Bildiyimiz kimi cari Avrokubok mövsümü start ərəfəsindədir. Bu il UEFA-nın mənzil qərargahında bu məqsədlə çəkilən püşk doğma "Xəzər Lənkəran” komandasına əvvəlki bəzi mövsümlərdə olduğu kimi qorxulu rəqib vermədi. Rəqibimiz Estoniyanın paytaxtı olan Tallinin təmsilçisi "Nomme Kalyu” komandasıdır. Bu nə "Dinamo” Zaqrebdir,  hələki nə Poznan "Lex”idir, nə Təl-Əviv "Makkabi”sidir. Heç "Real” və ya "Barselona” da deyil. Sadəcə, "Nomme Kalyu”dur. Bütün bunları deməklə, biz rəqibi heç də kiçiltmirik, əksinə onlara hörmətlə yanaşmağın tərəfdarıyıq. Hörmətlə yanaşıb, rəqibi saymaq və onunla matça məsuliyyətlə çıxmaq əlbəttə bizim qələbəmizin açarıdır. Sadəcə onu demək istəyirik ki, müasir futbolda klublar reytinqlərinə görə bölünür. Kimi artıq qrup mərhələsində digər rəqiblərini gözləyir, kimi iknci təsnifat mərhələsində birinci mərhələdən gələcək olan rəqibini gözləyir, kimi də qrup mərhələsinin qapısı ağzında dayanıb əvvəlki mərhələlərdən üzü ağ çıxanları gözləməkdədir. Hələ ”səpələnmişlər” və "səpələnməmişlər” olaraq aşağı reytinq göstəricilərinə malik olanları da bilirik. Məhz bu baxımdan "Nomme Kalyu”nu münasib saymaq olar. Elə bir mövsüm əvvəlki Moldova "Olimpiya”sı da dişimizə görə rəqib idi. Amma klubumuzun rəqibə ciddi yanaşmaması üzündən dişimiz ona batmadı. Bu fürsəti isə əldən buraxmamalıyıq.

            Əlbəttə klub rəhbərliyinin bu mənada öz işi var, məşqçilər və futbolçular da yaxşı hazırlaşıb oyuna inamla çıxıb cütün taleyini bizim xeyrimizə həll etməyə borcludurlar. Azarkeşlər olaraq da biz üzərimizə düşəni etməliyik ki, sonda sevinən tərəf olaq. Yəni qələbənin açarını əlimizdə saxlamalıyıq. İlk oyun doğma meydanda keçirilirsə, bunun məsuliyyəti daha böyükdür. Çünki o qədər də bələd olmadığın komanda ilə ilk səfər oyununda sadəcə nəticəyə oynamaqla, həm də rəqiblə meydanda tanış olursan və güclü-zəif cəhətlərini öyrəndikdən sonra doğma meydanda artıq tanış rəqibi çökdürməyə əlində elmi-taktiki əsaslar olmuş olur.

            Bu dəyərlərdən dediyimiz kimi bütün camiənin üzərinə düşən məsuliyyət var. Biz azarkeşlər isə nələri nəzərə almalı olduğumuzu bilməliyik. Belə ki, ilk oyunumuz evdə olduğundan vəziyyəti ona uyğun da təhlil etməliyik. Rəqib Estoniya təmsilçisidir və fikir verdiyimiz qədərincə Estoniya, ümumiyyətlə baltik ölkələrindəki klubların stadionlarının azarkeş tutumu azdır. Rəqibimiz olan "Nomme Kalyu”ya məxsus olan "Hiyu” stadionunun tutumu cəmi 500 nəfərdir. Yəqin ki, məhz bu səbəbdən onlar öz ev oyunlarını bu stadionda deyil, digər paytaxt təımsilçisi "Levadiya”nın "Kadrioru Stadium”  arenasında keçirəcəklər. Amma diqqət yetirsək bu arenanın da tutumu cəmi 4.750 nəfərdir. Stadionların quruluşuna da nəzər yetirdikdə görürük ki, azarkeş tribunaları dövrələmə bütün meydanı əhatə etməyir və meydanın ya bir tərəfini və ya "L”-ə bənzər formada iki tərəfini əhatə edir. Onu da nəzərə alsaq ki, bu komanda Avropa yarışlarında heç vaxt uzağa getməyib, yəni böyük əhatəli stadionlarda rəsmi oyun praktikasından məhrumdur, onda "Fırtınalar Meydanı”nın bu mənada möhtəşəmliyi elə ilk nüans kimi onları çaşdıra bilər. Bir tərəfdən gələn, cəmi 500 insan səsinə öyrəşmiş bir komanda, dövrələmə gələn 15.000 insanın səsindən əlbəttə əl-ayaq əsdirməlidir. Bu elə ilk psixoloji təzyiq vasitəsidir ki, rəqibin oyununda çaşqınlıq və pərakəndəlik yaratsın. Bu qədər insan, yəni azarkeş əhatəsində oynamaq xüsusən bu cəhətdən kasıb "Nomme Kalyu” üçün heç də asan olmayacaq. Hələ onu demirik ki, azarkeşlərimizin çılğıncasına komandamıza dəstək zamanı yaratdığı hay-küy rəqibi pozma effektini bir neçə qat da artıra bilər.

            Bunun üçün bütün bunları nəzərə alaraq azarkeşlərimizi tribunaları tam dolduraraq, 90 dəqiqə ərzində komandamıza güclü dəstək vermələrini rica edirik. Biz meydana çıxıb oyun oynamırıq, sadəcə meydanda olan rəqibi basqı altında saxlayır və bundan istifadə edəcək futbolçularımıza ruh vermiş oluruq ki, bununla da komandamız daha da ruhlanaraq rəqibin qapısını təzyiq altında saxlayır və İnşAllah lazım olan qolları da vura bilir.

            "Bosman” fanklubu olaraq bu dəstəkdə öz rolumuzu başa düşür və əlimizdən gələni edəcəyik ki, "Xəzər Lənkəran” lazımi nəticəni əldə edə bilsin. İyulun 5-də biz döyüşə çıxırıq. Artıq döyüşə hazırlıq səviyyəsini fikirləşmək zamanı demək olar ki, arxada qalıb. Hamımız birlikdə döyüşdən necə qalib ayrılmalı olduğumuzu düşünməliyik. Bu qalibiyyət bizimdir deyə birgə də mübarizəyə atılmalıyıq.