Bildiyimiz kimi dünən, 17 may tarixində Azərbaycanın futbol üzrə kubokunun finalı keçirilib. Final oyunu Bakının eyniadlı klubu ilə həmşəhərliləri "Neftçi” arasında olub. Hər iki komanda meydanda layiqincə mübarizə aparıblar. Doğurdan da "Neftçi” klubu oyunboyu rəqibin üzərinə yüklənsə də qol arayışları fayda verməyib. Buna baxmayaraq "Bakı” klubu əlinə düşən az imkanlardan ikisindən yararlanaraq, bu mövsüm, ümumilikdə isə üçüncü dəfə kuboka sahib çıxıb. Hakimin obyektiv idarəçiliyi şəraitində keçən bu oyun doğurdan da maraqlı və sürətli final oyunları sırasına daxil edilə bilər. Tribunalarda o qədər də çox olmayan azarkeş sayı isə bəlkə də son illərin ən az izləyicisi olan final oyunu olub.

Bu mənada oyun bitdikdən sonra isə alqış səslərinin və coşqunun zəif nəzərə çarpması və demək olar ki, yalnız aparıcının səsinin eşidilməsi hətta Kubokun özünü belə narahat edib. Belə ki, alqış sədaları eşitməyən Kubok öz sağlamlığından narahat olaraq həkimə müraciət etməyi qərara alıb. Bu səhər Kubokun ictimaiyyətlə əlaqələr və mətbuat xidmətinin rəhbəri Fair Playoğlu mətbuat konfransı keçirib. Onun dediklərinə görə səslərin zəif eşidilməsi cənab Kuboku narahat edib. O öz eşitmə qabiliyyətinin korlanmasından şübhələnərək bədbinliyə qapılıb. Necə olur ki, final fiti səslənir, məni hansısa komandaya təqdim edirlər və mən alqış sədalarını eşitmirəm? Deməli eşitmə sistemimdə hansısa problem var, deyən cənab Kubok sağlamlığından bədgüman oldu. Mənə sabah mütləq həkimə gedəcəyini söylədi. Elə bunun üçün də bu gün səhər saatlarında birlikdə həkimə müraciət etməli olduq. Həkim müxtəlif müayinə üsullarından istifadə edib, xeyli anamnez topladıqdan sonra cənab Kuboka bir o qədər də narahat olmamağı tövsiyyə etdi. 

Həkimin dediklərindən belə başa düşdüm ki, kubokları müxtəlif ölkələrin müxtəlif firmaları istehsal edir. İstehsal etdikləri məhsulun da hansı ölkəyə gedəcəyini nəzərə alıb onun quruluş elementlərini təyin edirlər. Bu mənada İspaniya, Almaniya, İtaliya, Türkiyə və sair bu kimi ölkələr üçün istehsal olunan kubokların qulaq pərdələri yüksək desibellərə hesablanmış materiallardan düzəldilir. Axı sadalanan ölkələrdə azarkeşlərin alqış sədaları çox yüksək olduğundan qulaq pərdələri buna dözümlü olmalıdır. Sizi istehsal edən firma isə əvvəlcədən hansı ölkəyə gedəcəyinizi və orada azarkeşlərin alqış sədalarının o qədər də yüksək olmadığını bildiklərindən, nisbətən zəif desibellərə uyğun pərdə ilə hazırlanmısınız. Belə olan halda cənab Kubok həkimə daha bir sual verdi ki, bəs keçən il mən yüksək səsləri aydın eşidirdim.

Həkim bir daha yeni üsulla müayinə etdikdə bunları dedi:-"Siz keçən il final oyunu zamanı və təqdimat vaxtı yəqin yuxarıda adlarını sadaladığım ölkələrin birində olmusunuz. Qulaq pərdənizin zədələnməsinin çapıqlaşmasından da aydın görünür ki, düz bir il əvvəl yüksək desibelli səs dalğaları pərdənizi zədələyib.” Belə olan halda cənab Kubok bir qədər fikrə getdi və keçən ilki "İnter”-"Xəzər Lənkəran” arasındakı final oyununu yadına saldı. Onda əmin oldu ki, məhz bu oyun zamanı onun qulaq pərdəsi zədələnib. Əvəzində həkimdən xahiş etdi ki, onun qulağına gələn il üçün yüksək desibellərə uyğun pərdə yerləşdirsinlər. Çünki dünyanın işini bilmək olmaz. Yenə "Xəzər Lənkəran” final oynaya bilər. Bu əməliyyatın isə təxminən bir il çəkəcəyini həkim cənab Kuboka bildirdi deyə, mətbuat xidmətinin rəhbəri Fair Playoğlu sözünü yekunlaşdırıb.