 PFL-in rəsmi saytında "Muğan" - " Xəzər Lənkəran" oyunundan sonra, hər iki komandanın baş məşqçilərinin mətbuat konfransında dedikləri işıqlandırılıb. Burada onlar "Muğan" klubunun baş məşqçisi Almir Hurtiçin fikirlərini olduğu kimi versələr də, "Xəzər Lənkəran"ın baş məşqçisi Mirça Rednikin fikirlərini tam təhrif ediblər. Bu təhrif barədə bir çox informasiya vasitələrində o cümlədən, "Xəzər Lənkəran”ın rəsmi saytında da informasiya verilərək baş məşqçimizin söylədikləri müqayisə üçün olduğu kimi təqdim olunub . Aşağıda "Xəzər Lənkəran” ın rəsmi saytıda getmiş həqiqi olan varıantı təqdim etməzdən əvvəl öz fikirlərimizi təqdim edirik. Bizim demək istədiyimiz isə başqa bir məqamdır: Belə təhriflərə heç də həmişə yol verməyən PFL-in saytı burada nə məqsəd güdür? Onlar əlbəttə göstərilən matçda baş hakim Anar Salmanovun etdiyi biabırçılıqların artıq hamı tərəfindən başa düşüldüyünü anlamış, və bu sifarişin özləri tərəfindən verildiyinin faş olmasını pərdələmək üçün Rednikin fikirlərini təhrif etmişlər. Guya "Xəzər Lənkəran” ın xal itirməsi komandanın yaxşı oyun sərgiləyə bilməməsi ilə əlaqədardır. Bu təhrifə yol verən PFL dolayısı yolla məsuliyyəti öz üzərinə götürmüş olur. Bir də onu demək istəyirik ki, matçsonrası mətbuat konfransına gəlməyən hər hansı baş məşqçi PFL tərəfindən külli miqdarda cərimə olunur. Bəs onda matçsonrası Mirça Rednikin fikirlərinin təhrif olunmasının məsuliyyətini kim daşıyır və onu nə qədər cərimə və ya hüquqi məsuliyyət gözləyir? Hər halda kimsənin fikirlərini təhrif edərək, tam başqa məna ilə ictimaiyyətə təqdim edilməsinin hüquqi bir cəzası olmalıdır. Bu müzakirədə hüquqşünasları fəallığa dəvət edirik. İndi isə "Xəzər Lənkəran”ın rəsmi saytında gedən matçsonrası mətbuat konfransına aid verilmiş yazını təqdim edirik:
Bu gün PFL-in rəsmi saytında "Xəzər Lənkəran” və "Muğan” komandalarının baş məşqçiləri Mirça Rednik və Almir Hurtiçin bu komandaların oyunundan sonrakı mətbuat konfransında səsləndirdikləri fikirləri dərc olunub. Almir Hurtiçin sözləri düzgün catdırılıbsa, Mirça Rednikin dedikləri kobudcasına təhrif olunub və tam olaraq çatdırılmayıb. Belə ki, PFL-in saytına görə Rednik guya komandasının oyunundan narazıdır və bu məqamı dilə gətirərək söz verib ki, bu nöqsanları aradan qaldıracaq. Əslində məşqçimiz komandamızın oyunu haqqında ümumiyyətlə heç bir fikir bildirməyib. Rednikin dediklərini olduğu kimi sizə təqdim edirik:-"Bu gün bizim rəqibimiz güclü komanda idi və o yaxşı oyun nümayiş etdirdi”, - "Xəzər Lənkəran”ın baş məşqçisi Mirça Rednik mətbuat konfransında dedi. O qeyd etdi ki, komandaların ikisi də qələbə istəyirdilər və qalib çıxa bilərdilər. O ki qaldı hakimliyə, məşqçimiz vurğuladı:- "Mən heç vaxt hakimlərdən danışmağı xoşlamamışam, lakin bu gün bunu etməyə məcburam – "bu gülünc bir hakimlik idi. Hakim bizim ən mühüm futbolçularımızı sarı kartla cəzalandırdı. Deyə bilərəm ki, hakim ədalətsiz idi. Amma nə edəsən? Bu həyatdır. Qarşıda bizi "Neftçi” ilə oyun gözləyir və biz bu oyuna hazırlaşacağıq”.
|
