Qış fasiləsində komandamıza qoşulan və baxışdan uğurla keçən Hristu Romana Kyaku və Nikulae Konstantin Muşatın klubumuzda çıxış etmələri rəsmiləşib. Onlarla müvafiq olaraq 1 illik müqavilələr imzalanıb. Hücumameylli yarımmüdafiəçi olan 24 yaşlı Kyaku komandamıza Buxarest "Dinamo”sundan qoşulsa da, son iki ili digər Rumıniya klubu "Timişoara"nın heyətində icarədə keçirib. Futbolçu vaxtilə ölkəsinin 21 yaşlılardan ibarət milli yığmasına da çağırılıb və onun heyətində 3 qola imza atıb. Ölkəsinin müxtəlif klublarından əlavə Polşanın "Visla”sının da şərəfini qorumuş Kyaku üçün "Xəzər Lənkəran” çıxış etdiyi ikinci xarici komandadır.
Ötən ilin dekabrında 24 yaşı tamam olan Muşat isə sol cinah yarımmüdafiəçisidir. Yeni futbolçumuz Rumıniyanın "Dinamo” Buxarest klubunun yetirməsidir və komandamıza məhz oradan gəlib. Nikolae karyerası ərzində icarə əsasında müxtəlif Rumıniya klublarının da formasını geyinib ki, bunlardan "Universitatya" Kluj və "Unirea"nı qeyd etmək olar. Mənbə: "Lankaranfc.com"
|