Dünən XXI tur çərçivəsində "Xəzər Lənkəran” doğma divarlar arasında bu mövsüm özünü çox yaxşı tərəfdən göstərən "AZAL”ı qəbul edirdi. İlk altılıq uğrunda mübarizədə heç də "silahı yerə qoymayan” "AZAL” komandası əvvəlcədən də Lənkərana bir xal dalınca gəldiyini bəyan etmişdi. Çünki Lənkərandan aparacağı bir xalla ümumi xal ehtiyatını 36-ya çatdıracaq olan qonaqlar ilk "6lığ”a vəsiqəni təmin etmiş olacaqdılar. Amma qonaqlar üçün bu "altılıq” "Qəbələ”nin "Muğan”a yenilməsi ilə "göydəndüşmə” oldu. Belə ki, "Xəzər Lənkəran”a məğlub olacaqları təqdirdə belə onlar artıq bunu təmin etmiş sayılırdılar.

            Bunun başqa bir tərəfi də var idi ki, onlar komandamızla matça sərbəst çıxacaqdılar. Bu elə gözlənildiyi kimi də oldu. Onsuz da zəif olmayan "AZAL” komandası bizlərə gərgin anlar yaşada bildilər. İlk hissənin artırma dəqiqələrində Elnur Abdullayevin təxminən 25-30 metrlik məsafədən vurduğu gözəl qolla "Xəzər Lənkəran” 1:0 önə keçdi və fasiləyə də bu hesabla yollandı.

            İkinci hissənin əvvəllərində qarşılarına qol vurmaq məqsədi qoymuş olan qonaqlar, nəhayət ki istəklərinə çatmış oldular. Belə ki, qapımıza təyin olunmuş cərimə zərbəsi yerinə yetirən "AZAL” komandası, topu cərimə meydançamıza havalandırdı, burada hücuma qoşulmuş rəqib müdafiəçi Usim Nduka qapı istiqamətində başla zərbə endirməyə macal tapdı. Şanssızlıqdan Simao Brunoya da azca toxunan top istiqamətində dəyişiklik etdi və daha uzaq küncə getməklə Kamran Ağayevi çarəsiz qoydu -1:1.

            Lakin çempionluq mübarizəsində yalnız qələbə qazanmaq istəyərək, liderdən xal fərqində aralı düşməməyi komandamız Hristu Kiyakunun baş zərbəsi ilə vurduğu qolla bu təhlükədən uzaqlaşmağı bacardı. Ümumiyyətlə oyun planında bəzi dəyişikliklər etmiş olan baş məşqçimiz bu taktiki sxem ilə də "AZAL” kimi güclü rəqibə qalib gəlməyi bacardı. Xətlərarası əlaqədə az da olsa problemlər komandamızın oyununa və deyərdik ki, daha böyükhesablı qələbəmizə mane oldu. Futbolçu kimi daha istedadlı və təcrübəli olan komandamızın yaxın gələcəkdə bu çatışmazlıqları da aradan qaldıracağına inanırıq.

            Bu qələbədə azarkeşlərimizin də payı yüksək qiymətləndirilməlidir. Stadiona toplanmış 12000 azarkeşimiz dayanmadan "Xəzər Lənkəran”ı qələbəyə səslədi və motivasiya verdi.

            Bu arada klub rəhbərliyinə də təşəkkür etməyi yaddan çıxarmaq olmaz.  Onlar həm komandanın formalaşmasında böyük əziyyətlərə və məsrəflərə qatlaşırlar. Həm də bu matçdan əvvəl bir çox azarkeşlərimizin bizim vasitəmizlə oyunun vaxtının daha gec saatlara keçirilməsi xahişində olduqlarını çatdırmışdılar. Stadiona daha çox azarkeş gəlməsinin və komandaya dəstək verməsinin bir səbəbi kimi bunu da qeyd etmək olar. Bunun üçün azarkeşləri eşitdiyinə görə rəhbərliyə bir daha təşəkkür edirik. Böyük "Xəzər Lənkəran” ailəsi olaraq qarşılıqlı anlaşmanın bundan sonra da davam edəcəyinə inanırıq.

            Daha bir təşəkkür etmək istədiyimiz ünvan da var. Belə ki, hakim ədalətsizliyi üzündən məğlubiyyət aldıqlarını hesab edən Zaqatalalı azarkeşlər də "Simurq”un son tur matçında "”Xəzər” Çempion!”  şüarını Zaqatala şəhər stadionunda səsləndirmələridir. Onlara həm saytımız vasitəsi ilə təşəkkür etməyi özümüzə borc bilirik, həm də fanklubumuzun rəhbərliyinin "Simurq” azarkeşlərinin telefon nömrələrindən birini əldə edərək, şəxsən təşəkkür etməyi və bunu bütün zaqatalalı azarkeşlərə çatdırılmasını rica etməyi də unutmadıq.

            Daim azarkeşlər arasında əlaqələrin sivil səviyyədə qurulması üçün çalışan "Bosman” fanklubu bundan sonra da bu yöndə fəaliyyətini davam etdirmək əzmindədir.