"Olimpiya” ilə məşhur oyundan sonra "Xəzər Lənkəran”da baş məşqçi dəyişikliyi baş verdi. Postundan ayrılan yerli mütəxəssis Ağasəlim Mircavadovu Rumın baş məşqçi Mirça Rednik əvəzlədi. Hadisələrin təfərrüatına çox da varmadan müəyyən məqamlara toxunmaq istərdik. Komandanı tərk etmiş Ağasəlim Mircavadov özündən sonra heç də ideal heyət qoyub getməmişdi. Bəlkə də onun gedişinə müəyyən heyətsizlik səbəb olmuşdu ki, bu da onun məcburi istefası ilə nəticələnmişdi.

            Belədə komandanın sükanı arxasına keçmiş rumıniyalı baş məşqçi Mirça Rednik iyirmi gün ərzində lazımi döyüşkən heyət qura bilmişdi ki, bu da onun necə bir mütəxəssis olduğunu deməyə əsas verir. Tələsik qurulmuş heyətlə Rednik lazımi nəticələri sıralamağa başladı. Daha sonra Mirça Rednik, qış fasiləsində tələsik qurulmuş heyəti bir az da keyfiyyətli maşına çevirmək üçün bir sıra futbolçuları da komandaya cəlb etməli oldu. Uğurlar qazanan komanda və onun baş məşqçisi Avroliqa oyunları öncəsi heyəti bir az da günün tələblərinə uyğun qurmalı idi ki, bunu da müəyyən qədər həyata keçirmiş oldu. Belədə bəziləri onu çox futbolçu almaqda suçlayırdı ki, bunun da əsas səbəbi komandanın daim inkişaf edərək daha yüksək səviyyələrdə mübarizə aparmalı olduğunu unudirdular. Mirça Rednikin stabil heyəti bəlkə də bu il qurulacaqdı. Artıq müəyyən səviyyələrə davamlı heyətin vaxtı çatmışdı. Amma mərdimazarlar qoymadı. Müxtəlif səviyyələrdə onun işinə maneələr yaradıldı ki, sonda Rednikin komandadan ayrılması ilə nəticələndi.

            Ötən tur Gəncədə səfər qələbəsi qazanan komanda bu gün də doğma meydanda boş tribunalar arasında "Bakı”ya üç top fərqi ilə qalib gəldi. Belədə bəzi səthi futbol biliyinə malik insanlarda və ya məqsədli olaraq belə fikirlər səsləndi: "Görürsünüz, komanda Biçərlə necə oyun göstərir. Həmin komandadır da... Rednik taktika qura bilmirdi..” və sair və ilaxır. Həmin şəxslərə bəzi xatırlatmalar etməli olduğumuzdan bunları deməliyik. –Bəli, komanda həqiqətən də oyun göstərib qələbə qazandı. Bunu inkar etmək mümkün deyil. Həmçinin onu da inkar etmək mümkün deyil ki, bu komanda Rednikin qurduğu bir maşındır. Biçər bu maşına hər hansı detal (futbolçu) əlavə etməyib ki, onun rahatlığını, gediş sürətini və sair amilləri dəyişsin, Xeyir! Sadəcə Rednikin qurduğu maşını idarə etməklə uğur qazanıb. Görün Rednik necə bir mütəxəssisdir ki, qurduğu maşın həvəskar sürücü əlində belə uğur qazana bilir. "Bakı”da Bülənt Korkmazın qurduğu maşınla bir neçə kilometr irəliləyən Biçərin əlində indi Rednikin qurduğu daha mükəmməl bir maşın var.

İndi mübahisə mövzusu bu maşının idarəçiliyi ilə bağlı ola bilər. Sual doğuran məsələ o ola bilər ki, necə olur ki, Rednik belə bir maşını idarə edə bilmirdi? Bu sualın cavabını isə ötən günlərə diqqətlə nəzər saldıqda görməmək mümkün deyil. Birincisi hansı məntiqlə demək olar ki, belə bir mexanizm quran bir mütəxəssis onu idarə edə bilməsin. Daha sonra digər məsələləri də yada salsaq, görərik ki, onun qurduğu maşın tez-tez kimlərsə tərəfindən zədələnir, detalları (futbolçular) isə süni surətdə bəzi "ustalar” tərəfindən xarab edilirdi. Bəzən isə məhəllənin tərbiyəsiz uşaqları gah bu maşının təkərlərinin havasını boşaldır, gah müəyyən əl çatan boltlarını boşaldır, "ustalar” isə ehtiyat hissələrin olmadığını bəhanə gətirərək, brak hissələrlə maşını "təmir” edirdilər və beləcə səfərlərə hazırlaşan maşın sınıq-salxaq formada yola çıxmalı olurdu. Bir az geriyə boylansaq, komandada Rednikin son dönəmində zədə epidemiyası baş qaldırmışdı. Futbolçular zədəli olduqlarını bəhanə gətirərək, meydana çıxmaqdan imtina edirdilər. Belədə Mirça Rednik məcburiyyətdən hansısa futbolçunu ona uyğun olmayan mövqedə oynatmalı olurdu ki, bu da bəzi məqsədlilərin əlinə bəhanə verirdi.