Dünən Avropa turnirlərində dörd komanda ilə təmsil olunduqdan sonra Çempionlar Liqasında mübarizə aparan yeganə təmsilçimiz "Neftçi”, İsrailə səfərində fiasko ilə üzləşdi. Əzəli rəqibimiz olsa da beynəlxalq turnirlərdə ölkəmizi təmsil etdiyindən əlbətdə bir Azərbaycan futbolunun azarkeşləri kimi bizi də məyus etdi. Etdiyi transferlərə və ümumiyyətlə heyətə görə bu heç də belə olmamalı idi. Hər halda Azəırbaycanın klub futbol reytinqinə daha müsbət xallar yazdırmalı olan heyət 4:0 məğlub olunca, hələ çox düşünməli məsələlər olduğu haqda böyük bir mesaj verdi. Buna sevinənlər də ola bilər, böyük ölçüdə kədərlənənlər də. Axı bu ölkə futbolunun adı ilə bağlıdır. Ölkə futbolunda isə çox şeyin yerində və qaydasında olmadığı bu Avropa kubokları ərəfəsində bir daha göründü. Nə isə yeganə təmsilçimiz "Neftçi”yə sadəcə cavab oyununda uğur arzulamaqdan başqa çarə qalmadı. Oyundan sonrakı mətbuat konfransında da bu təslimçilik, bəlkə də real yanaşma, baş məşqçi əvəzləyicisi Tərlan Əhmədovun "cavab oyununda yalnız imicimiz üçün vuruşacağıq”, sözlərindən aydın görünür. 

Bizcə bu məğlubiyyət Azərbaycan futbolunun məğlubiyyətidir. Buna sevinmək isə başadüşülən deyil. Cari mövsümün hazırlıqlarını klub olaraq "Neftçi” heç də pis dəyərləndirməmişdi. Əslində futbolçular və transferlər yox, oyunu məşqçi uduzdu.     Futbolçular heç də potensial imkanlarının yarısını belə meydanda qoya bilmədi. Bu isə o deməkdir ki, taktiki və digər göstəricilərə cavabdeh olan məşqçi işi çox aşağı səviyyədə idi. Tərlan Əhmədovu da təcrübəsizdir deyə qınamaq olmur. Bu bir daha göstərdi ki, Azərbaycanda Avropa yarışlarında ümidverici mübarizə apara bilən nə məşqçi və nə də futbolçu yoxdur. Bəziləri «Hapoel»i «Lex»lə müqayisə edirlər. Xeyir, bu müqayisə bizcə düzgün deyil. Çünki «Lex» oyunundan da göründüyü kimi tarixinin ən zəif çağlarını yaşayır. Bunu onun növbəti oyunlarında yəqin ki, görəcəyik. Fikrimizcə, «Hapoel»i keçənilki həmyerliləri Təl-Əviv «Makkabi»si ilə müqayisə etmək olar. Yaxın oyun stili və güclü-istəkli komanda. Bir daha yada salmalıyıq ki, «Xəzər Lənkəran», «Makkabi» ilə başa-baş mübarizə aparsa da yerli və milli oyunçularımızın «səhvindən» üç qol yedi. Əgər o qolların heç olmasa, ikisini yerlilərimiz bizə «hədiyyə» etməsəydilər onda hesab 1:1 olardı və evdəki 0:0 hesabı da güclü «Makkabi» qarşısında mərhələ adlamağımızı şərtləndirərdi. Bugünki «Hapoel» dünənki «Makkabi» idi. Lakin bir fərq vardı. «Makkabi»yə qarşı Güclü «Xəzər Lənkəran» və güclü məşqçilər korpusu, başda Mirça Rednik olmaqla və əməllərinə ad qoya bilmədiyimiz yerli-milli futbolçular. «Neftçi»də isə güclü heyət, xəyanətkarlıq elementlərinin yoxluğu, amma məşqçi işinin olmaması. Biz Aərbaycanı seviririk. Amma bu o demək deyil ki, uyğun gəldi gəlmədi yerli yararsız kadrlara güvənməliyik. Qoy bizim kadrlar Rednik kimi mütəxəssislərin köməkçiləri işləsinlər, öyrənsinlər. Yalnız belə halda özünü doğruldanlar müstəqil fəaliyyətə başlaya bilərlər. Bunun üçün bizdə kadrlar yox deyil. Yalnız düzgün istiqamətləndirmək lazımdır. İndi bəzi yazarlara və işinin öhtəsindən gələ bilməyən klub başbilənləri və futbol başbilənlərinə yəqin ki, çox şey aydın olacaq. Amma heyif ki, futbolu mütəxəssiscəsinə düşünənlərimiz yoxdu. Əgər «Neftçi»nin bu heyətinin başında Rednik kimi bir mütəxəssis olsaydı, onda «Hapoel» indiki «Neftçi»nin vəziyyəti ilə üzləşərdi. Yəni, ikinci oyun formallıq daşıyardı. Niyə və nədən bizimkilər bunları anlamaq istəmirlər? Futbola yalnız futbol gözü ilə baxmaq lazımdır. Yoxsa öz iddialarını reallaşdırmaq üçün, nəyin bahasına olursa, olsunla yox! Tərlan Əhmədov da gənc bir mütəxəssis kimi bu oyunla sına bilər. Amma onu sındırmaq lazım deyildi. O Rednik kimi bir mütəxəssisin tələbəsi kimi qələbə sevinci yaşasaydı, bu onun karyerasında daha inamlı gələcək vəd edərdi.

Sovet futbolu parlaq tarixə malikdir. Bu məktəbin yerli yetirmələri az-çox özlərini doğrulda bilib. Amma ondan sonra hansı vəziyyətlə üzləşdiyimizi dünənki oyun, bir daha göstərdi. Futbolun böyük məktəbləri indi də var. O məktəblərə «qaraçı» deməklə iş bitmir. O «qaraçılardan» hələ çox şey öyrənməliyik. Onlara «qaraçı» kimi baxanların özlərinin nə olması maraqlıdır.

Bu arada "Anderlext" "Ekranas"ı 5:0 yendisə, Türkiyə divlərindən biri kimi baxdığımız "Fənərbağça" öz meydanında Rumıniya "Vaslui"sinə məğlubiyyətdən güclə canını qurtardı-1:1. Digər Rumıniya təmsilçisi olan "CFR" Cluj isə ilk oyunda, "Liberec" üzərində qələbə qazandı-1:0.

Yenə daxili çempionat başlamaq ərəfəsində, yenə didişmələr, yenə yazarların müxtəlif komanda azarkeşlərini qarşı-qarşıya qoyması üçün dəridən-qabıqdan çıxma cəhdləri və yenə çempionatın iddiaları üçün çürük cəhdlər...