə məsuliyyət yaradıb desək, yanılmarıq. Baş məşqçi
Mirça Rednikə səviyyəli və bahalı transfer etməsi üçün heç bir problem olmadığı
və ona dəstək verilməsi çalışdırıcını da hərəkətə gətirib. Dünən gecə telefonla
müntəzəm danışan Rednikin çoxdandı adı "Xəzər Lənkəran”la yanaşı hallanan və
hazırda Rumıniya "Styaua”sının da istədiyi Vobey Juliusu düşərgəyə çağırması
üçün danışıqlar apardığını öyrənə bildim. Səviyyəli futbolçu artıq dünən axşam
cənubluların qaldığı otelə gəlməliydi. Vobey xavbek olmaqla yanaşı, hücumda da
oynamaq bacarığı ilə seçilir. Yeganə mənfi cəhəti isə güclü texnikası hesabına
fərdi oyuna üstünlük verməsidi. "Metallurq”la oyunda çıxış edən və düşərgəyə
yeni gələn növbəti rumıniyalı Kosmin Frasineskunun da yoxlama matçında
soyuqqanlı davranışı onun transferinin baş tutmaq ehtimalını artırır.
"Bıstritsa Qloriya” klubuna məxsus müdafiəçinin icarəyə götürülməsi
planlaşdırılır.
Məşqlərə
gəlincə, səhər məşqini yalnız fiziki hərəkətlərlə məhdudlaşdıran məşqçilər
korpusu axşam məşqində kombinasiyalar və taktiki gedişlərə üstünlük verdi.
Yetirmələrinin məşqin əvvəlində tapşırdığı kimi oynamadığını görən Rednik bir
neçə dəfə əsəbi şəkildə onların səhvsiz oynamasını tələb etdi. Belədə məşqin
sonu Rednikin istəyinə uyğun keçdi ki, futbolçuların sürətli və dəqiq oynaması
çalışdırıcının da üzünü güldürdü. Futbolçularına üzünü tutan Mirça:- "artıq
dünya futbolunda Pele, Maradona dövrü bitib. Komanda bir nəfərdən asılı
olmamalıdı. Topu ayaqda çox saxlamaq əvəzinə dərhal komanda yoldaşına ötürmək
lazımdı. Baxın, "Barselona” necə oynayır?” deməklə diqqət çəkdi. Bu gün isə "Xəzər
Lənkəran” son yoxlama matçına çıxacaq. Rəqib Ukrayna təmsilçisi Odessa
"Çernomorets”i olacaq.
Hüseyn Cəbrayıloğlu. Antalya. ("Futbol+” qəzeti 28
yanvar 2011)
|