Bir az irəli gedərək, "Muğan” – "Xəzər Lənkəran”  matçından dilxor qayıtdığımız zaman radionun 101.5 fm (onu da əlavə edək ki, Bakı şəhərində bu radio, başqa tezlikdə efirdə olur) dalğasında gedən bir radio tamaşası diqqətimizi cəlb etdi. Radio teatrının lap sonlarına yaxın onu dinləmək bizə nəsib oldu. Bu radio teatrının nə demək istədiyi, "Muğan” – "Xəzər Lənkəran”  oyununda baş verənlərlə tam uyğunluq təşkil edirdi deyə, onu nəzərinizə çatdırıb, buradan öz  mövzumuza keçid alsaq elə bilirik ki, lap yerinə düşər.

          Deməli, 101.5 fm radiosunda Sərdar Əbilovun "Qul nəğməsi” adlı hekayəsi teatrlaşdırılaraq səsləndirilirdi. Təqdim olunan verilişin sonlarından belə başa düşülürdü ki, Sovet dövrünün əvvəllərində Stalin Molotovla hansısa görüşdə ona müraciət edib deyir: Yoldaş Molotov sənə bir sual versəm, mənə onun cavabını verə bilərsənmi? Molotov deyir: Buyurun yoldaş Stalin. Belə olan halda Stalin üzünü Molotova tutaraq soruşur: "Sən mənə deyə bilərsən ki, o nədir ki, dünyada adı vardır, özü yox?”  Molotov az fikirləşdikdən sonra belə cavab verir: "Bu Ədalətdir, ədalətdir, ədalət.” Stalin onun cavabından məmnunmuş kimi, bığaltı gülümsəyərək, onun sözlərini təkrar edir: "Bəli, bu ədalətdir, ədalətdir, ədalət.”

           Və beləcə veriliş də qurtarmış oldu. "Muğan” – "Xəzər Lənkəran”  oyununda da Ədaləti təmsil etmək üçün "təyin olunmuş” Anar Salmanov bu fikri bir daha təsdiq etmiş oldu. Yəni çıxan nəticə: Anar Salmanov kimi, bu matçda ədalətin adı var idi, lakin onun idarəçiliyinə əsaslanıb demək olardı ki, bu oyunda da ədalətin özü yox idi.

          "Muğan” – "Xəzər Lənkəran”  oyununda Anar Salmanovun simasında hamı belə ədalət qorumağa tüpürdü. Oyun başlayar-başlamaz "Xəzər Lənkəran”ın futbolçularına, yeri gəldi-gəlmədi sarı vərəqələrin göstərilməsi, onlara bir mesaj idi ki, cüzi başqa hərəkətə görə ikinci sarı, ardıyca qırmızı vərəqə alacaqsınız. Bu da, "Xəzər Lənkəran”lı futbolçuları oyundan qoparmaq demək idi. Onları ruhdan salmaq, mənasız ehtiyatlanma ilə oyunu başa vurmağa hesablanmışdı. "Xəzər Lənkəran”a qarşı bu təcrübədən artıq neçə illərdir ki, istifadə olunur. Yəqin Anar Salmanova tapşırıq verənlər hələ yeni metod fikirləşib tapa bilməyiblər. Axı yeni metod fikirləşib tapmaq üçün də bilik, savad olmalıdır. Bununla bitmir Anar Salmanovun oyunbazlıqları. Dediyimiz kimi, hər xırda şeyə görə oyunu saxlayır, "Xəzər Lənkəran” ın futbolçularına sarı vərəqələr göstərir. Lakin rəqib daha kobud oynasa belə, ona nəinki vərəqə göstərmir, onunla uzun-uzadı söhbət edib, oyunun vaxtını "yeyir”. Matçboyu rəqibindən üstün futbol sərgiləyən "Xəzər Lənkəran” rəqib qapısına yaxınlaşdıqda bir absurd bəhanə tapıb oyunu saxlayır. İkinci hissədə düz gözlərimiz önündə baş verən bir məqamı xatırlayaq. Komanda yoldaşından ötürmə alan Dieqo Ruis iti hərəkətlə sol cinahdan rəqibin cərimə meydançasına daxil olur və burada rəqibin iki müdafiəçisi açıq-aşkar kobudluqla hücumçumuzu yıxır, Anar Salmanovun fiti səslənir. Rəqib düşərgə belə, qapılarına penalti təyin olunacağından təəssüflənərək başlarını tutur. Amma Anar Salmanov daha bir absurd qərar verir. Guya Dieqo Ruis simulyasiya edib və onu sarı vərəqə ilə cəzalandırır.

          Daha bir epizodda hündürdən gələn topu Emeka Opara özünəməxsus tərzdə qəbul edərək, Uinston Parksı qapıçı ilə təkbətək qoyur. Bilirik ki, Uinston Parks kimi bacarıqlı və təcrübəli futbolçu bundan maksimum yararlanacaqdı. Və yenə Anar Salmanovun fiti səslənir. Guya Emeka Opara topu qəbul edərkən əllə oynayıb.

          Bu kimi nə qədər absurd qərarlar qəbul etməklə, "Xəzər Lənkəran”ı iki mühüm xaldan edən Anar Salmanov əlbəttə bu qədər səhvə yol verə bilməzdi. O, bu oyundakı idarəçiliyi ilə kiminsə tapşırıqlarını yerinə yetirdiyini aşkar sübut etmiş oldu. Bəli, keçən il Əfqan Həmzəyevi seçənlər, bu il hələki Anar Salmanovu qabağa verirlər. Burda məsələ heç də "Muğan”a xal qazandırmaq deyil. Heç "Muğan” tərəfini qınamırıq da. 

          Burda məqsəd, "Neftçi” ilə oyunöncəsi komandanı sındırmaq, çoxlu vərəqə hesabına növbəti oyunda futbolçularımızı çətin durumda qoymaq və nəhayət "Xəzər Lənkəran”dan mühüm xallar alıb onu "Neftçi”dən geriyə salmaq. Bəli, bu günün strategiyası belə idi. Çünki "Neftçi”ilə keçənilki hadisələri təkrarlamaq onlar üçün çətin olacaq. Bu matç diqqət mərkəzində olacaq deyə. Deməli "Neftçi” ilə oyunda "Xəzər Lənkəran” qalib gələcəyi təqdirdə, "Xəzər Lənkəran” üç xallıq fərq yaradaraq vahid liderə cevriləcəkdi. Ona görə də "işi” bu başdan görmək lazım idi və buna müəyyən qədər nail ola bildilər.

          Daha sonra uzatma dəqiqələri olmadan, baxmayaraq ki, kifayət qədər oyunda vaxt itkisi olmuşdu, Anar Salmanov "tapşırılan vəzifəni” yerinə yetirilmiş hesab edib həvəslə final fitini səsləndirdi. Elə bu məqamda üzərində AFFA yazılmış qara pencəkli, eyni zamanda qara eynəkli kök bir adam "Xəzər Lənkəran” azarkeşlərinə yaxınlaşaraq, barmaq silkələyə-silkələyə onları hədələməyə başladı. Bu adamın kimliyini araşdırmağı və onun qanunla belə hərəkətlərə ixtiyarının olmasını AFFA rəsmilərinə, ümumilikdə isə Anar Salmanov daxil olmaqla ona bu cür eybəcər işlərə vadar edənləri isə Allaha tapşırırıq.

            Allah həmişə ədalətin bərqərar olmasının təminatçısıdır! Allahdan qorxun cənablar!      

  P. S. Sonda bu haqq işimizdə həqiqəti öz səhifələrində işıqlandıraraq bizə dəstək olan bütün informasiya vasitələrinə təşəkkürümüzü bildiririk. Ad çəkmədən deyə bilərik ki, onların sayı kifayət qədərdir.