Höhmətli "Xəzər Lənkəran” azarkeşləri! Son günlər yenə komandamızla bağlı müəyyən söz-söhbətlərin şahidi oluruq. Əslində bu söz-söhbətlərlərin elə də böyük bir əsası yoxdur. Bildiyiniz kimi bütün bunlara səbəb komandamızın qapıçısı Kamran Ağayevin "Bakı” klubu ilə son çempionat oyununda buraxdığı bir səhv səbəb olmuşdur. Bu barədə "Bosman” fanklubunun həmin oyunla bağlı gedən, "Əlindən nə gəldi eylədi Parks, Görəsən "Xəzər”ə neylədi Parks?” yazısında münasibət bildirilmişdi və orada göstərilən epizod Kamran Ağayevin səhvi kimi qiymətləndirilmişdi. Bu səhvə iki prizmadan yanaşılmışdı: Birincisi ona görə ki, qaydalara görə öz futbolçu yoldaşından ötürmə alan qapıçı topu ələ götürə bilməz deyə, onu vaxtında uzaqlaşdırmağa borcludur. İkincisi isə azı 5-6 metr uzaqda olan rəqib futbolçunu gözləyərək onu aldatmağın adını nə qoymaq olar? Özü də bu Uinston Parks kimi qol vurmaq üçün alışıb-yanan bir futbolçu ola. Epizoddan qabaq onunla uzun müddət bir yerdə oynamış Kamran Ağayev bilməli idi ki, ikili mübarizələrdə demək olar həmişə qalib çıxan Parksla belə zarafat etmək olmaz! Olmadı da.  5-6 metr uzaqlıqdan özünü topa çatdıran Kosta-Rikalı, Kamranın bu hərəkətini ona bağışlamadı."

            Gördüyünüz kimi qələbə ab-havası ilə gedən oyun sonda bərabərliklə bitdi və göstərilən yazıda qeyd olunduğu kimi "Xəzər Lənkəran” iki xal itirib, bir xal qazana bildi. Bəli, bu komandamızı daha iki xaldan məhrum edən Kamranın şıltaqlığı idi. Amma diqqətlə fikir versək, qənaətimizcə burada Kamran Ağayevin məqsədi komandanı pis vəziyyətdə qoymaq deyildi. Buraxılan qoldan sonra onun necə pərt vəziyyətə düşməsi də buna əyani sübutdur. Əslində onun bu hərəkəti komandamızdan ayrılaraq rəqib düşərgəyə keçmiş Uinston Parksı şirnikləndirib, topa tərəf qaçmasını və sonda onu aldadaraq topu uzaqlaşdırmaqla onu bir növ "sındırmaq”,  pis vəziyyətə salmaq istəyi sonda çox təəssüf ki, əks nəticə vermiş oldu. Bununla da hesabda öndə olan komandamız arzuolumaz vəziyyətlə üzləşib, hətta hesabda geri də düşdü. Lakin komanda yoldaşları hesabın bərabərləşməsinə nail olaraq, bir növ Kamrana dəstək ola bildilər və komandamızı məğlubiyyətdən xilas etdilər. Oyunun sonunda Kamran Ağayevin ikinci qolumuzu vuraraq hesabı bərabərləşdirən Dejan Rusiçə necə minnətdarlıq etməsini indi də videoyazılardan izləmək mümkündür. Bu kiməsə yaxşılıq etmək istərkən tam əks nəticənin yaranması kimi bir şeydir və heç də xəyanət kimi qiymətləndirilməməlidir. Biz Kamranın bu hərəkətini əlbətdə alqışlamırıq. Bu hər bir futbolçunun başına gələ bilməsi mümkün olan arzuolunmaz bir halldır. Buna səhlənkəarlıq demək mümkündür və belə səhlənkarlıqların məşqçi və klub rəhbərliyinin birgə qərarı ilə ya tənbeh, ya para cəzası və ya başqa bir tədbirlə cəzalandırılması mümkündür ki, bu da dediyimiz kimi baş məşqçi və klub rəhbərliyinin ixtiyarında olan bir məsələdir.

            Lakin deyəsən, "Xəzər Ləınkəran”ın turnir cədvəlinin şəriksiz lideri olması kimləri isə narahat edir və bu məqamdan istifadə edib komanda daxilində, həmçinin azarkeşlərlə komanda arasında olan normal ab-havanı korlamaq və bununla da komandanı zəif salmaq istəyirlər. Belə qüvvələr bilməlidirlər ki, heç bir pozuculuq fəaliyyətləri ilə buna nail ola bilməyəcəklər. Yadımıza avrokuboklardakı son məğlubiyyətdən sonra komandada yaranmış böhran vəziyyətini və bütövlükdə azarkeşlər, baş məşqçi Mirça Rednik və klub rəhbərliyinin addımlarından sonra bu böhrandan necə çıxdığımızı salsaq, onda mətbuatda müxtəlif cür pozucu informasiyalar yayan və hətta başqa addımlar atmaq niyyətini bəyan edən qüvvələrin komandadakı birliyi heç cür poza bilməyəcəklərini deyə bilərik. "Xəzər Lənkəran” bütöv bir ailədir, getdikcə daha gözəl oyun sərgiləməkdədir və bütün bunlara görə də turnir cədvəlinin lideridir. Azarkeşlərimiz komandanı daim dəstəkləyir və uğurlarına sevinir. Belə olan halda hansı məntiqlə komandadan kimi isə xaric etmək və ya istefaya səsləmək kimi yanlış fikirlər düşünmək olar?

            Biz "Bosman” fanklubu olaraq yuxarıda göstərdiyimiz faktı futbolda rast gəlinən arzuolunmaz hal kimi qiymətləndirir və bunu böyük problem kimi qabartmaqla komandada normal ab-havanı korlamaq istəyənlərin buna yönəlik bütün hərəkətlərini pisləyirik.

            "Xəzər Lənkəran” ölkədə özünəməxsus yeniliklər etməkdə daim davam edən və bu gün turnir cədvəlinin lideri olan bir komandadır. Əlbəttə sadiq azarkeşlərimiz hər şeyi düzgün qiymətləndirməyi bacarır və heç bir fitnə-fəsada uyacaq qədər də sadəlövh deyildirlər. Biz komandamızı çempion görməyə hazırlaşarkən yalnız irəli getməyi düşünürük.

"Bosman” fanklubunun idarə heyəti            26 Oktyabr 2011.