Qabaqcadan bildirildiyi kimi sentyabrın 16-da  "12-ci oyunçu”  azarkeş qrupunun təşkilatçılığı ilə "Xəzər Lənkəran”  azarkeşləri "Fırtınalar Meydanı”nda iməclik keçirdilər. İməclikdə ümumilikdə 120-azarkeş iştirak etdi. Eyni zamanda  "Xəzər Lənkəran”  komandasının məşqini izləyən 200-ə yaxın azarkeşin bir çoxu çalışan azarkeşlərə köməklik etmək niyyətində olduqlarını bildirsələr də buna ehtiyac qalmadı. Əvvəlcədən 3-saat ərzində iməclik keçirmək nəzərdə tutulsa da, 2-saat ərzində bütün işlər yekunlaşdı. Bəzi azarkeşlər hətta meydançanın kənarında olan ən kiçik ölçülü palçıq dənəciklərini də əlləri ilə yığışdırdılar. Bundan sonra stadionun  əməkdaşları lil və palçıqdan təmizlənmiş ərazini, meydançanın suvarma sisteminə quraşdırılmış yüksək təzyiqlə vurulan  su qurğusu ilə yumağa başladılar. İməclikdə çalışan azarkeşlər ilə birgə Lənkəran çay fabrikinin qarşısında yerləşən  "Lənkəran çayı” adlı kafeyə yollandıq. Bu zaman məşqi izləyən azarkeşlər hələ də yardımçı meydançanın kənarında qalmışdılar. Fürsətdən istifadə edib məşq barədə onlardan qısa məlumat aldıq.

             Biz də "Bosman” Fanklubu olaraq, bu işin həm təşkilatçılarına, həm də iştirakçılarına dərin minnətdarlığımızı bildiririk. Demək istəyirik ki, uzaqda olduğumuza görə bu tədbirdə iştirak edə bilməmişik. Amma çox həvəslə iştirak etmək istəyərdik. Bu artıq birinci belə hal deyil. İki il əvvəl də matçqabağı güclü yağan qar problem yaratsa da yenə bu sadiq azarkeşlərimizin köməyi ilə stadionun personalı meydanı qardan təmizləmişdilər. Çox misallar göstərmək olar "Xəzər Lənkəran” - azarkeş sevgisinə dair. Təki, komanda matçlara çıxsın, qələbə qazansın!

             Böyük "Xəzər Lənkəran" ailəsi hər zaman alqışa layiqdir. Onlar hər zaman bunu sübuta yetirmişlər. Türklər demişkən "iyi günde, kötü gündə hər zaman seninleyik"! Belə bəxtəvər komanda dünyada barmaqla göstərilən qədər azdır. Bütün əməyi olanlara Allah kömək olsun. Heyif ki, uzaqda olduğumuzdan biz iştirak edə bilməmişik. Çox sağ olsun belə azarkeşlər. Onlar əsl "Xəzər"sevərlərdir!

             Müəllifi Mirhafiz M. Babayev olan, "Xəzər Lənkəran” klubu ilə onun azarkeşlərinin dostluğuna həsr edilmiş şeri də uyğun bilib nəzərinizə çatdırırıq:

Biz sənə layiqik, sən bizə layiq.

Ayrı cür düşünən olar nalayiq!

Əl-ələ veririk çətin gündə biz,

Bu dostluq nümunə, dostluq misilsiz.

Kükrədi bol sular, selə dönərək,

Dənizə axmalı, bu sellər gərək.

Həm dənizə axdı, həm də ''meydana'',

Bir hikmət bəxş etdi, bu sel insana.

Dəniz də Xəzərdir, meydan da "Xəzər",

Sel yudu apardı, yoxdu bədnəzər.

Bu sel gəlmişdi ki, təmizlik etsin,

Bütün dərd-bəlanı aparıb getsin.

Əvəzində dostluq bəxş etdi bizə,

Azarkeş heyrandır "Xəzər"imizə!