Dünyada bir çox ölkələrdə futbolun zirvəsi sayılan və derbi adlandırılan matçlar müəyyən adlar almışdır. İspaniya kimi futbol ölkəsində iki ən nəhəng və qədim klublar arasında yəni ən bahalı və iddialı olan "Barselona” və "Real” Madrid arasında keçirilən matçlar  "El Klassiko” adı almışdır. Bu həm də dünyanın bir nömrəli derbisi adını qazanmışdır. Madridin "Santyaqo Bernabeu” stadionunda aprelin 16-da keçirilən son "El Klassiko” 1:1 hesabı ilə bitsə də ilk dövrədə "Nou Kamp”da "Barselona” 5:0 hesabı ilə qalib gəlmişdi. Bununla da Maurinyolu "Real” ilk böyükhesablı və biabırçı məğlubiyyətini almışdı. 

            Ölkə çempionatında iki dəfə qarşılaşan bu komandalar, hələ bu il daha üç dəfə qarşılaşmalı olacaqlar. Bu qarşılaşmalardan biri yenə ölkə kubokunda, daha ikisi isə Avropa Çempionlar Kuboku yarışlarına belə demək mümkünsə, "El Klassiko” damğasını vuracaq. Demək olar həmişə xal ehtiyatında çox yaxın olan bu komandalar "El Klassiko”nu kim qazanırsa o da çempionluğa daha yaxın olur. Bura Avropadır, burada futbol çox inkişaf etmişdir və əlavə təsirlərdən uzaq olan futbol oyunlarına sahibdirlər.

            Başqa Avropa ölkələrinin də belə çempionata damğa vuran derbiləri var. Bizim müqayisə isə İspaniya "El Klassiko”su ilə Azərbaycanda keçirilən "Böyük Oyun” adı almış "Xəzər Lənkəran”la "Neftçi” arasında keçirilən oyundur. Əvvəla İspaniyada futbol maksimal inkişaf səviyyəsində olsa da Azərbaycanda yeni-yeni inkişafa başlayıb. Bu baxımdan bu iki ölkə çempionatlarının bu günki gününü müqayisə etmək mümkün deyil desək səhvsiz olar. Amma hər halda bəzi paralellər apara bilərik. Dediyimiz İspaniyada da ən güclü klublar, ortabablar və zəiflər mövcuddur. Bu elə bizdə də belədir. Orada "El Klassiko” çempionata öz damğasını vurursa, bizdə də bu "Böyük Oyun”la çempionat həyəcanı yaşanır. İspaniyada mərkəzi qarşılaşma olan "El Klassiko”nun bir tərəfi paytaxt Madridi təmsil edirsə, digər tərəfi başqa bir böyük region olan Kataloniyanın mərkəzi olan Barselona şəhərini təmsil edir. Amma bizdən fərqli orada "Barselona”ya əyalət klubu demirlər. Çünki söhbət futboldan gedirsə, nəinki İspaniyada hətta dünyada Barselona şəhəri əyalət yox, bir futbol məktəbi və futbol mərkəzi sayılır.

            Bizdə də "Böyük Oyun”un iştirakçı tərəflərindən biri paytaxtı təmsil edirsə, digəri olan "Xəzər Lənkəran” böyük bir regionu təmsil edir. Azərbaycan futbolu bu il 100-illiyini qeyd edirsə, bu yüzillikdə böyük payı olan Lənkəran futbolu da rəsmən 90-illiyini qeyd edir. Bu Cənub Regional Futbol Federasiyası (CRFF) tərəfindən rəsmən qeyd olunacaq tədbirlərdə öz əksini tapmış olacaq. İspaniyada olduğu kimi bir regionu təmsil edən "Barselona” futbol mərkəzi sayılırsa,  Azərbaycanın cənub regionunu təmsil edən "Xəzər Lənkəran” da böyük bir regionu təmsil etməklə ölkəmizin önəmli futbol mərkəzi sayılır. Daim iddialı olan Lənkəran təmsilçisi bu gün futbol adına yaratdığı şəraitə görə ölkənin bir nömrəsidir. Güclü və daim iddilı bir klub, gözəl stadion, baza və sair. Ən əsası isə futbolu sevən və doğma komandasına inanılmaz bağlı olan minlərlə ölçülən azarkeş kütləsi. Futbol azarkeşlər üçün oynanılır deyə bir məşhur kəlmə var. Bu kəlmə də Azərbaycanda yalnız "Xəzər Lənkəran” üçün söylənilə bilər. Çünki xüsusən ev, həmçinin səfər oyunlarını minlərlə azarkeş öz komandasının yanında olmaqla ona dəstək nümayiş etdirir. Ev oyunlarında stadionu tam doldurmaqla çılğın bir ab-hava yaradaraq sanki qədim və futbolun vətəni olan Avropada yaşadığımızı bir daha yada salır. Bunu biz demirik. Lənkəran publikası qarşısında demək olar ki, bütün yerli ya əcnəbi olsun məşqçi ya futbolçu olsun və ya hər hansı futbol mütəxəssisi olsun bu fikri dəfələrlə vurğulayıblar. Elə bu səsəbdəndir ki, futbol qurumlarımız da hətta millinin bəzi oyunlarını Lənkəran şəhərində keçirməyi planlaşdırır. Hətta ölkədə ilk olaraq millimizin Finlandiya ilə rəsmi oyununa Lənkəran şəhəri qucaq açmışdı. Bəli, millinin rəsmi oyunu paytaxtda deyil ilk olaraq Lənkəranda keçirilmişdi. Lənkəran bir futbol məktəbi və mərkəzi olmaqla ölkənin seçilən regionudur.

            Bu məsələlərə jurnalistikamız da həssas yanaşmalıdır. Yoxsa bəzən əyalət klubu və ya əyalət təmsilçisi, bölgə komandası kimi kəlmələrdən istifadə edilməzdi. Söhbət coğrafiya və ya siyasətdən deyil, futboldan gedirsə və Lənkəran ölkədə futbolun mərkəzlərindən biridirsə, onda sadəcə Lənkəran təmsilçisi və ya "Xəzər Lənkəran” kimi adlandırmaq daha məqsədəuyğundur. Məgər Türkiyədə "Beşiktaş”a, "Qalatasaray”a, "Fənərbağça”ya əyalət təmsilçiləri deyilir. Türkiyənin paytaxtı Ankara şəhərini "Ankaragücü”, Gənclərbirliyi” və sair komandalar təmsil edir. Amma bu ölkənin paytaxtı olmayan İstanbulu futboldakı inkişafına görə futbol paytaxtı adlandırmaq olar. Çünki Tütkiyədə futboldan söhbət gedirsə, ilk olaraq coğrafi və siyasi paytaxt olmayan İstanbul klubları olan "Beşiktaş”, "Qalatasaray”, "Fənərbağça”  yada düşür.

            Nə isə çox uzatmadan yenə ölkəmizə qayıdaq. Ölkəmizdə "Böyük Oyun” deyilən matçdan söz açmışdıq və İspaniyadakı "El Klassiko”nu xatırlamışdıq. Böyük region olan Kataloniyanın mərkəzi Barselona şəhərinin eyniadlı "Barselona” klubunu xatırlamışdıq.  Barselona kimi Lənkəran şəhəri də böyük bir regionun mərkəzidir. Bu mərkəzin Azərbaycan futboluna böyük ərməğanı olan "Xəzər Lənkəran” nəinki bu regionda hətta ölkənin bütün yerlərində sevilir. Azərbaycan çoxmillətli bir dövlətdir. Onun müxtəlif ərazilərində müxtəlif millətlər yaşayır. Lənkəran ərazisinin də əksəriyyətini talışlar təşkil edir. Elə talışlarda işlədilən bir kəlmə ilə mövzunu yekunlaşdırmaq istərdik.

            Talışlarda nəticəsi olmayan, effekt alınmayan bir işə, hədər oldu, hədər getdi mənasını verən bir söz var-"Hədərəko”. Məsələn, birindən soruşsan ki, filan iş necə oldu? O da sənə bu iş hədər getdi mənasını verən bir cavabı belə verəcək-hədərəko.

            Bəli, bu il "Xəzər Lənkəran” çox gözəl heyət formalaşdırdı, gözəl oyunlar keçirdi mühüm qələbələr qazandı. Lakin meydandankənar amillər öz təsirini artıq göstərir. Gözəl oyun göstər, qələbələr qazan, halal xallarını əlindən alsınlar və çempion olmağa mane olsunlar. Nəticədə əməyin hədər getsin. Talışlarda el sözü olan "Hədərəko” kəlməsi yada düşür. El hədərəko deyir. Bəli, İspaniyada "El Klassiko”, Azərbaycanda isə "El Hədərəko” deyir. Amma heç də ürək sıxmağa dəyməz, bu bizim reallıqdır. Ən əsası "El Klassiko” keçirilən Avropa futbol yarışlarına "Xəzər Lənkəran” da inşAllah vəsiqə qazanacaq. Bax onda kimin kim olduğu ortaya qoyulacaq. Rəqiblərdən və bəxt amilindən də asılı olan çox şeylər var. Amma gözəl oyunla irəli gedib, şərəflə ölkəni təmsil edəcəyimizə heç kim şübhə etməsin.