Lənkərandakı ilk görüşdə 2:2-lik bərabərə qalma komandamızın səfər oyununda şanslarını azaltmışdısa da bu az şansı "Xəzər Lənkəran” maksimumla yekunlaşdırdı. Cavab görüşünə qədər olan müddəti biz də nisbi sakitlik kimi dəyərləndirmişdik. İlk oyunun analitik təhlilini də verməklə çıxarılacaq düzgün nəticələrdən sonra qələbə əldə etməyin mümkünlüyünü də göstərmiş və komandaya cavab oyununda uğurlar arzu etmişdik. Analitik təhlilimiz, yazıda göstərildiyi kimi heç də komandanı ruhdan salma deyil, səhvlərdən düzgün nəticə çıxarmağa hesablanmışdı. Əksinə, ev oyunundan sonra 2:2-lik bərabərliklə əlaqədar azarkeşlərin barışmazlığından yaranan xaotik tənqidin komandanı ruhdan sala biləcəyini nəzərə alaraq, adıçəkilən başlıqla yazı təqdim etdik və xaotik tənqidləri, analitik müzakirə müstəvisinə çıxarmağa çalışdıq. Buna nail ola bildiyimizdən də qürur duyuruq. Çünki "Nisbi sakitlik və çıxarılacaq düzgün nəticə” yazısına qədər digər yazılarda şərh bölmələrindəki fikirlərə və bu yazıya və ondan sonrakı yazılardakı şərhlərə fikir verdikdə artıq azarkeşlərimizin daha çox oyunun müzakirəsi ilə bağlı və buraxılan səhvlərə analitik yanaşma forması diqqət çəkməyə başladı. Bax, elə bununla komanda üzvləri də təzyiqdən müəyyən mənada qurtulmuş oldular. Düzdür bəziləri bizim bu təhlilləri aparmaq üçün mütləq "Pro” kateqoriyalı mütəxəssis olmamızın lazımlılığını bildirmişdi. Həmin vaxt bir və ya iki olan belə şəxslərə o zaman cavab verməməyi məqsədə uyğun sayıb, yalnız cavab görüşündən sonra bu məsələyə qayıtmağın daha məntiqli olacağını düşünmüşdük. Həmin bir-iki şəxs yəqin bu göstərilən yazının mahiyyətini başa düşməyərək, onun bir qərəz olduğu qənaətinə gəlibmiş.

            Bu gün sübut olundu ki, bizim yazı həqiqətən də əhəmiyyətli imiş. Həmin bir-iki şəxs də yəqin ki, düşüncə tərzlərində yanıldıqlarına özlərində aydınlıq gətiriblər. Bir daha onu deməliyik ki, hər hansı düzgün baxış heç də həmişə "Pro” tələb etmir. Xeyli qədimlərdə suya salınmış cismin, öz həcmi qədər suyu sıxışdırıb çıxardığını vannaya girərkən kəşf edən Arximed "Evrika” qışqırarkən heç də "Pro” kateqoriyasına sahib deyildi. Yaxud o, heç "Pro” deyil "Evrika” qışqırmışdı. Tam başqa misal elə futboldan da göstərmək olar. Bu günlərin ən tanınmış futbol mütəxəssislərindən olan Mourinyo hələ tərcüməçi işləyərkən kifayət qədər indiki futbol biliklərinə sahib idi. "Pro” məsələsi isə sonradan hansısa komandalarda işləmək üçün Mourinyoya lazım gəldiyindən bunu əldə etməyi münasib bildi. Əgər o "Pro”-nu almasaydı da elə bugünki kimi yenə futbol biliklərinə sahib olan bir şəxs idi. Nə isə bizim isə hər hansı komandanın sükanı arxasına keçmək fikrimiz yoxdur.

            Məsələn, adıçəkilən yazıda futbolçuların fiziki potensialının 90-dəqiqəyə düzgün bölünməsi fikri qabardılmışdı. Bunlar boşuna qabardılmamışdı. Çünki, necə olr ki, ilk 45-dəqiqəni yüksək fiziki göstəricilərlə tamamlayan komanda, ikinci 45-dəqiqədə tam fiziki çatdırmama vəziyyətinə düşür. Bu heç də belə olmamalı idi. Fiziki güc yorularaq tədricən tükənən bir şeydir. Bəs onda ikinci hissədə niyə birdən tükənmə oldu. Buna iki əsas səbəb ola bilərdi. Havanın çox isti olduğundan fasiləyə çıxmış komanda üzvləri ya nəzarətsizlikdən və ya da başqa səbəbdəb çoxlu miqdar su qəbul edib, birdən-birə ağırlaşa bilərdilər. Yaxud da hansısa "psixoloji durumu dəyişəcək söhbətlərə” məruz qala bilərdilər. Evdəki, 2:2-lik qarşılaşmadan sonra Yunis Hüseynovun buraxılan qollar haqqında dedikləri də düşünməli bir çox suallar qoydu. Bu barədə hələlik çox da uzağa getməyək.

            Bir də o sübut olundu ki, klubun fəxri prezidentinin komandanın yanında olması nə deməkdir. Bu lap "Xəzər Lənkəran”ın ilk dövrlərini yada saldı və bizləri qəribsətdi. Artıq ikinci təsnifat mərhələsindəyik. Böyük ehtimalla əvvəllər də bu turnirdə rəqibimiz olmuş Polşanın Poznan şəhərinin təmsilçisi "Lex”lə qarşılaşacağıq. Şükürlər olsun ki, klubun fəxri prezidenti bir neçə futbolçu ilə komandanı gücləndirməli olduğunu işarə edərək, yenə də komandanın yanında olacağına söz verib. Bu və bir çox məsələlərə bel bağlayaraq növbəti mərhələdə də komandamıza uğurlar arzulayırıq.