Hörmətli oxucular, bildiyiniz kimi "Xəzər Lənkəran” azarkeşləri tək Azərbaycanda yox, demək olar dünyanın hər yerində var və onlar daima öz sevimli komandalarını dəstəklədikləri kimi onun uğuruna xidmət edən müxtəlif çıxışları ilə də seçilirlər. Elə "Bosman” fanklubunun da ABŞ-da, Yaponiyada, Rusiyada, Ukraynada və dünyanın bir çox ölkələrində üzvləri vardır.

İndi sizə yazısını təqdim edəcəyimiz Rusiya Federasiyasında yaşayan bir azərbaycanlı ziyalını tanıtmaq istərdik. Namiq Əzimov fanklub üzvümüz olmasa da "Xəzər Lənkəran” azarkeşidir. Yalnız "Facebook” sosial şəbəkəsindən tanıdığımız bu ziyalı insan adıçəkilən səhifədə dəyərli yazıları ilə dəfələrlə çıxış edib. "Facebook” səhifəsindəki məlumatlara ğörə Namiq bəy, ixtisasca hüquqşünasdır və RF Ədliyyə Nazirliyi tərkibində "İnter-advokat” Moskva vəkillər qurumunun sədri işləmişdir. Hal hazırda Moskva şəhərində yaşayan Namiq bəy, son günlər komandamız ətrafında yaranan söz-söhbətlərə də öz ziyalı münasibətini bildirib. Kiril əlifbası ilə yazılmış bu müraciəti "Facebook” səhifəsindən götürərək, latın əlifbası ilə sizlərə təqdim edirik.

Hörmətli "Xəzər”sevərlər, komandamızın son turlarda göstərdiyi nəticələr bizim hamımızı məyus edir. Amma biz hamımız inanmalıyıq ki, bu müvəqqəti durğunluq deməkdir. Elə yaxın turlarda komandamız yenə də öz oyununu tapacaq və əsl azarkeşlərini sevindirəcək. Biz heç zaman komandadan üz döndərməməliyik.

Son zamanlar komandanın məşqçisi Redniki "Xəzər”dən uzaqlaşdırmaq istəyənlər fəallaşmışlar. Mən inanıram ki, komandanın baş məşqçisini dəstəkləyənlərin sayı, azarkeşlər arasında qat-qat çoxdur və inanıram ki, bu insanlar axıra kimi öz sevimli məşqçilərinin yanında olacaqlar. Amma bütün bunlara baxmayaraq, klubda son qərarı komandanın rəhbərləri qəbul edirlər. Hər halda belə bir vəziyyətdə onların da müdrik bir addım atacaqlarına inanıram. Bir də Redniki dəstəkləyən azarkeşlərə bildirmək istəyirəm ki, məşqçini sevməyən azarkeşləri təhqir etməklə baş məşqçiyə sədaqətimizi bildirmək, heç də düzgün olmaz. Ona görə hamınızı opponentlərinizə hörmətlə yanaşmağa çağırıram. Hər bir azarkeşin öz fikri var. Əyər istəyiriksə bizim fikrimizə hörmətlə yanaşılsın, biz də başqalarının fikrinə hörmət etməliyik.

Bütün "Xəzər”sevərləri "İnter”lə oyunda komandamıza dəstək olmağa çağırıram. Yalnız və yalnız qələbə, komanda və baş məşqçi ətrafında gedən söhbətlərə son qoya bilər!!!