Birinci dövrənin son turunda yəni XI turda heç də az maraq kəsb etməyən oyunlar keçirildi. Bu görüşlər üç gün ərzində baş tutdu ki, ilk oyun günündə "Xəzər Lənkəran” doğma meydanda "Kəpəz”i qəbul etdi və minimal hesabla qalib gələrək azarkeşlərini yenə sevindirdi. XI tur ərəfəsində bildiyiniz kimi ölkə ərazisində hava şəraiti hidrometeroloqların dili ilə desək yağışlı və qeyri-sabit keçdi ki, bu da əsasən ilk oyun günündə daha çox özünü göstərdi. Ölkənin cənubunda, xüsusən Lənkəran ərazisində belə hava şəraiti oyuna dörd gün qalmışdan davam edirdi. Bu sətirlərin müəllifi kimi, cəmi 15 dəqiqə ərzində əynimdə olan bütün paltarların islanmasını deyə bilərəm. Hətta əlimi dəsmal üçün cibimə saldıqda, ciblərimim yağış suyu ilə dolu olduğunu və dəsmalın işimə yaramayacağını gördüm. Bunları yalnız onun üçün demirəm. Hətta ölkənin müxtəlif informasiya vasitələrində Lənkəranda su basmış həyətlərdən bol-bol reportajlar onsuz da yayımlanmışdı. Belə olan təqdirdə birinci dövrənin son oyunu ərəfəsində "Xəzər Lənkəran” – "Kəpəz” oyununun baş tuta bilib-bilməyəcəyi haqqında da suallar yaranmışdı. Hətta stadion rəhbərliyinin oyunun baş tuta bilməyəcəyi ehtimalı da səsləndirilmişdi. Futbol qurumlarımızın oyunun keçirilməsində israrlı olduğunu da bilirdik. Yalnız bundan sonra oyuna bir neçə saat qalmış stadion rəhbərliyinin və bütün personalın gərgin əməyi nəticəsində meydan oyuna hazır vəziyyətə gətirilmişdi. Doğurdan da belə hava şəraitində meydanı oyuna hazırlamaq böyük bir qəhrəmanlıq sayılmalıdır. Bunun üçün əvvəlki yazımızda "Xəzər Lənkəran Mərkəzi Stadionu”nun bütün işçi heyətinə təşəkkürümüzü bildirmişdik.

Bunları təsadüfən xatırlamırıq. Bildiyiniz kimi ötən mövsümün "Bakı” ilə açılış matçında belə hava şəraiti ucbatından oyunun 12-ci dəqiqəsindən sonrakı hissəsinin təxirə salınması yəqin ki, çoxlarımızın yadındadır. Deyərdik ki, bu dəfəki yağış heç də xatırlatdığımız matç gününkündən zəif deyildi, bəlkə də daha intensiv idi.

Bütün bunlarla əlaqədar oyunun baş tuta bilib-bilməyəcəyi haqqında azarkeşlərdə müəyyən narahatçılıq da var idi. Məhz elə bu səbəbdən oyunun baş tutma ehtimalını öyrənmək üçün bizə də xeyli azarkeş zəngləri oldu. Biz isə hələ oyunun təxirə salınması haqda heç bir rəsmi informasiyanın olmadığını və yəqin ki oyunun baş tutacaçını onların diqqətinə çatdırırdıq.

Bütün bunları deməkdə daha bir məqsədimiz XI turda həmişəkindən fərqli olaraq azarkeş sayındakı diqqət çəkən qədər az sayın qeydə alınmasıdır. Şiddətli yağışı görüb, yəqin ki, ötənilki "Bakı” ilə matçın təxirə salındığını xatırlayan və son saatlara qədər oyunun baş tutacağı haqda dolaşıq məlumatlara sahib olan azarkeşlər stadiona gəlməkdə deyəsən tərəddüd etmişdi. Yalnız son saatlarda dəqiq informasiya yayılarkən isə yaxından-uzaqdan stadiona gəlməyi planlaşdırmaq isə bir qədər əlbətdə çətinlik törətmişdi. Bizim üçün çox az sayıla biləcək qədər, yəni 4500 sayda azarkeşin oyunu canlı izləməsi təxminimizcə elə bu səbəbdəndir. Yoxsa, doğma komandanın yanında olmaq üçün dəqiqələri sayan azrkeşlərimizə nə yağış, nə çovğun və nə də boran mane ola bilməzdi. Yalnız və yalnız oyunun təxirə salınması haqqında olan dolaşıq informasiyanın buna səbəb olduğunu düşünürük.

Bütün bunlara baxmayaraq, 4500 rəqəmi, bizim üçün çox az say olsa da, hansı ki, komandanın məşqlərinə bu sayın yarısı qədər, əvəzediciləri ilə yoxlama görüşlərinə ən azı bu qədər azarkeşın gəlməsini hamı bilir, bu XI turda heç də yağışdan  və dolaşıq informasiyadan çaş-baş qalmayan digər bütün matçlara gələn azarkeş sayını həmişəki kimi yenə üstələyə bilmişdi.

Beləliklə, XI turda "Xəzər Lənkəran”ın oyununu izləmək üçün gələnlərin sayı 4500 idisə, bütün digər matçlara gələn azarkeşlərin ümumi sayı 4100 olaraq qeydə alındı. Aşağıda statistik olaraq XI turda bütün matçlarda iştirak edən azarkeş sayını diqqətinizə çatdırırıq:

1.      "Xəzər Lənkəran” – "Kəpəz” – 4500 Azarkeş.

2.      "Qarabağ” – "Bakı”---------- 2000 Azarkeş.

3.      "Rəvan” – "İnter”------------- 800  Azarkeş.

4.      "Qəbələ” – "Simurq”---------- 500 Azarkeş.

5.      "Sumqayıt Şəhər” – "AZAL”---500 Azarkeş.

6.      "Neftçi” – "Turan” ------------ 300 Azarkeş.