Bildiyiniz kimi bu günlərdə "Bosman” fanklubu olaraq 4 yaşımızı qeyd etdik. Bu münasibətlə rəsmi internet səhifəmizdən əlavə, "Facebook” sosial şəbəkəsində də http://facebook.com/bosmanfanklubu səhifəsini açdıq. Ad günümüzlə bağlı xeyli təbriklər gəldi. "Xəzər Lənkəran” klubu rəsmi internet saytında, o cümlədən "12-ci Oyunçu” azarkeş qrupu, "Caspian Ultras” fanklubu, "İnter” fanklubu və digər rəsmi qruplar və həmçinin xeyli sayda azarkeşlər zəng edərək bir-birindən dəyərli fikirlərlə "Bosman”ı təbrik etdi. Təbriklərdə "Bosman”a böyük dəyər verdiklərinə görə bütün qardaşlarımıza təşəkkür edir və biz də onlara can sağlığı və bütün sahələrdə uğurlar arzulayırıq.

            Bu təbriklərin davamı bu gün də maraqlı bir ünvandan gəldi. Belə ki, əksər "Xəzər Lənkəran” azarkeşlərinin böyük hörmət bəslədiyi və sevdiyi bir insan olan Mirça Rednik komandamızın tərcüməçisi Elvar Quliyevə zəng edərək "Bosman” fanklubunu ad günü münasibəti ilə təbrik edib və bu təbriki bizə çatdırmağını ondan xahiş edib. O cümlədən sevimli Rednik "Xəzər Lənkəran” azarkeşlərini həmçinin "Bosman” fanklubunu tez-tez xatırladığını dilə gətirib. Bizimlə keçirdiyi zamanın onun həyatında xüsusi və silinməz izlər buraxdığını, hərarətlə qeyd edib. "Bosman” fanklubu haqqında bir çox xoş fikirlər söyləyən Rednik hal hazırda müvəqqəti Rumıniyada olduğu üçün vaxt taparaq bizimlə əlaqə saxlamağı özünə borc bildiyini dilə gətirib. "Standard”da işlərinin yaxşı getdiyini və bundan məmnun olduğunu söyləyən keçmiş baş məşqçimiz, həmçinin "Xəzər Lənkəran”ın bu günki vəziyyətindən narahatlığını da dilə gətirib. Amma hər şeyin daha yaxşı olacağına inandığını bildirib.

            Eyni zamanda Elvar bəy də ona "Xəzər Lənkəran” azarkeşlərinin onu unutmadığını söyləyib və komandamızın azarkeşlərinin indi "Standard”a da azarkeşlik etdiyini söyləyərkən, Rednik belə cavab verib. "Bilirəm, hər şeydən xəbərim var. Mən onları çox sevdiyim kimi, onlar da məni unutmurlar. Mən "Bosman”ın saytını vaxt olduqca izləyirəm və onlara təşəkkür edirəm. Burada evimin içində və tanınmış bir klubun başında olmaqdan məmnunam. Amma gələıcəkdə bu qarşılıqlı sevginin bizi qovuşdura biləcəyinə də inanıram.”

            Bizə dəyər verərək bütün təbrik edənlərə və o cümlədən sevimli Rednikə biz də bir daha minnətdarlığımızı bildirir və can sağlığı arzulayırıq.

"Bosman” fanklubu      19. 02. 2013