Avqust ayının 30-da "Xəzər Lənkəran” camiəsində daha şad günlərdən biri idi. Belə ki, "Xəzər Lənkəran” camiəsində yaşının o qədər də çox olmasına baxmayaraq, çox böyük hörmət və nüfuz qazanmış, komandanın tərcüməçisi Elvar Quliyevin toy mərasimi günü idi. Elvar bəy dürüstlüyü, səmimiliyi və peşəkarlığı ilə həm klub rəhbərliyinin, həm bütün komanda heyətinin və böyük "Xəzər Lənkəran” azarkeşlərinin bir-bir qəlbində olan insandır.

"Bosman” fanklubu adından bu gözəl insana və onun qurduğu yuvaya Allahdan yalnız sağlamlıq və xoşbəxtlik arzu edirik.

Fanklubumuzun rəhbəri Mirhafiz Babayevin bu şad günə həsr etdiyi şeiri də verməklə bu ocağa bir seyid xeyir-duası kimi ərməğan edirik.

         Elvar Quliyevin toy gününə, dostu Mirhafiz Babayevdən hədiyyə

Bu gün üzlərdə sevinc var, dostumun həm yarımın,

            Çünki şad gündü bu gün, toy günüdür Elvarımın.

Bu o Elvar ki, sevib yarını almış yanına,

            Bu o Elvar ki, mətinlik yazılıb, ad-sanına.

            Bu o Elvar ki, yara, yar deyib, əğyar deməyib,

            Bu o Elvar ki, halal sevgilər hopmuş qanına,

            Bu gün üzlərdə sevinc var, dostumun həm yarımın,

            Çünki şad gündü bu gün, toy günüdür Elvarımın.

            Gör neçə dost qazanıb, çünki o dostluqla yanıb,

            Çox çətin gündə, o, dost arxasında mərd dayanıb.

            Çəkib o, dost ilə qüssə, yükünə həmdəm olub,

            Kürəyin dost yükünə versə bunu zövq sanıb.

            Bu gün üzlərdə sevinc var, dostumun həm yarımın,

            Çünki şad gündü bu gün, toy günüdür Elvarımın.

            Tanrı, yurd, ata-ana, bir yarına sevgisi var,

            Dostuna, qardaşına, həmkarına, sevgisi var.

            Bir böyük sevgini də qatmış o, bu sevgilərə,

            Qəlbinin ən dərinində yer ayırmış "Xəzər”ə

                Bu gün üzlərdə sevinc var, dostumun həm yarımın,

            Çünki şad gündü bu gün, toy günüdür Elvarımın.

            O böyük sevgi tanışdırdı, bizi Elvar ilə,

            Çuğlayıb həm də qarışdırdı bizi Elvar ilə.

            Bu böyük sevgi üçün görmüşəm o, göz yaşını,

            Telefonda hönkürüb-ağlamışıq Elvar ilə.

            Bu gün üzlərdə sevinc var, dostumun həm yarımın,

            Çünki şad gündü bu gün, toy günüdür Elvarımın.

            Belə bir sevgi dolu insana yar oldu sənəm,

            Bu sevgi bir insan üçün şərəfli yoldu, Sənəm!

            Mirhafizin də duası, olacaq sizlər üçün,

            Tək mənim yox, belə dualarınız boldu, Sənəm!

             Bu gün üzlərdə sevinc var, dostumun həm yarımın,

            Çünki şad gündü bu gün, toy günüdür Elvarımın.

24 Avqust 2012. Saat 19:02 Bakı şəhəri.