Böyük oyundan sonra "Xəzər Lənkəran” azarkeşləri doğma komandalarının əzəli rəqib üzərində qələbəsinə sevindisə, digər yandan komandanın azarkeşlərinə məxsus olan "12cioyuncu.info” saytının bundan bir neçə saat sonra bağlanacağı xəbərinə üzüldü. Adıçəkilən saytda bu barədə verilən son informasiya həqiqətən də nəinki, "Xəzər Lənkəran” azarkeşlərini, hətta əksər rəqib düşərgələrin azarkeşlərini, o cümlədən ölkənin bütün idman nəşrlərinin üzüntüsünə səbəb olub. Buna demək olar bütün ölkədəki idman nəşrləri təəssüflə reaksiya verib. Hətta əzəli rəqibimiz olan "Neftçi” klubunun "Ultra Neftçi” fanatları rəsmən "12-ci oyunçu”larla əlaqə saxlayaraq bu problemin aradan qaldırılmasında hər hansı kömək lazımdırsa, əsirgəməyəcəkləri barədə təklifdə bulunmuşlar. Biz də "Bosman” fanklubu olaraq rəqib düşərgənin azarkeşlərinə ölkənin idman həyatında baş verən bu hadisəyə rəqibliyi bir kənara qoyaraq köməklik istəklərinə görə təşəkkürümüzü bildiririk.

Biz də "Bosman” fanklubu olaraq komandamızın azarkeş qrupuna məxsus olan "12cioyuncu.info” saytının belə çətin vəıziyyətə düşməsindən təəssüf hissi keçiririk. Çünki ölkənin azarkeş saytları arasında özünəməxsus yeri olan və hətta azarkeş saytı olmaqdan daha çox irəli gedərək bir idman informasiya agentliyinə çevrilmiş və minlərlə izləyicisi olan bu saytın maliyyə çətinliyi üzündən bağlanması ilə heç cür razılaşmaq olmur. Belə bir saytın yaşaması əlbətdə ölkə idmanına yalnız xeyir verə bilər. Onlar isə bunu dəfələrlə sübut ediblər. Təsadüfi deyil ki, "12-ci”lərə məxsus olan bu sayt iki il dalbadal "Bosman” fanklubunun ilin nominasiyaları fərqləndirilməsində, ən böyük azarkeş saytı kimi qalib elan olunub.

Məhz bu məqsədlə, dünən gecə saatlarında fanklubumuzun rəhbərliyi "12cioyuncu.info” saytının rəhbərliyi ilə əlaqə saxlamış, vəziyyəti müzakirə etmiş və öz köməyini təklif etmişdir. Bu problemlər aradan qaldırılana qədər isə "Bosman” fanklubunun rəhbərliyi fankluba məxsus olan "Bosman.at.ua” saytının parollarını "12-ci”lərə təqdim etmiş və saytın bütün imkanlarından istifadə etmək üçün onlara şərait yaradılmasını təklif etmişdir. Dost fanat qrupunun, parolları qəbul edərək bu təklifdən razı qaldığını deyə bilərik. Beləliklə müvəqqəti də olsa, "12-ci”lərlə birlikdə eyni saytda fəaliyyət göstərmək variantı olduğundan sayt izləyiciləri nigaran qalmaya bilər. İnşAllah bütün problemlər qısa zamanda aradan qalxar və "12cioyuncu.info” yenə də əvvəlki kimi izləyicilərinin ixtiyarına verilər.

"Bosman” fanklubunun İdarə Heyəti       12.09.2011