Əvvəla uzun acı məğlubiyyətlərdən sonra, sonuncu pilləyə yuvarlanmış "Xəzər Lənkəran”ın AZAL üzərindəki qələbəsi münasibəti ilə bütün komanda azarkeşlərini təbrik edirik. Psixoloji durumun normala dönməsi üçün bu qələbənin olduqca əhəmiyyətli olduğunu demək lazımdır. Arzu edirik ki, bu qələbə bundan sonra komanda və klubda aparılan işlər sayəsində möhtəşəm günlərimizə dönüşün başlanğıcı olacaq.

            Son günlər bütün camiədə baş verən hadisələr hardasa dünyanın sonu anlamına gəlirdi. Azarkeşlərin bu uğursuzluqlardan sonra sanki komandadan soyuması, bəzilərinin isə təhdid olunması əlbətdə son günlərin ürəkağrıdıcı məqamlarıdır. Bu ürəkağrıdıcı məqamların biri də "Xəzər Lənkəran” azarkeşlərinin doğma evi olan "12cioyuncu.info” saytının haker hücumları nəticəsində dağıdılmasıdır. Bunu yəqinləşdirmək üçün sayt rəhbərliyi ilə də tez-tez əlaqə saxlayırdıq. İlk saatlarda onlar da bunun  texniki qüsurlardan yaranan problem olduğu və ya həqiqətən də haker hücumunun nəticəsi olduğunu dəqiqləşdirə bilməmələrindən qəti bir söz deyə bilməyəcəklərini bizə çatdırmışdılar. Lakin saatlar ötdükcə aparılan bütün işlərin və serverlə dəqiqləşdirmələrinin nəticəsi kimi bunun həqiqətən də haker hücumunun nəticəsi olduğunu dəqiqləşdirdikləri barədə artıq məlumatlı olduqlarını bəyan etdilər. Bu hücumdan əziyyət çəkən təkcə  "12cioyuncu.info” saytı olmamışdı. Təxminən eyni saatda və eyni dəqiqələrdə "Futbolpress.az” saytı da haker hücumuna məruz qalaraq fəaliyyəti dayanmışdı. Biri çoxminli azarkeş saytı, o biri respublikanın tanınmış idman saytlarından olan hər iki saytın belə təzyiqlərə məruz qalması ürəkağrıdıcı faktdır, xuliqanlıq və rəzil hadisədir. Başqa bir ürəkağrıdıcı məqam isə demək olar ki, paralel fəaliyyət göstərən heç bir medianın və azarkeş qruplarına aid olan digər informasiya vasitələrinin sanki bundan xəbəri yoxmuş kimi özlərini aparmalarıdır. Ayrı-ayrı vaxtlarda bir birindən xəbər "əməkdaşlığı” edən informasiya sayt və portallarının belə biganə münasibəti çox təəssüf doğurur. Belə bir anda heç olmasa mənəvi dəstək nümayiş etdirmək ən dəyərli bir vasitə olardı.

Buna çox təəssüf edərək həm "12cioyuncu.info”  saytına və həm də "Futbolpress.az” saytına öz mənəvi dəstəyimizi nümayiş etdirmək niyyətindəyik. Hər hansı bacara biləcəyimiz digər köməklikləri də bu yazı vasitəsi ilə təklif edirik.

Onu da demək istəyirik ki, bütün bu olanlar sizin nə qədər acı həqiqətləri öz güzgünüzdə düzgün göstərməyinizin əlamətidir. Bilin ki, yaxın vaxtlarda hər şey öz yolunu tapacaqsa da amma bu biganəlik özünə bəraət tapmayacaq.   

            Hörmətlə: "Bosman” fanklubunun idarə heyəti və "Bosman.at.ua”-nın əməkdaş qrupu

03. 10. 2012