Bildiyimiz kimi nəhayət, "Xəzər Lənkəran” klubu boş qalmış baş məşqçi postuna ispaniyalı, 39 yaşlı mütəxəssis, Carles Martorell Baquesi dəvət etdi və onunla gələn mövsümün sonuna qədər rəsmi müqavilə imzaladı. Bu gün isə yerli vaxtla 14:00-da mətbuat konfransı keçirərək onu ictimaiyyətə təqdim etdi. Mətbuat konfransında həm də jurnalistlərin suallarına cavab verən "Barselona” məktəbinin yetirməsi, fikirlərini əsl bir futbol bilicisi kimi izah edib. Təkcə onun "komandaya yeni oyunçular gətirəcəksiniz?” və "yeni komandanız "Barselona” stilində oynayacaq?” kimi suallara, "mən artıq bu komanda ilə bir müddətdir ki, tanışam” və "müqayisə etməzdim, hər bir komanda üçün onun potensialına uyğun taktika qurulur” kimi cavablar verməsi hər halda onun futbol biliyinin yüksək olduğuna bir işarədir. Qalır professional komandada praktik olaraq baş məşqçi kimi özünü sübut məsələsi. Güman edirik ki, bu baxımdan da Carles Martorell Baques işinin öhtəsindən gələcək.

            Bu arada onu da deməliyik ki, Mirça Rednikin gedişindən sonra "Xəzər Lənkəran”ın xeyli zəifləyərək iddiasız duruma düşməsi, onun doğma azarkeşləri kimi futbol ictimaiyyətini də narahat edən məsələlərdən idi. "Xəzər Lənkəran” kimi komandanın "yoxluğunda” çempionatda rəqabətin azalması və zəif duruma düşməsi ona olan marağın azalmasına gətirib çıxarmışdı. Bunu hər mənada hiss etmək mümkün idi.

            Elə Carles Martorell Baqueslə imzalanan rəsmi müqavilədən sonra dost "Simurq” azarkeşlərinin fanklubumuzun rəhbərinə zəng edərək onu təbrik etməsi və bizim vasitəmizlə bu təbrikin bütün "Xəzər Lənkəran” azarkeşlərinə çatdırılma xahişi, onu göstərir ki, nəinki komandamızın azarkeşləri, bütün sağlam futbol ictimaiyyəti "Xəzər Lənkəran”ın son durumuna və rəqabətin azalmasına görə narahatlıq hissləri keçirirmiş. "Simurq” fanklubunun rəhbəri Maqsud Xeyrulla bütün zaqatalalı azarkeşlər adından bunları çatdırıb: "Hörmətli Mirhafiz bəy, "Xəzər Lənkəran”ın son durumu əlbətdə bizləri də narahat edirdi. O baxımdan ki, həmişə iddialı olan və Azərbaycan futbolunda xüsusi yeri olan "Xəzər Lənkəran” komandasının son durumu əlbətdə ürəkaçan deyildi. Bunun nəticəsində də çempionatda rəqabətin zəifləməsi və marağın azalması bütün sağlam futbolsevərlər kimi bizi də narahat edirdi. Bildiyimizə görə komandanız "Barselona” məktəbinin yetirməsi olan bir məşqçi ilə müqavilə bağlayıb (bunun təsdiqini bir daha soruşur). Sizin simanızda bütün "Xəzər Lənkəran” azarkeşlərini təbrik edir və bunu hamıya çatdırmağınızı xahiş edirik. İnanırıq ki, bundan sonra komandanız lazımi səviyyədə güclənəcək və çempionatımıza əvvəlki tək maraq artacaq. Bizim istədiyimiz də yalnız rəqabətin güclü olmasıdır. Sizlərə və komandanıza zaqatalalı azarkeşlər adından uğurlar arzulayırıq.”

            Eyni zamanda biz də cari mövsüm xeyli güclənmiş və çempionata xüsusi rəqabət və gözəllik gətirmiş "Simurq” komandasına və onun azarkeşlərinə uğurlar arzulayırıq və göstərdikləri diqqətə görə çoxsağolun deyirik.