Demək olar ki, hər gün "Xəzər Lənkəran Mərkəzi stadionu”ndan, ot örtüyünün vəziyyəti ilə bağlı, xüsusən də "Lənkərançay” ın daşaraq məcrasından çıxmasından sonra bir çox əraziləri o cümlədən, stadionun ot örtüyünün üzərindən belə çay sularının axması və bunun nəticəsində çay sularının özü ilə gətirdiyi gil və lilli torpaq çöküntüsüylə örtülməsi nəticəsində ot örtüyünün xeyli riskli vəziyyətə düşməsini əks etdirən məlumatları, o cümlədən fotoşəkilləri təqdim etməklə, "12cioyuncu.moy.su” saytının əməkdaşları "Xəzər Lənkəran” azarkeşlərini məlumatlandırır. Son məlumat isə bərpa işlərinin qaydasında olmasından xəbər verir. Bütün bu bərpa işlərində əməyi olan hər kəsə, o cümlədən əziyyət çəkərək bunları "Xəzər Lənkəran” azarkeşlərinə hər gün çatdıraraq intizardan qurtaran "12cioyuncu.moy.su” saytının əməkdaşlarına xüsusi olaraq təşəkkür edirik. Komandasını sevib bu çətin anda da onun yanında olmaq əlbəttə şərəfli azarkeş duyğusudur.

          Aşağıda "12cioyuncu.moy.su” saytının əməkdaşlarının gündəlik hazırladığı məlumatlardan birini nəzərinizə çatdırırıq:

            "Fırtınalar Meydanı”na gedib ərazidəki vəziyyətlə maraqlandıqdan sonra meydançaya yaxınlaşdıq. Meydançanın iki gün əvvəlki vəziyyəti bizi elə qorxutmuşdu ki, bu gün gördüklərimizə inana bimirdik. Tamamilə başqa mənzərə ilə rastlaşdıq.

          Meydançanın kənarındakı və ot örtüyünün dibinə yapışıb qalmış palçıq əllə yığılaraq təmizlənirdi. Ot qırxan maşınlar isə meydançanın müxtəlif yerlərində çalışırdı. Meydançayla bağlı stadionun direktoru Höccət Hacıyevin də fikirlərini öyrəndik: - "Gördüyünüz kimi hər tərəfdə iş gedir, iki növbədə intensiv qaydada çalışırıq. Meydançada isə daha çox çalışırıq, sentyabrın 25-ə qədər meydançanı  tam hazır edəcəyik. İstəyimiz də budur. Azərbaycan futbolunun  "Böyük oyun”u burada olsun”.

           Biz də meydançanın hər tərəfini gəzərək fotoşəkillər çəkdik. Meydançanın yenidən yam-yaşıl görünməsinə sevinməyə bilməzdik. Sonda bu qədər əziyyətlərə rəğmən, tonlarla palçıqdan ərazini və meydançanı təmizləyən insanlara  gördükləri işlərə görə təşəkkür etməyi də unutmadıq.