Dünən səhər saatlarında elektron mətbu orqanlarında "Xəzər Lənkəran”la bağlı yeni bir xəbər yayıldı. Daha doğrusu xəbər "Xəzər Lənkəran” azarkeşləri ilə bağlı idi. Xəbərdə ümumi olaraq Rusiyada konkret paytaxt Moskva şəhərində "Xəzər Lənkəran” azarkeşlərindən ibarət yeni bir fanklubun təsis olunacağı bildirilirdi. Daha sonra günorta saatlarında məsələ bir az da konkretləşərək təsis olunacaq fanklubun bədii rəhbəri və icraçı direktorunun adları, həmçinin fanklubun məramları barədə məlumatlar verildi.

            Biz "Bosman” fanklubu olaraq həmişə ölkə futbolunda baş verən müsbət yenilikləri alqışlayırıq. Mətbuatdan tanıdığımız həmçinin yeni təsis olunacaq fanklubun rəhbərliyində yer alan Vüqar Hüseynovu və Namiq Əzimovu bu münasibətlə təbrik edirik. Təbii ki, ölkə futbolunda xüsusi yeri və çəkisi olan "Xəzər Lənkəran” klubu və azarkeşləri həmişə özünəməxsusluğu ilə seçilir. Rusiyada xeyli sayda azərbaycanlıların olduğu hamımıza məlumdur. Bu insanların arasında ölkə futbolu ilə maraqlanan və "Xəzər Lənkəran”a azarkeşlik edənlərin sayının həddindən artıq olmaları isə hamımıza hələ "Xəzər Lənkəran”ın "Birlik Kuboku”ndakı zəfərləri zamanı onu dəstəkləməyə gələnlərin sayından və çılğınlıqlarından məlumdur. Buna görə də belə bir yeniliyə təbii ehtiyac olduğunu düşünürük.        Biz "Bosman” fanklubu olaraq, bu yöndə əməkdaşlığa hazır olduğumuzu bildiririk və əlbətdə "Xəzər Lənkəran” ailəsinin daha da böyüməsini hətta bu yöndə ölkə sərhədlərini də aşmasını təqdir edirik. Bu xoş yenilik baş verərsə, həmişə özünəməxsusluğu ilə seçilən "Xəzər Lənkəran” azarkeşi daha bir ilkə imza atmış olacaq. Bundan sonra da nəinki Rusiyada hətta başqa xarici ölkələrdə də bu yöndə addımlar atılmasının çox sevindirici olacağı düşüncəsindəyik. "Bosman” fanklubunun Moskva şəhərində də bir neçə nümayəndəsinin olduğunu və yeni təsis olunacaq fanklubun tədbirlərinə dost fanklubun nümayəndələri kimi qatılacağını da bəyan edirik.

            Bu məsələdə bizim mətbuatdan gileylənmək üçün bir əsasımız da var. Belə ki, yeni təsis olunacaq fanklubun rəhbərliyində yer alan Vüqar Hüseynovun fikirləri təhrif olunub. Fanklubun fəaliyyət istiqamətləri verilən xəbərdə Vüqar Hüseynov tərəfindən aşağıda təqdim edəcəyimiz kimi olsa da: "Digər fan-klublardan fərqimiz oyunlarda komandanı dəstəkləmək yox, ölkə hüdudlarından kənarda "Xəzər Lənkəran"ı təbliğ etməkdi. Həmçinin əsas vəzifələrimizdən biri "Xəzər Lənkəran"ın digər fan-klublarına maliyyə dəstəyi vermək olacaq. Hansı fan-klubun maliyyə dəstəyinə ehtiyacı olsa, "Xəzər Lənkəran"ın Moskva fan-klubu yardım göstərəcək. Bu yeganə fan-klub olacaq, Azərbaycanla heç bir əlaqəsi olmayacaq. O biri fan-klublarla yeganə əlaqəmiz yalnız onlara maliyyə dəstəyi vermək ola bilər".

            Bəzi mətbu orqanlarda bu xəbərə verilən başlıq: ""Xəzər Lənkəran"ın fan-klublarına maliyyə yardımı ediləcək” və ya "Şok! Rusiyadakı lənkəranlılar "Xəzər Lənkəran”ın fanklublarına maliyyə ayıracaq.” -kimi başlıqlarla verilib. Amma fikir müəllifi "əgər ehtiyac olarsa, maliyyə yardımı ediləcək, və ya maliyyə dəstəyi vermək ola bilər” deyib. Amma həmin başlıqları oxuyanda başqa fikir yaranır. Sanki razılaşdırılıb və maliyyə yardımı olacaq.

            Biz "Bosman” fanklubu olaraq bəyan edirik ki, təsis xərclərindən tutmuş bu günə qədərki fəaliyyətimiz dövründə hər hansı bir maliyyə və düşüncə tərzimizdə tam müstəqil fəaliyyət göstəririk. Bundan sonra da fəaliyyətimizi bu istiqamətdə davam etdirmək əzmindəyik. Biz tam müstəqil fəaliyyət göstəririk və məqsədimiz yalnız və yalnız "Xəzər Lənkəran”ın  uğurlara çatmasında öz payımızı verməkdir. Baxmayaraq ki, çıxış etdiyimiz hər hansı yazıya və ya həyata keçirdiyimiz hər hansı bir layihəyə görə bizi həm saytlarda və həm də həyatda "Bu işə görə klubdan və ya "Palsüd”dən nə qədər pul almısız”-deyə təhdid edənlər də olub. Amma hələ heç bir kəs, nə klub səviyyəsində nə də başqa səviyyələrdə bizə hər hansı maliyyə və sair yardımın edildiyini iddia edə bilməz. 

            Bir daha "Xəzər Lənkəran” ailəsinin daha da böyüməsi munasibəti ilə atılacaq bu addımı alqışlayırıq.

"Bosman” fanklubunun idarə heyəti              14 aprel 2011.