"Bosman” fanklubunun FİFA və R.Silvanoya müraciəti

Bildiyimiz kimi ali beynəlxalq futbol qurumu olan FİFA, "Xəzər  Lənkəran” klubu ilə bağlı AFFA-ya və kluba məktub ünvanlayıb. Ali futbol qurumunun məktubunda  13.10.2010-cu il tarixdə FİFA-nın Mübahisələrin Həlli Palatası "Xəzər Lənkəran” FK-nın futbolçu Romulo Silvano Silvaya 30 gün müddətində 114 000 (yüz on dörd min) ABŞ dolları ödəməsi barədə qərar qəbul edildiyi bildirilir. Qərara əsasən, göstərilən məbləğ ödəniləcəyi vaxta qədər illik 5% cərimənin ödənilməsi də nəzərdə tutulub. 31.10.2011-ci il tarixdə FİFA-nın Nizam-İntizam Komitəsinin katibliyi borc ödənilmədiyi üçün kluba qarşı inzibati icraat işi başlamış və klubdan 21.11.2011-ci il tarixə qədər borcu ödəməyi tələb etmişdir. "Xəzər Lənkəran” FK 29.11.2011-ci il tarixdə FİFA-nın Nizam-İntizam Komitəsinə müraciət edərək hazırda borcu ödəmək üçün lazımi vəsaitin olmamasını əsas gətirmiş və ödəmə müddətini uzatmağı xahiş etmişdir. Bundan sonra FİFA-nın Nizam-İntizam Komitəsi 30.11.2011-ci il tarixdə klubun FİFA-nın hüquq orqanının qərarını icra etməməsi barədə məsələyə baxaraq aşağıdakıları qərara almışdır:

1. "Xəzər Lənkəran” FK FİFA-nın hüquq orqanının qərarının yerinə yetirilməməsində günahkar hesab olunsun.

2. "Xəzər Lənkəran” FK FİFA-ya 30 gün müddətində 15 000 (on beş min) İsveçrə frankı cərimə ödəsin.

3. "Xəzər Lənkəran” FK-ya borcun ödənilməsi üçün 30 gün vaxt verilsin.

4. Bu müddət ərzində borc ödənilmədiyi təqdirdə futbolçunun tələbinə əsasən klubun əsas komandasından 6 xal çıxılsın. Xalların çıxılması FİFA-nın tələbinə əsasən yerli assosiasiya tərəfindən həyata keçirilsin.

            Yuxarıdakı məsələ ilə tanış olduqdan sonra "Bosman” fanklubu olaraq, digər çoxminli azarkeşlər kimi biz də narahatlıq keçirərək komandamızı müəyyən mənada bu sanksiyaların müəyyən hissəsindən qorumağa dair ali futbol qurumuna və şəxsən zərərçəkən qismində təqdim olunan keçmiş furbolçumuz Romulo Silvanoya müraciət etməyi qərara aldıq. Komandamızın əsasən mənən biz azarkeşlərə məxsus olduğunu nəzərə alaraq, hamılıqla buna qoşulmağı istərdik. Bu müraciətimiz həm də "12cioyuncu.info” saytına təqdim olunaraq geniş azarkeşlərin müzakirəsinə verilir. Eyni zamanda azarkeşlərimiz bu müraciəti dəstəkləyəcəkləri təqdirdə, mətn ingilis dilinə tərcümə olunaraq FİFA-ya və zərərçəkən Ramulo Silvanoya göndəriləcək.

                        Hörmətli ali futbol qurumu olan FİFA və Ramulo Silvanoya

            Bildiyimiz kimi "Xəzər Lənkəran”ın artıq keçmiş futbolçusu sayılan Ramulo Silvano tərəfinin komandamıza qarşı qaldırmış olduğu iddianın sizin tərəfinizdən təmin olunması barədə məlumat yayılmışdır. Sizin də AFFA və kluba göndərdiyiniz məktubda bütün bunlar təsbit olunmuşdur. FİFA-nın Nizam-İntizam Komitəsi olaraq bu barədə 30.11.2011-ci il tarixdə olan son qərarınız biz "Xəzər Lənkəran” azarkeşlərini xeyli dərəcədə məyus etmişdir.

Biz FİFA-nın bu barədə çıxardığı qərarları haqsız hesab etmək iddiasından uzağıq. Çünki bu mövcud qanunvericiliyə əsaslanaraq qəbul olunmuş qərarlardır. Millətindən, dinindən, irqindən asılı olmayaraq heç kimin haqqını tapdamaq olmaz və bu barədə olan qərarınızı alqışlayırıq. Yəqin klub hansısa haqsızlıqlara yol verib ki, belə sanksiyalarla üzləşib.

            Lakin bizləri narahat edən məsələnin başqa tərəfidir. Futbol azarkeşlər üçün oynanılır kimi məşhur deyim var. Biz "Xəzər Lənkəran” azarkeşləri komandamızı canımız qədər sevir və onun uğurları üçün bəlkə də mümkün olandan artığını etməyə çalışırıq. FİFA Nizam-İntizam Komitəsinin 30.11.2011-ci il tarixində qəbul etdiyi qərarın son, 4-cü bəndində göstərilən nəzərdə tutulmuş tədbir komandamıza qarşı çox mənfi hallar yarada bilər. Nəzərə alsaq ki, cari ölkə kuboku mövsümü bizim üçün bitmiş sayılır və çoxminli azarkeşlərimizin yalnız bu il çempionat yarışına ümidləri qaldığından, bunun necə bir nəticəyə gətirib çıxaracağı indidən məlum olur. Azərbaycan Premyer Liqasının bitiminə 5 tur qaldığından və hal-hazırda liderdən 6 xal geridə olduğumuzdan, daha 6 xaldan məhrum olmamız bütün ümidlərimizi heçə endirəcək. Biz isə mövsümün əvvəlindən komandamızla birlikdə çox çətin bir yol qət etmişik.

            Ramulo Silvanonun oyunu və vurduğu qollarla vaxtında nə qədər xal qazanmış və onunla birlikdə bu qol sevinclərini dəlicəsinə yaşamışıq. Sizə dəyən zərərin həm maddi və həm də mənəvi tərəflərinin olduğunu bilirik. Maddi zərərin klub tərəfindən ödənildiyi artıq məlum olsa da, çox güman ki, mənəvi zərərin əvəzini komandamızdan 6 xalın silinməsi ilə tarazlaşdırmaq istəmisiniz. Dünya praktikasında mənəvi zərərin də maddi olaraq ödənməsi halının mövcudluğunu bilirik. Lakin siz mənəvi tərəfi maddiliyə dəyişmədiyinizi nümayiş etdirərkən həm də böyük bir centlmenlik ortaya qoymusunuz. Elə bizim tərəfimizdən də belə bir centlmensayağı mənəvi dəyərlərə üstünlük verdiyiniz üçün yalnız alqışa layiq qarşılanırsınız. Biz sizin mənəvi dəyərlərinizə böyük hörmətlə yanaşır və sizin kimi bu kateqoriyalara sahib olan bir insandan, bu gün minlərlə insanın mənəvi dəyəri olan "Xəzər Lənkəran”dan bu çətin anda daha bir mənəvi məsələ olan, mövcud xal ehtiyatından 6 xalın silinməsi iddiasından əl çəkmənizi istərdik. Sizin kimi mənəvi məsələlərə diqqətlə yanaşan birinin, minlərlə insanın mənəviyyatına hörmətlə yanaşacağınızdan əminliyimizi ifadə etmək istərdik. İndi yalnız azarkeşləri nəzərə alaraq həm FİFA və həm də zərərçəkən Romulo Silvanoya komandamızın naminə bu bəndin, yəni 6 xaldan məhrum edilmə iddiası bəndinin dayandırılmasını arzulayırıq. Ümid edirik ki, nə FİFA və nə də Romulo Silvano azarkeşləri məyus etməyəcək.

Böyük hörmətlə: "Xəzər Lənkəran”ın çoxminli azarkeşləri  12. 04. 2012 

 P.S. Tarix müzakirədən sonra, göndərilən anda dəyişdiriləcək. Vaxtın az olduğunu nəzərə alıb azarkeşlərdən fəal müzakirə etmələri xahiş olunur.

P.P.S. Romulo Silvanonun hər hansı ünvanı bizdə olmadığından «Xəzər Lənkəran» klubundan xahiş olunur ki, onlarda belə bir ünvan (elektron ünvan) varsa «Bosman» fan klubunun saytındakı BİZİMLƏ ƏLAQƏ bölmənsində olan e-mailə göndərsinlər.