İdman təsərrüfatımız yenə çalxalanır. Bir-birindən ağır olaylar gündəmi zəbt edib. Başlayaq elə mərkəzi arenada qeydə alınan maç-maç, quc-qucdan. Başqa klublarla müqayisədə hakimlərin "Neftçi”yə daha çox simpatiya göstərdiyi birmənalıdı. Hara fırladırsan-fırlat, bu artıq təsdiqini tapan faktdı. Kələ-kötür meydanlarımızda yaşananları vərəqləməklə bunu belə olduğunu görmək mümkündü. AZAL-ın prezidenti Vaqif Qasımovun "niyə o səhvərdən biri "Neftçi”nin əleyhinə olmayıb?” deməsi də reallığı əks etdirir. Yox, bununla "ağ-qaralar”ın liderliyinə və çempionluq yolunda sərf etdiyi əməyə kölgə salmaq istəmirəm. Arif Əsədovun yetirmələri doğrudan da sabit oyunla rəqiblərindən bir addım öndədi və bu gün zirvədə qərarlaşması təbiidi (sabit oyun və zirvədə qərarlaşmaq elə müəllifin sadaladığı faktorlarla əlaqədardır. Bu mötərizədəki fikir bizə məxsusdur). "Neftçi” mövsümü eniş yaşamadan, bir nəfəsə və əmin addımlarla çempionluqla bitirməyə yaxındı. Sadəcə, əlinə fit alanların digər klublarla müqaisədə bakılılara göstərdiyi simpatiyanın dozası bir qədər çoxdu və bu, haqlı narazılığa səbəb olur. Mərkəzi arenada yaşananlar isə deyilən və yazılanların həqiqət olduğunun bariz nümunəsidi. Vallah, ağır dərddi, qardaş. Xaqani Məmmədovun ən çox güvəndiyi kadrlardan Elçin Məəmədovla Əfqan Həmzəyev "Neftçi”nin başqanı Sadıq Sadıqovun boynuna sarılır. Onu AZAL-ı yenmələri və çempionluq yolunda daha bir addım atmaları münasibətilə təbrik edir. Hamının gözü qarşısında. Utanıb-çəkinmədən, qızarıb-bozarmadan. Lənət olsun, belə ədalətə və onun təmsilçilərinə! Lənət olsun, onların bu addımına hələ də reaksiya verməyən başbilənlərinə! Rövnəq Abdullayev, Xaqani Məmmədov, buyurun, cavab verin? əlinə fit verib ədaləti qorumağı tapşırdığınız lotuların davranışını izah edin bu millətə. Onların hazırlığını artırmaq məqsədilə qərib ölkələrdə havaya sovurduğunuz milyonların nəticəsi göz önündədir. Əminəm ki, "Tofiq Bəhramov”da yaşanan bu rüsvayçılıq mərhumun arenada dolaşan ruhuna da əzab verdi. Ona da əminəm ki, Bəhramovun ruhu adını ədalət təmsilçisi qoyub, klub rəsmisi ilə nümayişkaranə şəkildə sevgi hisslərini bölüşənləri dünya durduqca qarabaqara izləyəcək. Nə qədər gec deyil, bu ləkəni təmizləyin, Rövnəq bəy, Xaqani bəy! Yox, bunu edəcək gücdə deyilsizsə, onda bir daha hakimlərinizin ədalətindən, şərəfindən və obyektivliyindən dən vurmayın. Insanlar daha sizin danışdığınız nağıllara yox, gördüyünə inanır.

             Müəllif: Kənan Həsənov ("Futbol+” 22 aprel 2011 )