Bu gün fanklubumuz üçün əlamətdar bir gündür. Belə ki, 2009-cu ilin Fevral ayının 9-da on üç "Xəzər Lənkəran” azarkeşi tərəfindən "Bosman” fan klubunun təsis edilməsi haqqında qərar qəbul olundu. "Xəzər Lənkəran”ın ətrafında sayca dördüncü olaraq təsis edilmiş "Bosman” fanklubu niyə yarandı? kimi sual da səsləndirmək olar. Belə ki, fanat hərəkatında müəyyən yeri olan məsələlər də var idi ki, bu boşluğu doldurmaq, komandamızın bəzi məsələlərdə daha başqa prizmalardan yanaşdıqda, daha rəngarəng dəstəyə ehtiyacının olduğu duyulurdu. Ən birinci vəzifəsi "Xəzər Lənkəran”ı fanat hərəkatının edə biləcəyi bütün imkanlardan istifadə edərək dəstəkləməyi qarşısına məqsəd qoyan "Bosman” fanklubu bacardığı qədər nəzərdə tutduğu işləri yerinə layiqincə yetirir deyə bilərik. Stadionlardakı tribunalardan tutmuş, məşq və yoxlama oyunlarından belə komandamıza daim dəstək olan "Bosman” fanklubu bunlarla da kifayətlənməyərək yoxlama oyunları və ya rəsmi matç olsun, ekranlarda reportaj olmadığı zamanlarda "12ci oyunçu” azarkeş qrupunun vasitəsi ilə onlayn reportajlar təşkil etməklə, "Xəzər Lənkəran” azarkeşlərini intizardan azad edə bilmişdir. 

            Bunlardan başqa "Bosman” fanklubu özünəməxsus layihələr həyata keçirməklə ölkə futbolunun fanat hərəkatında bir sıra ilklərə də imza atmışdır. İlk olaraq rəqib "İnter” fanatları ilə Martın 21-ə təsadüf edən bayram günündə keçirilən səfər oyunu zamanı "İnter, Bayramınız Mübarək!” baneri qaldırmış və razılığa əsasən eyni "Xəzər, Bayramınız Mübarək!” təbriki yazılmış bannerlə qarşılıq almışdır. Rəsmi fanklubun və stadiona toplaşmış bütün azarkeşlərin yaxından dəstəyi ilə bu şüar qarşılıqlı olaraq minlərlə insan tərəfindən səsləndirilmişdir.

            Daha sonra əzəli rəqib "Neftçi” fanatları ilə münasibətlərin son dərəcə gərgin olduğu vaxtda Azərbaycan futbolunun əfsanələrindən biri olan Anatoliy Banişevskinin 65-illik yubileyi qeyd olunan gün "Bosman” fanklubunun rəhbəri, "Neftçi” fanatları ilə görüşmüş və onların vasitəsi ilə klub rəhbərliyi səviyyəsində qəbul olunmuşdur. "12ci oyunçu” azarkeş qrupunun rəhbərinin də imzaladığı təbrik məktubunu rəqib düşərgəyə çatdırmışdır. Qarşılıqlı olaraq kiçik xalça üzərində toxunmuş "Neftçi” loqosu ilə hədiyyə verilmişdir. Bu hadisə Azərbaycanın demək olar bütün idman informasiya vasitələrində işıqlandırılmışdır. 

Daha sonra digər klubların azarkeş və fanat qurumları ilə sivil münasibətlər qurulmuşdur. Bu sivil münasibətlərin qurulması, doğrudan da çox vaxtlar və xüsusən də son günlər Misir futbol azarkeşləri arasında yaşanan və kütləvi ölümlə nəticələnən bir məqamda, bu addımların nə qədər lazımlı olduğunu bir daha sübut edir.

Bundan başqa klub və stadion rəhbərliyi ilə danışıqlardan sonra "Bosman” fanklubu ölkədə daha bir yeniliyin banisi olmuşdur. Belə ki, "Xəzər Lənkəran”ın Avrokuboklardakı Təl-Əviv "Makkabi”si ilə səfər oyununun komandamızın azarkeşlərinin bu matçı canlı teletranslyasiyasının birbaşa "Fırtınalar Meydanı”nda monitor vasitəsi ilə izlənməsini təklif və təşkil etmiş və bu layihə ilə səfərdə oyuna çıxacaq komanda üzvlərini məlumatlandırmış, onların oyuna böyük dəstəklə çıxmasını səciyyələndirmişdir. Beləliklə, ölkə miqyasında tayı olmayan layihələrin həyata keçirilməsi "Bosman” fanklubunun işinin bir hissəsidir. Həm də "Bosman” fanklubu azarkeşliyin təkcə tribunalardan olmadığını sübut edə bilib. Müəyyən məqamlarda "Xəzər Lənkəran” əleyhinə yönəlmiş mətbuata və ayrı-ayrı klub və şəxslərə öz saytı vasitəsi ilə tutarlı cavablar vermiş və bu cavablar da hətta ölkənin aparıcı idman nəşrlərinin vasitəsi ilə daha geniş ictimaiyyətə çatdırılmış və komandamızın xeyrinə real nəticələr əldə olunmuşdur.

Bütün bunları həyata keçirmək üçün isə "Bosman” fanklubu öz daxili imkanlarından istifadə etmişdir. Ümumiyyətlə "Bosman” fanklubu müstəqil düşüncə və müstəqil maliyyə üzrə fəaliyyətin nümunəsini göstərə bilmişdir. Təsis xərclərindən bu günə qədər bu müstəqilliyini daim qoruyub saxlamış və bundan sonra da bu yoldan dönməyəcəyini, bu il dönümü ərəfəsində bir daha bəyan edir.

"Bosman” fanklubunun mərkəzi ofisi Bakı şəhərində yerləşməklə, doğma Lənkəran şəhərində də bölməsi fəaliyyət göstərir. Bir fanklub olmaqla bundan sonrakı fəaliyyətimizi də uğurlu davam etdirməyə çalışacaq və bu yolda müstəqilliyimizi, azad düşüncəmizi əldə rəhbər tutacağıq.

"Bosman” fanklubunun idarə heyəti   09.02.2012