Hər bir komandanın başına gələ biləcək biabırçılıq bu dəfə XII turda "Xəzər Lənkəran”dan yan keçmədi. Komandamız səfərdə əzəli rəqibi "Neftçi”yə 5:0 hesabı ilə məğlub oldu. Bir müddət əvvəl dünyanın ən güclülərindən biri olan Madridin "Real” klubu öz meydanında dünyanın daha başqa bir güclülərindən olan əzəli rəqibi "Barselona”ya 2:6 və 5:0 hesabı ilə məğlub olmuşdu. Bu bizi kimi hər yerdə böyük biabırçılıq sayılsa da heç də dünyanın sonu demək deyil. Belə durumlardan sonra komanda bütövlükdə toplanmalı, əsl səbəblər araşdırılmalı və ciddi qərarlar qəbul olunmalıdır. Məhz vəziyyətdən ən düzgün çıxış yolunun bu olduğunu deyə bilərik. Məsələni bundan sonra faciəyə çevirmək də lazım deyil. Onsuz da müəyyən maraqlı qüvvələr bundan maksimum istifadə etməyə çalışacaq və hətta deyərdik ki, bu vəziyyətin əmələ gəlməsində onların rolu az olmayıb. Zatən baş vermiş faciədən çıxış yollarını düşünüb həyata keçirmək lazımdır. Bu fiaskonu yalnız düzgün qərarlarla aradan qaldırıb tez bir zamanda toparlanmaq və əvvəlki kimi yenə də yolumuza davam etməmiz lazımdır. əks halda bu uzun sürə bilər və komandanı uçuruma apara bilər. Təbii ki, maraqlı qüvvələrin də boş oturmayacaığını nəzərə alsaq. 

Dediyimiz kimi vəziyyətdən çıxış yolu ən düzgün qərarların verilməsidir. Düzgün qərarların verilməsi isə yalnız tam və düzgün araşdırmaların nəticəsində olmalıdır. Əvvəla onu deməliyik ki, əslində belə hal baş verməmişdən gərək bunun profilaktikası aparılmalı idi. Müəyyən səbəblərdən profilaktika gecikmiş sayılırsa, xəstəliyin daha da dərinləşməsinin qarşısı alınmalıdır ki, bunun üçün də bəzi məsələləri olduğu kimi qiymətləndirmək və göstərmək lazımdır.

Dünənki məğlubiyyətin kiçik və böyük səbəblərinin olduğunu düşünürük. Su basmış meydan amili əlbəttə komandanın oyununa təsirsiz ötüşmədi deyə bilərik. Amma bu heç də məsələnin əsl səbəbi deyil. Çünki rəqib də eyni meydanda mübarizə aparırdı. Nərd oyununda ardıcıl mars qalan oyunçu zərin verməməsindən şikayətlənəndə, qalib tərəf mən də həmin zərlə atıram deyir və əlbətdə burda həqiqətən zərin günahkar olmaması düzgün sayılmalıdır. 

Başqa səbəblərə gəldikdə komandalara psixoloji təzyiqin olmasını deyə bilərik. Bu baxımdan "Xəzər Lənkəran” daha çox əziyyət çəkirdi. Həm oyundan qabaq komandaya Kamran Ağayev faktoru ilə əlaqədar güclü psixoloji təzyiqin olmasını deyə bilərik. Həm də oyun zamanı da bunun şahidi olduq. Birincisi, bütöv komanda belə bir məsul oyunda qapı xəttindən narahat şəkildə matça çıxmışdı. İkincisi, biz zamanlar "Xəzər Lənkəran”da əsas heyət üzvü olan Rəşad Abdullayevin nə peşəkar futbolçuya və nə də insana yaraşmayan nadürüst hərəkətini qeyd edə bilərik. Belə ki, sağ cinah müdafiəçisi qismində komandamızın heyətində çıxış edən gənc Şəhriyar Xəlilovun heç bir qayda pozuntusuna yol vermədən Rəşad Abdullayevə mane olması və əvəzində səbəbsiz olaraq Rəşadın onu açıq-aydın şillə ilə vurması və hakimin də bunu ya görməməsi və ya bağışlaması, hansı normalara sığır? Birmənalı şəkildə qırmızı vərəqəyə layiq olan bu hərəkəti iki metrlikdə olan laysman və ya IV hakim də görmədimi? Bütün milyonların stadiondan və televiziya ekranından açıq-aşkar gördüyü bu tərbiyəsizliyi və qoçuluğu hakimlər görmədimi? Televiziyanın təkrar-təkrar göstərdiyi, şərhçinin dəfələrlə qeyd etdiyi və birmənalı qırmızı vərəqə kimi qiymətləndirdiyi bu tərbiyəsizliyi görmək üçün hakimlərə mikroskopmu lazım idi? Fikir verdinizsə, bu cəzasız qalan tərbiyəsizlik və ədalətsizlikdən sonra gənc Şəhriyarın oyununda nə qədər düşkünlük oldu. Həmçinin xüsusilə "Neftçi” ilə oyunlarda müxtəlif səviyyələrdə təzyiqlərə məruz qalan "Xəzər Lənkəran”ın bütün futbolçularında "yenə başladı” deyə müəyyən psixoloji gərginliyin yaranmasının şahidi olduq. Həmin ana qədər üstünlüyə yiyələnən bütün komanda oyununda sönüklük başladı. Məhz qollar da bundan sonra vuruldu. Özü də həmin mövqedən, ruhdan düşmüş Şəhriyar və qudurmuş Rəşadın mövqeyindən verilən ötürmələrlə. Bu doğurdan da kompleks düşünülmüş bir ssenari idi. "Xəzər Lənkəran”ın futbolçularına qarşı rəqibin dəfələrlə açıq ayaqla girmələri. Bu kobudluq yox, vəhşilik adlandırıla bilər. Misal üçün futbolda çox az rast gəlinən Vobayın ayağının daraq sümüklərinin açıq sınığı. Bu vəhşilik deyilmi? Hakimin isə qeyrətsizcəsinə susqunluğu. 

Bir az da əvvələ getsək bütün səbəblər sanki aydınlaşır. Keçən mövsüm komandamıza, azarkeşlərimizə bütün vasitələrlə təzyiq olunduğunu və çempionluğunun əlindən alındığını hamı xatırlayır. Daha sonra avrokubok ərəfəsində komanda siyasətinə kənar müdaxilələrlə cəhd olunması da heç kimin yadından çıxmayıb. Nəticədə möhkəm silkələnməyə məruz qalan komandamız özündə güc taparaq nəhayət toparlana bildi. Hətta kənar qüvvələr komandanın bəzi futbolçularını belə ələ ala bilmiş və baş məşqçi Mirça Rednikin əleyhinə qaldıra bilmişdi. O zaman biz də müəyyən məsələlərin şahidi olmuşduq və ""Xəzər Lənkəran”da xəyanətkarlara yer yoxdur”” yazısı ilə həyəcan təbili çalmışdıq. "Dinamo” Zaqrebə müticəsinə uduzan "Neftçi”nin uğursuzluğunu yaddan çıxarmaq üçün, "Xəzər Lənkəran”ın Avropa uğursuzluğunun planlarını cızanlar bununla da Azərbaycan futboluna belə, xəyanətdən vaz keçmədilər. Əgər o vaxtı belə futbolçulara qarşı ciddi tədbirlər görülsəydi indi yəqin ki, belə acı məğlubiyyət yaşamazdıq. Belə acı məğlubiyyətin başqa önəmli bir səbəbi də qapımızın etibarlı biri tərəfindən qorunmaması idi.

Niyə qapımızın etibarlı bir qoruyucusu yox idi? Niyə belə psixoloji gərgin oyunlara hazır olmayan Kamal Bayramovun ümidinə qalmışdı "Xəzər Lənkəran”? Çünki komandanın əsas qapıçısı Kamran Ağayev yox idi? Özünün dediyinə görə məşqləri yarımçıq tərk edən bu adamın zədəsi var idi. Amma komandanın tibb personalı onun zədəli olması haqqında heç bir açıqlama vermədi. Baş məşqçi Rednik də oyundan iki gün qabaq, Kamranın xarakteri varsa, bu oyuna çıxıb oyununu oynamalıdır demişdi. Etik formada deyilən bu sözün əsl mənası isə onun kişiliyi varsa, çıxıb oyununu oynasın, daha müxtəlif bəhanələr gətirməsin,-deməkdir.

Kamran Ağayev isə bu ərəfələrdə mənimki Redniklə tutmur və s. fikirlər söyləyirdi. İndi özünüz fikirləşin, zədəliyəm demək nədir?, Redniklə mənimki tutmur deyib, məşqi yarımçıq qoyub getmək və belə məsul bir oyuna çıxmaqdan imtina etmək nə deməkdir? Komandada ciddi nizam-intizam olmalıdır. Nizam-intizama riayət etməyən isə kimliyindən asılı olmayaraq cəzalanmalı, lazım gələrsə, qovulmalıdır. Komandanın rəhbərliyi baş məşqçi postunda Mirça Rednikə güvənirsə, sən kimsən ki, baş məşqçiyə qarşı çıxırsan. Bununla ümumilikdə həm rəhbərliyə və həm də azarkeşlərə qarşı çıxmış olursan. Legionerləri bura yalnız pul qazanmağa gəldiyinə görə günahlandıranlar bəs yerlilərin bu murdar hərəkətlərindən niyə danışmırlar? Hətta bəziləri belələrini müdafiə edib onların cəzalandırılmasını milli faciəyə belə çevirmək istəyirlər. İndi belə bir intizamsız və qeyri-peşəkar futbolçuya qoy onlar gəlib sahib çıxsınlar.

Yuxarıda komandanın qapısının niyə daha etibarlı birinə tapşırılmaması sualı ortaya çıxmışdı. Çünki belə birisi komandada yoxdur. Niyə yoxdur? sualının cavabı isə çoxdan çoxlarımıza məlumdur. Bütün mövqelərə lazımi səviyyədə futbolçu gətirməyi bacaran komanda rəhbərliyi və bunun üçün Mirça Rednikin kifayət qədər əlaqələrinin olması, niyə bu qapıçı mövqeyinə futbolçu gətirə bilmədi? Komanda Avstriyada təlim-məşq toplantısı keçirəndə bu mövqeyə də baxışa gələn futbolçular var idi. Amma niyə alınmadı? Çünki şahidlərin dediyinə görə ("Xəzər Lənkəran” naminə xahiş edirik ki, şahidlər bu barədə susmasınlar) hər belə bir qapıçının baxışa gətirilməsi zamanı Kamran Ağayev olmazın müsibətlər çıxarırmış. Necə yəni mənim mövqeyimə futbolçu gətirirsiniz? O oynayacaq və mən ehtiyatda qalacağam? Ona görə də qapıçı mövqeyinə güclü birisi alına bilmədi. Yalnız özündən zəifinin gəlməsinə razılıq verən Kamran Ağayevin nazı ilə çox oynanıldı. Ona görə də bu gün qapımızda monopoliya yaratmağa nail olan Kamran Ağayev bax belə bir oyun ərəfəsində qapıda qalmadı və biabırçı məğlubiyyətin onun olmaması ilə əlaqəli olmasını göstərmək istədi. Guya o yoxdursa, "Xəzər Lənkəran” bir heçdir. Həqiqəti bilənlər isə bunun bir xəyanət olduğunu çodan anlayır. Belə xəyanətkar isə komandamızı istəməyənlərin əlində əlbətdə bir oyuncağa da çevrilmiş oldu. 

Mirça Rednikin və klub rəhbərliyinin səhvi isə belə birisinin nazı ilə oynamaqdır. Bizə xəyanətkarlar lazım deyil. Bizə Güclü nizam-intizamlı futbolçulardan qurulmuş bir komanda lazımdır. Kim ipə-sapa yatmırsa, yerli və ya əcnəbi olsun, dərhal cəzalanmalıdır. Bu yöndə klub rəhbərliyinin və məşqçilər korpusunun atacağı ən sərt addımları fanklub olaraq dəstəkləyəcək və daim möhkəm komanda yolunda biz də çalışacağıq.

Bu arada Rəşad Abdullayevin tərbiyəsizliyinə digərlərinin kobud oyununa və hakimin susqunluğuna bir daha qayıdaraq bu işlərin kompleks bir tədbir olduğunu yada salaraq onu da demək istəyirik ki, bəziləri fikirləşməsin ki, Rahid Əmirquliyev kapitan kimi niyə etirazını bildirmədi? Guya Kamran Ağayev olsaydı, bu işlərə əsl kapitan kimi fəal müdaxilə edər və bunun qarşısının alınmasına nail olardı. Bəli, Rahid Əmirquliyev kapitan kimi ikinci oyununa çıxır və bu barədə təcrübəsizdir.  Bəlkə Rəşadın tərbiyəsizliyi elə bu kompleks tədbirlərdən olub, Kamranla işbirliyinin nəticəsidir. Yoxsa, heç bir səbəb olmadan gənc Şəhriyara niyə şillə vurmalı və hakim də niyə susmalı idi? Milyonlar kimi əlaqəli rəsmi şəxslər də Rəşad Abdullayevin bu tərbiyəsizliyinin şahidi olmamış deyillər. Əgər deyillərsə də, videotəkrara baxsınlar və AFFA Nizam İntizam Komitəsinin növbəti iclasında onun qırmızı vərəqəsini və daha başqa cəza tədbirini görsünlər. Əgər görməyəcəklərsə, onda biz ölkə futbolunda həmişə ikili standartla işləmişik desinlər!