Bu gün "Xəzər Lənkəran” və Mirça Rednik mövzusu gündəmi elə zəbt etmişdi ki, bizim də saytımızda bunu ardıcıl olaraq işıqlandırmamız sanki gecikirdi. Bu gecikmənin əsas səbəbi isə bizim bilavasitə bu işlərlə əlaqədar məşğul olmamızla bağlı idi. Axşam saatlarına yaxın Mirça Rednikin klub prezidenti Mais Mənsimovla görüşəcəyi və yalnız bundan sonra bu işin taleyinə aydınlıq gələcəyi məsələsi var idi. Səbirsizliklə gözlədiyimiz bu danışıqların nəticəsi yenə də yekunlaşmamış qaldıqda, bütün "Xəzər Lənkəran” azarkeşləri kimi bizi də bərk narahat etməyə başladı. Yayılan xəbərlərə görə Mirça Rednikin konkret cavabını səhər saatlarında klub rəhbərliyinə bildirəcəyi qeyd olunurdu. Lakin, səhər saatlarını gözləyərək bu intizarın dözülməz olduğu məqamda biz Mirça Redniklə görüşmək və ondan yalnız və yalnız bütün azarkeşlərin istəyinə uyğun olaraq "hə” cavabını gözlədiyimizə onu inandırmağa çalışmaq istəyirdik. Bunun üçün Cənab Rednikə telefon edərək onunla görüşmək istəyimizi çatdırdıq. Lakin, Cənab Rednik hər hansı mühüm bir tədbirdə olacağını əsas gətirərək görüşün baş tuta biləcəyinə söz vermədi.

Onun danışıq tərzindən və yüksək mədəniyyətə malik bir insan olduğunu bilərək belə cavab verdiyi vurğulanmalıdır. Əslində məsələnin əsas mahiyyəti, məşqçilər korpusu ilə tam qərara gəlməmiş bizə bir söz deyə bilməyəcəyi anlamında idi. Buna baxmayaraq onun səhər hansı qərar verəcəyi əlbəttə bizi bərk narahat edirdi. Belə olduqda biz aşağıdakı mətnin ingilis variantında ona telefon mesajı yollamağı qərara aldıq :

"Bizimlə görüşmək istəməməyinizin səbəbi məsələni ətrafinızdakılarla yəqin ki, aydınlaşdırmamağınızdır. Bizə çatan bilgilərə görə guya, klub
rəhbərliyi sizin bütün dediklərinizi qəbul edir və yalnız siz
məsələnin həllini səhərə (sabaha) saxlamısınız. Amma, siz "Xəzər
Lənkəran”  azarkeşinin kim olduğunu, sizin şəxsiyyətinizə və böyük
mütəxəssis olduğunuza görə necə sevdiyini yaxşı bilirsiniz. Çünki bu
sizin başçılığınızla keçirilən matçlarda stadionu tam dolduran bütöv
azarkeşlərin çılğın istəyidir. Sizdən sonra bu möhtəşəm azarkeşlərin
"Xəzər Lənkəran”ı itirəcəyi qorxusu var. Canımız qədər sevdiyimiz
komandanı əlimizdən almayın. Çünki sizin gedişiniz bizim "Xəzər Lənkəran”ı itirəcəyimizə bərabər olan bir şeydir. Qərar verərkən
onminlərlə azarkeşin ürəyini öz sinənizdə hiss edin. Xahiş edirik bizi qırmayın.”

Bundan bir qədər sonra həyəcanla gözlədiyimiz anlarda Mirça Rednikin telefonundan fan klubumuzun rəhbəri Mirhafiz Babayevin mobil telefonuna zəng gəldi... Bəli, bu Mirça Rednik idi. Son günlərin hər bir "Xəzər Lənkəran” azarkeşinin intizarla gözlədiyi suala o telefonda münasibətini belə bildirdi : "Mən, sizlərə çox bağlıyam. Komandada qalıb-qalmayacağım haqqında son qərarımı verərkən yenə də sizləri düşündüm və artıq sabahı gözləmədən sizinlə birgəyəm deyirəm”. Mirça Rednikin bu xəbərini eşidən fan klub üzvlərimizin əl çalaraq alqış sədaları otağı bürüdü. Bunu  eşidən baş məşqçi bir daha narahat olmayın biz birlikdəyik dedi.

Bütün bu gərginliyin belə xoşluqla nəticələnməsinə görə bütün "Xəzər Lənkəran” azarkeşlərini təbrik edirik. Onlara sevimli komandaları ilə bundan sonra da daha böyük zirvələri fəth etməyi arzulayırıq.