Hər hansı yarışda və ya döyüşdə hələ tam qələbə və ya məğlubiyyət rəsmiləşməmiş yaranan fasiləyə nisbi sakitlik kimi dəyər verilir. Çünki nəticəni bəlli edəcək döyüşün hələ qabaqda olduğu və hadisələrin necə cərəyan edəcəyi gələcək zamana bağlıdır. Bu mənada qarşıdakı yarışın və ya döyüşün qələbə ilə bitməsi, əvvəlki mərhələdə buraxılan səhvlərin düzgün analizindən və imkan daxilində aradan qaldırılmasından asılıdır.

Dünən doğma "Xəzər Lənkəran” cari mövsüm avroliqanın ilk təsnifat mərhələsində evdə Estoniya təmsilçisi, Tallinin "Nomme Kalyu” komandasını qəbul etdi. Görüş 2:2 hesabı ilə yekunlaşdı. Favorit "Xəzər Lənkəran” sayılır və bunun da sübutu komandanın ev oyununda qazanacağı böyükhesablı qələbə olmalı idi. Hər halda çoxları belə düşünür və gözləyirdi. Çoxları deyəndə ki, elə komandamızın baş məşqçisi Yunis Hüseynov son müsahibələrinin birində müxbirə, hər hansı qələbədən yox, konkret 3:0, 4:0 hesabından danışın, demişdi. Yəni rəqib qapısından 4 cavabsız top keçirəcəyimizi söyləmişdi. Düzdür oyunda 4 top qapllara vuruldu, bu proqnoza görə Yunis müəllimi təbrik etmək olar. Amma onun dediyi kimi hamısı "Nomme Kalyu”nun qapısına yox, ikisi elə öz qapımıza vuruldu. Bunun isə mahiyyəti tam başqadır. Belə ki, doğurdan da 4 topun hamısı "Nomme Kalyu”nun qapısına vurulsaydı, əlbəttə "Xəzər Lənkəran” artıq mərhələni keçmiş sayılardı. Amma o 4 topun ikisini öz qapımızda görməmiz, yəni "Nomme Kalyu”nun rəqib meydanında 2:2-lik bərabərə qalması, bir daha yəni, iki top vuraraq heç-heçəyə nail olması, bu dəfə "Nomme Kalyu”nu daha şanslı edir. Yəni futbol dili ilə desək, evdə cavab görüşünə çıxacaq rəqibimiz indi daha şanslı durum əldə edib. Təki, "Xəzər Lənkəran” səfərdə qalib gəlməklə və ya daha böyük hesablı heç-heçələrdən birinə nail olmaqla, heç olmasa rəqibi kimi 2:2-lik bərabərə qalıb penaltilər seriyasında mərhələni öz adına yazdırsın.

İndi ilk qarşılaşma bitincə nisbi sakitlik yarandısa, bu zaman arxada qalan döyüşü düzgün analiz edib, səhvləri çözmək və həlledici görüşün səfər matçı olduğunu da nəzərə alıb döyüşdən qalib ayrılmanın doğru yollarını tətbiq etmək zamanıdır. Amma evdə buraxılan səhvlərin ardınca, oyundan çıxarılan nəticənin də səhv analiz edilməsi heç də nikbinlik vəd etmir. Hamı gördü ki, ilk yarıda "Xəzər Lənkəran” üstün oyun nümayiş etdirdi. Əslində evdə oynayan və iki futbolçusunun qiyməti qədər büdcəsi olan rəqibə qarşı başqa cür oyun da gözlənilməməli idi. Amma ikinci hissə sanki ilk hissədəki "Xəzər Lənkəran”dan əsər belə yox idi.

Belə çıxır ki, komandanın fiziki durumu lazımi səviyyədə deyil. Bu çatışmayan bir cəhətdirsə, ikinci çatışmayan cəhət isə taktika qurularkən komandanın fiziki potensialının 90 dəqiqəyə düzgün bölünməməsidir. Hər halda məşqçi bunları nəzərə almalı idi. İkinci məsələ yenə məşqçiliklə bağlıdır. Amma bu rəqib baş məşqçinin uğuru ilə əlaqədardır. Belə ki, yalnız nəzəri cəhətdən tanış olduğu "Xəzər Lənkəran”la ilk hissədə praktiki olaraq tanışlıqdan sonra, baxmayaraq ki, qonaq qismində çıxış edirdilər, ikinci hissədə əl atdığı taktiki dəyişikliklərdən sonra, demək olar ki, komandamızın bütün xəttlərini bağlayaraq iflic vəziyyətinə gətirdi. Amma Yunis Hüseynov buna qarşı əməli deyil, sadəcə təəssüf hissləri ilə cavab verdi və taktikaya qarşı, taktikayla cavab verə bilmədi. Beləliklə, rəqib baş məşqçi İqor Prins daha təcrübəli bir mütəxəssis olmaqla futbolda da prinsliyini göstərdi.

Amma bir çoxlarımız, hətta baş məşqçi də nəticəyə görə hakimi günahlandırır. Bu heç də növbəti oyunda hakim ədaləti olarsa, biz qalib ayrılacağıq fikrinə söykənməyə əsas vermir. Belə deyimlər bəlkə də fikri yayındırmaq üçündür. Ədalət naminə deməliyik ki, oyunun baş hakimi sloveniyalı Mitja Zganec heç də oyunu pis idarə etmədi. Hətta demək olar ki, komandamıza qarşı güzəşt sayılacaq mövqe də göstərdi. Belə ki, yarımmüdafiəçimiz Roberto Alvijə ikinci sarı və nəticədə qırmızı vərəqə göstərə biləcəyi halda bunu etmədi. Bir daha komandamızın kapitanı Rahid Əmirquliyevin də sarı vərəqəsi olduğu halda daha sonrakı epizodlarda kobudluğa və hakim qərarlarına uzun-uzadı etiraz etdiyinə görə növbəti qırmızıya səbəb olacaq ikinci sarı vərəqə mənasında susmuş oldu. Ümumilikdə komandamız dörd sarı vərəqə aldı ki, bunun da çoxu kobudluq və xüsusən də rəqibə açıq ayaqla müdaxilə səbəb oldu. Belədə baş məşqçi hakimi günahlandırmaq əvəzinə futbolçularımıza açıq ayaq məsələsində daha ehtiyatlı olmağı tapşırmalı idi. Hələ onu demirik ki, Rendal Brenes cərimə meydanında azı rəqibdən bir metrə yaxın məsafədə olarkən, penalti istəyi ilə özünü necə yıxdı və simulyasiyaya görə sarı vərəqə aldı. Bütün bunları görərək hakimə irad bildirmək ədalət prinsiplərinə sığmır və cavab görüşündə də hakimin ya Əfqan Həmzəyev və ya da Anar Salmanov olacağı ümidinə gəlmir.

Bu gün Roberto Alvijin mətbuata hakimlə bağlı açıqlamasında da bu mənada işlərin heç də obyektiv yanaşma məcrasına düşdüyündən xəbər vermir. Düzdü Alvij də təsdiq edir ki, hakim ona qırmızıya çevriləcək ikinci sarı vərəqə verməməsi düşüncəsində olub. Bunu Alvij də təsdiq edir. Amma uzağa gedərək onun hansısa epizodun əvəzini çıxmağa görə bağışladığını söyləməsi ona əsas verir ki, guya hakim FİFA və UEFA qaydaları ilə deyil, meydanda öz qanunlarını tətbiq etdiyini ona söyləyib. Bu isə heç də ağıllı məntiq deyil. Heç bir hakim meydanda qəbul olunmuş qaydalarla yox, öz istədiyi qanunlarla oyunu idarə etməsini heç kimə söyləməz. O ki, qaldı belə bir mötəbər turnirə vəsiqə almış hakim ola. Gəncdir, ilk beynəlxalq kubok yarışını idarə edir və sair kimi ittihamlar isə əsassız sayıla biləcək qədər də yersizdir. Hər halda onun kifayət qədər hakimlik təcrübəsi var və nə də onu yarışa bizim hakimlər komitəsi yollamayıb. Həm də necə deyərlər hər şey göz qabağında idi. Alvij isə niyə daxili çempionatda hamı hakim ədalətsizliklərinə qarşı danışanda susaraq indi danışır bilmək olmur.

Bütün bu dediklərimiz əstəğfürullah, heç də ruhdan salma prizmasından deyil, düzgün analiz baxımından olan iradlardır. Əgər bu nisbi sakitlik vəziyyətində bunları düzgün analiz etməyəcəyiksə və yersiz kimləri isə ittiham edəcəyiksə, onda çıxaracağımız nəticələr həlledici cavab qarşılaşmasında komandamızı uçuruma aparar. Aidiyyətli hər kəsi düzgün analiz etməyə və çatışmayan cəhətləri aradan qaldırmağa və bununla da mərhələnin yiyəsi biz olduğumuzu sübut etməyə çağırırıq. Cavab qarşılaşmasında "Xəzər Lənkəran”a uğurlar, azarkeşlərimizə də sevinc arzulayaraq, sərfəli nəticəni həyəcanla gözləyirik.