Bir həftə əvvəl futbol üzrə Azərbaycan kubokunun ½ final mərhələsinin ilk qarşılaşmasında paytxtda "Bakı” klubuna 1:0 hesabı ilə məğlub olan  "Xəzər Lənkəran”, həmin oyunda rəqib qapısı istiqamətində bir düzgün zərbə belə vura bilməməsi səbəbindən azarkeşlərini üzmüş və cütün taleyi ilə sanki barışdırmışdı. Ötən yazımızda biz demişdik ki, rəqib meydanında 1:0 lıq məğlubiyyət heç də pis nəticə sayılmamalıdır. Yetər ki, cavab qarşılaşmasında rəqib qapısı istiqamətində bir neçə zərbə vurulsun ki, bunların ikisi azarkeşləri ayağa qadırsın.

            Bəli, bu gün (artıq dünən) bu belə də oldu. Bir neçə zərbədən ikisi qol hayqıran azarkeşləri ayaq üstə durquzdu. Bununla da qapımızda top görməyincə, finala adlayan tərəf biz olduq. Özü də ölkə tarixində ilk dəfə olaraq, finala ilk adını yazdıran komanda ikinci altılıq komandası oldu. "Xəzər Lənkəran” demişkən, ölürəm də ilklər üçün.

            Əslində, "Xəzər  Lənkəran” bunu elə-belə qazanmadı. Burada təcrübəli mütəxəssis Con Toşakın, futbolçuların hər birinin, stadionun ot örtüyünü bəsləyənlərin, azarkeşlərin və sair və ilaxır xidmətləri böyükdür. Komanda olaraq "Xəzər Lənkəran” bu oyuna çox ciddi hazırlaşmışdı. Burada baş məşqçi kimi Con Benjamin Toşak, futbolçuları qələbəyə inandırmış və düzgün hazırlamışdı. Taktiki və psixoloji cəhətlər tam yarindəydi. Sağ olsun futbolçular ki, məşqçinin tapşırıqlarını heç bir kənara çıxmadan, panikaya düşmədən yerinə yetirə bildilər. Buna oyun nizam-intizamı deyilir. Əgər oyun nizam-intizamı futbolçular tərəfəindən qorunursa, orada mütləq nəticə var. Bax bu gün "Xəzər Lənkəran” kubokun finalına güclü oyun nizam-intizamı sayəsində yüksəldi.

            Bir ara hamı Toni Doblasın pis qapıçı olduğunu deyirdi. Bu oyunda bircə səhvdən başqa Toniyə irad tutmaq mümkündür? Əsla yox! Oyunçular oyun nizam-intizamına riayət edirsə, panikaya düşmürsə, müdafiə öz harmoniyasını pozmursa, orta xətt işinin öhtəsindən gəlirsə, hücumdakılar qol vurmaq üçün alışıb yanırsa, onda komandada işlər qaydasındadırsa, nə qapıçıya və nə də heç kimə əlavə yük düşməz və hər kəs öz işinin öhtəsindən bacardığı qədər gələr. O ki, qaldı Toni kimi təcrübəli qapıçıya. Gənc və yerli futbolçulara da təşəkkür etmək lazımdır. Toşak bir neçə oyun ərzində futbolçulara öz fəlsəfəsini aşılaya bilib ki, bu da bu oyunda hiss olunmağa başladı. Ancaq öz aramızdır oyunun son 10 dəqiqəsinə fikir verdinizsə, "Xəzər Lənkəran” irəlidə olmasına baxmayaraq, lap Rednikin dövründəki oyunu hardasa, xatırlatdı. Görəsən digər finalçının baş məşqçisi, Toşakın da oyun nizam-intizamımı arı yuvasına dürtülən çöpə bənzədəcəkmi?

Mirhafiz Babayev