"Həsən bəy Zərdabi” mükafatı haqqında

"Həsən bəy Zərdabi” mükafatı 1990-ci ildə Azərbaycan Jurnalistlər Birliyinin mərhum sədri tanınmış jurnalist Hacı Hacıyevin təşəbbüsü ilə təsis edilib.

Onun vəfatından sonra Jurnalistlər Birliyinə sədrlik edən Elçin Şıxlinski bu ənənəni davam etdirərək hər il Milli Mətbuat Günü ərəfəsində "Həsən bəy Zərdabi” mükafatının qaliblərini elan edir.

Bu nüfuzlu mükafat hər il müxtəlif nominasiyalar üzrə fərqlənən 5-6 jurnalistlərə və mətbuatla bağlı araşdırma aparan alimlərə təqdim olunur.

"Həsən bəy Zərdabi” mükafatının bu ilki qalibləri arasında "Spase” kanalının keçmiş rəhbəri, Bakı Slavyan Universitetinin kafedra müdiri, Televiziya Akademiyasının rəhbəri  Etibar Babayev, Bakı Dövlət Universitetinin müəllimi "İslam dini və Kütləvi İnformasiya Vasitələri” monoqrafiyasının müəllifi Qəmər xanım Cavadlı, "Azadlıq” radiosunun əməkdaşı Xədicə İsmayılova,  İctimai Televiziyanın əməkdaşı Səidə İbrahimli, "Yeni Müsavat” qəzetinin müxbiri Sevinc Telmanqızı, ATV-də yayımlanan "22-ci saat” tok-şousunun müəllifi və aparıcısı Emin Musəvi və Etibar Cəbrayıloğlu var.  Etibar Cəbrayıloğlu bu mükafata "Ədalət” qəzetində çap etdirdiyi publisistik yazılarına görə layiq görülüb.

Hamınıza məlum olduğu kimi Etibar bəy ictimai işlərdə də fəallığından qalmır. Onun idmana və xüsusən də onun şahı adlandırılan futbola böyük azarkeş sevgisi var, özü də bu növdə ölkəmizi, o cümlədən doğma şəhərimizi təmsil edən "Xəzər Lənkəran” kimi bir komandası varsa. Lənkəranda doğulub boya-başa çatmış bir ziyalı kimi "Xəzər Lənkəran” onun üçün böyük bir sevgi mücəssəməsidir. Təbii ki, ölkə idmanının inkişafı Etibar bəy kimi ziyalıları daim düşündürür. Bütün idman növlərində Azərbaycanın bayrağını uca edənlərin arasında o həm də Lənkəran təmsilçilərini görərkən nə qədər sevinirsə, bir anlıq sanki özünü belə unudur. Məhz futbola və elinə bağlılığı onu da bir çox ziyalılarımız kimi "Bosman” fanklubuna gətirmişdir. Etibar bəyin fanklubumuzun işində fəal iştirakı və gənclərə nümunə olması xüsusi qeyd olunmalıdır. Bir ziyalı kimi, gözəl jurnalist bacarığı, gözəl dost və insan, dəyərli bir Azərbaycan ailəsinin başçısı kimi isə Etibar bəy əsl nümunə olacaq bir şəxsdir. Elə bir neçə Azərbaycanın tanınmış şəxslərinin layiq görüldüyü mükafatla onun da təltif olunması bunun bir göstəricisidir.

Böyük "Xəzər Lənkəran” ailəsinin ayrılmaz bir hissəsi olan "Bosman” fanklubu adından Etibar Cəbrayıloğlunu "Həsən bəy Zərdabi” mükafatının qalibləri sırasına qoşulması münasibəti ilə təbrik edir, ona can sağlığı və zirvəsi sonsuzluğa qədər uzanan peşəsi sahəsində uğurlar arzu edirik.

"Bosman” fanklubu                     23 İyul 2012