Dünən həftənin futbolla bağlı verilişlərində keçən XI tur matçlarının müzakirəsi, oyunlara və epizodlara verilən şərhlərlə o cümlədən, mətbuatın bu turla bağlı müzakirələri ilə çoxlarımız müəyyən qədər tanış olduq. Biz "Xəzər Lənkəran” azarkeşləri olduğumuz üçün "Xəzər Lənkəran" - "Qarabağ" oyunu ilə bağlı aparılan müzakirələrə fikir bildirmək istəyirik.

            Əlbəttə, heç bir müzakirəni qərəzli hesab etmirik. Bu müzakirələrdə iştirak edən hər bir iştirakçıya, istər futbolçu olsun, istər hakim olsun, istər futbol mütəxəssisi və ya idman yazarı olsun söylədikləri qərəzsiz fikirlərə görə minnətdarlığımızı bildiririk. Hər kəs öz baxış prizmasından "Xəzər Lənkəran” – "Qarabağ” oyununu şərh etdi.

            Amma bir məqam da var idi ki, bu barədə eşitmək istədiyimiz fikirlərə rast gələ bilmədik. Bu yazının ərsəyə gəlməsində də elə bu məqam rol oynadı. Şərhlərdə "Xəzər Lənkəran” – "Qarabağ” matçında kimisi "Xəzər Lənkəran”ın, kimisi də "Qarabağ”ın güclü oynadığını qeyd etməklə yanaşı, matçın zəif keçdiyini və bunu hər iki komandadan gözləmədiklərini söyləyənlər də oldu.

            Bizim eşitmək istədiyimiz fikirlər isə indi müzakirəyə başlayacağımız məqamla bağlı idi. Belə ki, hər iki komandanın zəif oyunu ilə bağlı fikirlərin üstündə dayanmaq istərdik. İlk baxışdan bu bəlkə də belə görünürdü. Amma oyunun içində özümüzü hiss etsək bir az fərqli yanaşma ortaya çıxa bilir ki, bu zaman dəqiq qiymət vermək bizcə mümkün olur. Bundan əvvəlki yazımızda da bildirmişdik ki, Rednikin rəhbərliyi altında "Xəzər Lənkəran” arxada qalan 11 turda əsas strategiyası bir olmaqla, müxtəlif taktikalar ortaya qoymuşdur. Baxmayaraq ki, Azərbaycan futbolu və çempionatı, burada oynayan komandaların oyun üslubu ilə çox da tanış deyil. Bu da təbiidir ki, Mirça Rednik ölkəmizdə ilk dəfədir ki, bir komandanı çalışdırır. Buna baxmayaraq ötən 11 tur ərzində qazanılan nəticəni uğurlu saymaq lazımdır. Təsadüfi deyil ki, bir fanklub olaraq biz, təsnifat mərhələsinin ilk dövrəsini həm "Xəzər Lənkəran” , həm də Mirça Rednik üçün uğurlu dövr kimi qiymətləndirmişik.

            Oyunun şərhinə gəlincə demək istədiyimiz həm də qələbədə əsas amil olan bir neçə məqam var idi. Yadınızdadırsa matçdan əvvəl Mirça Rednikin mətbuata verdiyi müsahibədə ""Qarabağ” üzərində qələbəyə söz vermirəm, "Qarabağ”ın çox güclü, meydanda bir-birini gözəl başa düşən futbolçuları, istedadlı gənc məşqçisi var” kimi bir açıqlaması olmuşdu. Bu açıqlamanı müxtəlif cür qiymətləndirmək mümkün idi. Lakin bu fikirlərin sahibi olan Rednikin oyun günü hansı taktikanı tətbiq edəcəyi çoxlarımız üçün maraqlı və qızğın müzakirə tələb edən məqam idi. Nəhayət oyun zamanı bütün bunlara aydınlıq gəlmiş oldu.      Rednikin demiş olduğu "rəqibin futbolçuları meydanda bir-birini gözəl başa düşür” fikrini əsas götürərək, ilk növbədə onların oyununu pozmaq üçün güclü pressinq tətbiq etməklə, rəqibə kombinasiyalı oyun qurmağa qətiyyən imkan verməmək və buna hesablanmış güclü oyun nizam-intizamına sonadək riayət etmək kimi bir taktiki plan bu qələbənin əsasını təşkil etmiş oldu. Müdafiənin, orta sahənin, cinahlar və hücum xəttinin öz işi olduğunu hamımız çox gözəl bilirik. Oyun qurucu və dağıdıcı funksiyalı futbolçuların və mövqelərin olduğunu da çox gözəl bilirik. Amma fikir verdinizsə, "Xəzər Lənkəran” ın həm müdafiəsi, həm orta sahəsi, cinahlar daxil olmaqla hücum xətti eyni zamanda iki iş görürdü. Top bizdə olduğu zaman hücum qurmağa çalışan futbolçularımız, topun rəqibdə olduğu zaman onların müdafiədən çıxmasına imkan vermir, kombinasiyalı oyun qurmasına güclü pressinq tətbiq etməklə mane olur, sanki həmin anlarda bütün futbolçularımız dağıdıcı oyunçu rolunu oynayırdı. Bu keyfiyyətlər hesabına bir neçə dəfə elə rəqib müdafiədən çıxmaq istərkən topu onlardan ala bilir və hücuma başlaya bilirdik. Bununla da "rəqibin futbolçularının bir-birini başa düşməsinə” əngəl yaratmaqla onların oyunquruculuğunu maksimum pozmuş olurduq. Bax buna görə də "Qarabağ” istədiyi oyunu göstərə bilmirdi. "Xəzər Lənkəran” ın futbolçuları da hamı bir nəfər kimi həm oyunqurucu, həm də dağıdıcı "cəbhədə” çalışdıqlarından iki funksiya yerinə yetirmiş olduqları üçün nisbətən zəif təsir bağışlayırdılar. Düzdür futbolçularımız ustalıq baxımından Avropanın məşhur klublarındakı kimi daha da səviyyəli olsaydılar bu "zəif oyun” sözünü də yəqin cümlədən çıxarmış olardıq. Hər halda qış transferlərini ümidlə gözləyirik ki, istənilən taktika ilə oynayanda zəif oyun gözə çarpmasın.

            Rəqibin istədiyi kimi oyun qura bilməməsində və qələbədə əsas sayılacaq ikinci keyfiyyət isə "oyun nizam-intizamına” bütün komandanın əvvəldən axıra qədər riayət etməsi oldu. Göstərdiyimiz keyfiyyətləri əvvəldən axıra qədər davam etdirən futbolçularımız oyun nizam-intizamını saxlamaqla nə panikaya düşdülər nə də hər hansı "pozulma”ya uğramadılar.

            Soyuducusunda lazımı ərzağın olmamasına baxmayaraq, qonağı çox gözəl qarşılayan və bacarığı hesabına bu az ərzaqla rəngarəng süfrə açan və "qonaq qəbul etmə kimi işin” öhtəsindən bütün hallarda məharətlə gələn bir ev xanımının soyuducusu ərzaqla dolu olan halda nələr hazırlayaraq, necə süfrə açacağı hamıya məlumdur. Məqsədimiz Redniki hər hansı bir xanımla müqayisə etmək yox, sadəcə əlində olan indiki materialla müxtəlif taktikaları müvəffəqiyyətlə həyata keçirməsini göstərmək idi. Bu da onun öz işində nə qədər professional olduğunun göstəricisidir. Əlində lazımi material olduqdan sonra belə bir professional mütəxəssisin nələr edə biləcəyini böyük ölçüdə söyləmək olar.

            "Xəzər Lənkəran”  azarkeşi futbolu gözəl başa düşdüyü üçün bütün bunları anlayır və bu mütəxəssisi lazımınca qiymətləndirə bilir, hələ yolun başlanğıcı olduğunu gözəl dərk edir.