Nəhayət komandamız, Avropa Liqası II təsnifat mərhələsində İsrailin Təl-Əviv təmsilçisi "Makkabi" klubu ilə qarşılaşma öncəsi heyətinə cəlb etdiyi yeni transferlərini təqdim edib. Beləliklə, "Xəzər Lənkəran"ın rəsmi saytının futbol ictimaiyyətinə təqdim etdiyi bütün yeni transferləri biz də sizlərə təqdim edirik.
Oliveira Eder Bonfim. 30 yaşlı Braziliyalı futbolçu əsasən sağ cinah müdafiəçisi mövqeyində oynayır. Karyerasının son üç mövsümünü Rumıniyada oynayan Ederin son iş yeri "Styaua” (Buxarest) komandası olub. Bundan əlavə o, bir çox Portuqaliya klubunda çıxış edib ki, onların arasında "Benfika” və "Braqa” da olub. Bonfim ötən mövsüm Avropa Liqasında "Liverpul”un qapısından qol keçirməklə də yadda qalıb. Komandamızla oyunçu arasında 1 illik müqavilə imzalanıb.
______________________________________________________ 
Rikardo Vilana Qomeş. Həmyerlisi Bonfimlə birlikdə ötən mövsüm "Styaua”nın şərəfini qoruyub. Mərkəz yarımmüdafiəçisi mövqeyində çıxış edir. Bu klubun heyətində ötən mövsüm Avropa Liqasında çıxış etməklə yanaşı, daha əvvəl digər rumın klubu "Unireya” ilə Rumıniya çempionu olub və UEFA Çempionlar Liqasında oynayıb. Rikardo Qomeş klubla 2 illik müqavilə bağlayıb.
_____________________________________________________ 
Marius Onofraş. 30 yaşlı Rumıniyalı futbolçu cinah yarımmüdafiəçisi və hücumçu rollarında çıxış edir. Yuxarıda sadalanan iki oyunçu kimi, o da ötən mövsümü "Styaua”nın heyətində keçirib. Bundan əlavə, Onofraş müxtəlif Rumıniya klublarında forma geyinib, "Xəzər Lənkəran” isə onun vətənindən kənarda oynadığı ilk klubdu. "Unireya”nın heyətində 2009/2010 mövsümündə Çempionlar Liqasında oynamış Marius "Qlazqo Reyncers”ə vurduğu qolla da yadda qalıb. Futbolçu ilə komanda arasına 1 illik müqavilə imzalanıb.
______________________________________________________ 
Joao Pinto Ribeiro Paulo. 31 yaşlı Portuqaliyalı mərkəz hücumçusu karyerasına "Boavişta” klubunda başlayıb. Müxtəlif Portuqaliya klublarının heyətində çıxış etmiş Pinto, həmçinin Rumıniyanın "Rapid" Buxarest, son mövsümdə isə Kiprin "Olimpiakos" Nikosiya klubunun şərəfini qoruyub. Forvard Kipr klubunun heyətində 16 qol vurmağı bacarıb. Klub Pinto ilə 2 illik müqavilə bağlayıb.
_____________________________________________________ 
Çaba Borbeli. Macarıstan əsilli Rumın vətəndaşı olan 31 yaşlı hücumçu müxtəlif Rumıniya klublarının heyətində 200-dən artıq oyun keçirib. Son mövsümdə isə ölkəsinin çempionu olan "Oteselul Qalati"nin şərəfini qoruyub. Futbolçu ilə klub arasında 1 illik müqavilə imzalanıb.
______________________________________________________ 
Veldin Muharremoviç. Komandaya son qoşulan Bosniya və Herseqovinalı müdafiəçi karyerası ərzində, həm ölkəsinin "Sarayevo” və həm də Belçikanın "Lokeren” komandalarında çıxış edib. Bir neçə dəfə yığma komandaya da çağırılan Muharremoviçin 27 yaşı var. Müdafiəçi komandamızla 1 illik müqaviləyə imza atıb.
| 
