Rednikin pərdəarxası
cizgiləri Mirça
Rednikin "Xəzər Lənkəran”a təyinatı zamanı bütün idman mediası onun sadəcə,
internet qaynaqlarından əldə etdiyi qısa bioqrafiyasını bilirdi. Lakin indi bir
mövsümü geridə qoyduğumuzdan hansısa qənaətə gəlmək mümkündür. Rednik "Xəzər
Lənkəran”da işə başladığı gündən bu günədək onun haqqında bir dəfə də olsun tənqidi
yazı yazmadım deyə dostlarım tərəfindən qınaq obyektinə çevrildim. Çalışdığım qəzetdə
"Sən Redniki yaman çox müdafiə edirsən deyə” sətiraltı tənələr eşitdim. Amma
susdum və zamanın məni haqlı çıxaracağına ümid edib gözlədim. Belədə Rednikin
praqmatik futbol oynatdığını iddia edənlər az sonra ölkədə ən baxımlı futbolun
"Xəzər Lənkəran”ın oynadığını yazmağa başladılar. Rednikin
transferlərdən yaxşıca pul qazandığını iddia edənlər sonradan əslində, onun gətirdiyi
futbolçuların əksəriyyətinin icarə əsasında oynadığını, bəziləri ilə isə
mövsümün sonuna qədər müqavilə bağlandığından klubun ziyana düşmədiyini, üstəlik
qışda heyətə cəlb olunan futbolçuların komandaya fayda gətirdiyini görüb kənara
çəkildilər. Zaman keçdi və ilk mövsümdəcə ölkə çempionatının gümüş medalını və
ölkə kubokunu qazanan rumın mütəxəssis məşqçilik sahəsində nəyə qadir olduğunu
ölkəmizdə də göstərmiş oldu. Bununla belə
hələ bu gün də rumın mütəxəssisin bostanına daş atanlar az deyil. Məşqçi kimi
özünü sübut edən çalışdırıcını görəsən niyə qəbul etmirlər? Yaxud fikrini tez dəyişən,
qəhrəmanla antiqəhrəman seçimini bir anda edən çılğın Lənkəran publikası onu nədən
bu qədər çox sevir? Vaxtilə Azərbaycanın ən tanınmış məşqçisi mənimlə iki
saatlıq üzbəüz görüşündə "məndən bu qədər tənqidi yazı yazma” deyə ağsaqqal
xahişində bulunsa da, az müddət sonra baş verən hadisələrə biganə qala bilməyib,
tənqidi fikirlərimi oxucumla bölüşdüm. Bəs Redniki
bu qədər müdafiə etməyə görəsən, doğurdanmı dəyərdi? Sizlərlə yaxından tanımağa
doğru getdiyim və ölkədə çox az adamın bildiyi Redniklə bağlı bilgiləri
paylaşacağam ki, baş məşqçi Mirça Rednikin insani keyfiyyətlərini sizlərdə biləsiniz.
Onun mütəxəssis kimi nəyə qadir olduğunu bir tərəfə qoyub, insan kimi Mirça
Rednikin kim olduğunu da bilməyə, pisə pis, yaxşıya yaxşı deməyə dəyər. - Rednik " Xəzər
Lənkəran”a ilk gəlişində klub prezidentindən daha çox məvacib alan, amma aldığı
paraya dəyməyən futbolçuların komandadan göndərilməsini, əvəzində isə ayına cəmi
5-10 min dollar arası məvacib alacaq futbolçular gətirəcəyini bildirir. Klub
prezidentinin "daha artığını verməyə hazırıq” deməsinə Mirçanın cavabı belə
olur – Qətiyyən! Uzağı on min. Belədə Rednikin transferlərdən para qazanmaması əyani
şəkildə sübut olunur. - Baş məşqçi
kimi ona təklif olunan xüsusi avtomobil və evdən imtina edir. "Mən bazada
qalacaq və klubun avtobusunda hərəkət edəcəyəm. Artıq məsrəfə ehtiyac yoxdur” –
deyə hamını təəccübləndirir. - Lənkəran şəhər
stadionunda çalışan qadınları bir gün ətrafına toplayır. Bazanın dəhlizində
qoyulan kofe çaydanından onların içib-içməməyini soruşur. "Yox” cavabı alınca,
özü bir-bir kofe hazırlayıb qadınlara təqdim edir və xahiş edir ki, onlar da hər
gün bu kofedən dadsınlar. - Rumıniyada qeyd
olunan " Analar günü”ndə bazanın bütün xanım işçilərinə pul paylayaraq, onları
təbrik edir. - Lənkəranda
xüsusi qeyd olunan "Aşura günü”ndə bütün texniki işçilərə yenə də cibindən pul
paylayır. - "Xəzər Lənkəran”ın
texniki heyətində çalışan şəxslərdən birini dilxor görüb səbəbini soruşur. Şəxsin
atasının "göz əməliyyatına” ehtiyacı olduğunu bilib, bütün xərcləri öz üzərinə
götürür. - Lənkəran şəhər
stadionunu sel basır. Texniki heyət bir neçə gün palçığın təmizlənməsi ilə məşğul
olur. Bu gərgin iş zamanı Lənkərana gələn Rednik bütün işçi qüvvəsinə cibindən
pul paylayır. - Çempionatın
başa çatmasına iki ay qalarkən, Mirça hər iki ayın sonunda öz şəxsi hesabından
pul götürərək, stadionun işçilərinə növbəti dəfə pul paylayır. - Gəldiyi ilk
gündən bu yana bir dəfə də olsun klub rəhbərliyi ilə mükafat prinsipini müzakirə
etmir, komandaya ayrılan hər oyun üçün mükafat məbləğinə etiraz etmir (Üstəlik,
bildiyim qədəri ilə bu mövsüm ayrılan mükafat tarixin ən aşağı pul mükafatı
sayılır). Əslində, bu mənim
bildiklərimdir. Amma elə yuxarıda ardıcıllıqla düzülən bir insan xeyirxahlığı
çox şeyi deyir. Redniki məhz buna görə Lənkəranda çox sevirlər. Klub
prezidentindən tutmuş ən sadə azarkeşə qədər hamı üçün o, peşəkar, nəcib,
çalışdığı camiəni birləşdirməyə müvəffəq olan Rednikdir. Məhz onun zamanında
klub rəhbərliyi hər bir uğurun paradan, puldan ibarət olmadığını anladı. Bəlkə
elə ona görə idi ki, ölkə kubokunun finalında bütün klub rəhbərliyi əvvəlki illərdəki
kimi bir-birini yox, məhz Redniki qucaqlayıb təbrik edirdi. İndi siz deyin,
Redniki tənqid etməyə və ya sevməməyə dəyərmi? Hüseyn
CƏBRAYILOĞLU Mənbə: "Apasport.az”
|