Bildiyimiz kimi futbolun vətəni olan Avropa qitəsində milli çempionatlar başa çatmaq üzrədir. Artıq bəzi ölkələrin çempion komandaları bəlli olub. Digər ölkələrdə də irəlidəki bir neçə həftədə buna aydınlıq gələcək. Bundan sonra isə ölkələrin futbol reytinqinə görə müəyyən komandalar Avropa Çempionlar Liqasına (ÇL) və Avropa Liqasına (AL) vəsiqələrini təmin etmiş olacaqlar. Avropanın ən nüfuzlu turniri sayılan ÇL-na vəsiqə qazanan komandanın kimliyinə Azərbaycanda artıq sona üç tur qalmış aydınlıq gəlib. Bu nə qədər təəccüblü olsa da Avropada birinci göstəricidir. Avropa nəhəngləri belə çempion titulunu sona üç tur qalmış təmin edə bilmədilər.

AL-na Azərbaycandan qoşulacaq üç komandanın ikisi artıq bəllidir. Beləliklə, "Neftçi”nin sona üç tur qalmış ÇL-na gedəcəyi, "Xəzər Lənkəran” və "Qarabağ” klubları isə AL-na gedəcəyi bəlli oldu. AL-ya sonuncu vəsiqənin kimin əldə edəcəyinə isə sonuncu turda və ya kubokun finalından sonra aydınlıq gələcək. Bu da ya Bakının "İnter” ya da həmşəhərliləri olan "AZAL” komandalarından birinə qismət olacaq.

Artıq XXXI turda qitənin ən nüfuzlu turniri olan ÇL-ə gedən komandası ilə, nisbətən zəif sayılan AL-ya gedən komandaları arasında oyun keçirildi. Ölkənin ən güclüsü nisbətən zəif klubuna əslində ya qalib gəlməli, ya da meydandan sülhlə ayrılmalı idi. Nəinki biabırçı darmadağın hesabı ilə ÇL-in başını aşağı etməli idi. Lakin bu mövsüm haqqında çox danışılan çempionluğun şübhəli olması burda da göründü. Əslində mövsüm başlayandan çempionun bəlli olması haqqında şübhələr özünü doğrultmaqdadır. Belədə ilk pillənin kiməsə bağışlanması, əslində ikinci və ya üçüncü yeri tutan komandanın daha layiqli olması anlamına gəlir. Bu baxımdan XXXI tur öz damğasını vurmuş oldu. AL-ya gedəcəyi bəlli olan "Qarabağ” komandası, ÇL-a gedən "Neftçi” komandası üzərindəki 3:0-lıq hökmlü qələbəsi ilə daha güclü olduğunu sübut etmiş oldu. O cümlədən "Xəzər Lənkəran” doğma meydanda "Bakı” üzərindəki qələbəsi ilə də çox şeyləri sübuta yetirdi.

Əvvəlki yazılarımızın birində, "Müjdə: Azərbaycana ədalətli hakimlik gəlir” başlığı ilə çıxış etmişdik. Sona üç tur qalmış futbol qurumlarımızın artıq istəklərinə çatdığını göstərərək yerdə qalan son üç turda ölkədə normal hakimlik görəcəyimizi bildirmişdik. Düzdü bura kubok oyunlarını daxil etməmişdik. ½ final oyununun cavab matçında "Bakı” ilə "Xəzər Lənkəran” arasındakı oyundakı hakimlik fikrimizi bir daha təsdiq etmiş oldu. Keçək geridə qalan XXX və XXXI turun oyunlarındakı hakimliyə. Burada da dediklərimiz öz təsdiqini tapmış oldu. "Xəzər Lənkəran”ın  "Bakı” ilə son səfər oyununda Emeka Oparanın qaydalar çərçivəsində vurduğu qol hesablanmayınca daha iki xal itirmiş olduq. Hakimlərin bu qolu saymaması bir daha komandamızı ilk pillədən uzaq salmaq istəklərinin olduğunu göstərən fakt idi. Tək bu oyunda deyil, müxtəlif oyunlarda ən azı 9-xalımızı yeyən hakimlərin hələ udqunmamış niyyətləri bəlli oldu. Həmin ardıcıllıq davam etsə idi bizim XXXI turda "Bakı”nın qapısına vurduğumuz iki qol da sayılmayacaq və yenə iki xal itirəcəkdik ki, ilk pilləyə yaxınlaşmayaq. Artıq bu aktuallığını itirdiyindən əvvəlki kimi qaydalar çərçivəsində vurulan qollar, lakin əvvəlkindən fərqli olaraq bu vurulmuş qolların sayılması nəhayət ölkə çempionatında "Bakı” üzərində üç heç-heçədən sonra qələbəmizin qeydə alınmasına səbəb oldu. Bununla da "Bakı”nı kubokdan kənarlaşdırmaqla və sonuncu çempionat oyunundakı 2:0-lıq qələbə ilə, əvvəllər çıxış etdiyimiz "Qisas məhşərəmi qalacaq?” sualı həllini tapmış oldu.

Hakimlikdən söz açdıq.  XXX tur oyunları haqqında təqdim etdiyimiz yazıda normal hakimlik haqqında fikirlərimizi də bildirmiş və yuxarıda bir daha xatırlatdığımız baxımdan bunun öz təsdiqini tapdığını göstərmişdik. Bu elə XXXI turda da istisna olmadı. Futbol qurumları əsasən hakimlərin əli ilə istəklərinə çatdığından bu turda gözlənilməz hadisə baş verdi desək yanılmarıq. Belə ki, "Qarabağ” – "Neftçi” görüşündə "xüsusi xidmətləri” ilə tanınan baş hakim Elçin Məmmədov hesabın 2:0 olmasına baxmayaraq nə qədər təəccüblü olsa da "Neftçi”nin qapısına penalti təyin etdi. Məhz bu penaltidən sonra hesab darmadağın həddinə çatdı və Georgi Adamiya bununla bu oyunda het-trik etməklə bombardirlər yarışında çempionun fəxr etdiyi Bahodiri də arxada qoydu. Beləliklə, "cücəni payızda sayarlar” fikri ilə eynilik təşkil edən ən güclümüz Avrokuboklarda bilinəcək fikrinə müəyyən mənada aydınlıq gəldi. Son XXXII turda "Xəzər Lənkəran” rəqib meydanında "Neftçi”ni məğlub edəcəyi təqdirdə bu tam təsdiqini tapmış olacaq. Lakin bu oyunda baş məşqçimiz Mirça Rednikin dediyi kimi "Şərəf” məsələsi olduğundan, futbol qurumlarımızın yenə də hakim əli ilə nələrsə edəcəyi indidən şübhə doğurmur.