Bu dəqiqələrdə, yəni dekabr ayının 5-i, saat 9:00 dan başlayaraq azarkeşlərimiz sevimli məşqçiləri, rumıniyalı mütəxəssis Mirça Redniklə son dəfə görüşmək üçün Lənkəran şəhər stadionunun ərazisində yerləşən komandanın bazasının qarşısında toplaşıblar. Azarkeşlər arasında "12-ci oyunçu” azarkeş qrupunun və "Bosman” fanklubunun üzvləri də yer alıb. Toplaşanlar Mirça Rednikin gedişinə təəssüflərini bildirir və onun gedişinə yol açan hər bir nüansı lənətləyirlər. Hətta stadionun demək olar bütün personalı da yığışaraq, təəssüflərini ardıcıl olaraq dilə gətirirlər. Komandanın tərcüməçisi olmadığından, azarkeşlər yalnız qırıq-qırıq  kəlmələrlə baş məşqçi ilə fikir bölüşə bilirlər. Son dəfə stadionun ərazisindəki heyvanları yemləyən Mirça alqışlarla qarşılanır. Onunla şəkillər çəkdirilir və avtoqraflar alınır. Hər iki tərəf çox üzgündür. Bundan sonra belə bir şəraitdə komandamızın böyük klub olma yolunda inamların tükəndiyi ifadə olunur.

Rednik artıq yola düşərkən azarkeşlərlə qucaqlaşır və hər iki tərəf göz yaşlarını saxlaya bilmirlər. Çox Təəssüf...

Həqiqət zari-zar ağlar, siyasət var olan yerdə,

Hopar vicdanə alçaqlıq, rəyasət var olan yerdə.

Ey aqil köhnə dünyanı dəyişmək fikrinə düşmə,

Gedər zəhmətlərin badə, xəyanət var olan yerdə.

Şoranlıqda ağac əkmə, boy atmaz, bəhrə də verməz!

Ağacdan bir əsər qalmaz, rəzalət var olan yerdə.

Nahaqla haqq savaşında ədalət qoy zəfər çalsın,

Açılsın sirri pünhanlar, həqiqət var olan yerdə.