Qafqaz deyəndə ilk öncə Zaqafqaziyada yerləşən üç respublika Azərbaycan, Gürcüstan və nəhayət Ermənistan respublikaları göz önünə gəlir. Tarixən qaynayıb-qarışmış və zaman-zaman düşmənə çevrilmiş olan bu Qafqaz respublikaları arasında hal hazırda da gərginlik hökm sürür. Bu gərginlik əsasən 20% torpaqlarımızı zəbt etmiş Ermənistanla Azərbaycan arasında davamlı olaraq qalmaqdadır.

            Bizim mövzumuz futbolla bağlı olduğundan söhbətimizi bugünki, Rusiyanın Sankt-Peterburq şəhərində keçirilən, "Birlik Kuboku” kimi qəbul etdiyimiz turnirin ¼ final mərhələsi çərçivəsində  Azərbaycanı təmsil edən "İnter” klubu ilə Ermənistanı təmsil edən "Mika” komandaları arasındakı oyunla davam etdirəcəyik.

            Bugünki oyuna qədər Azərbaycan, Gürcüstan və Ermənistan komandaları çox qarşılaşıblar. Sovet dönəmini xatırlasaq onda SSRİ birinciliyində yüksək liqada Azərbaycan SSR-i "Neftçi”, Gürcüstan SSR-i Tbilisi "Dinamo”su, Ermənistan SSR-i isə "Ararat” komandaları əsasən təmsil edirdilər. SSRİ birinciliyinin ikinci dəstəsinin 6-cı zonasında isə Azərbaycanı Lənkəranın "Xəzər”, Naxçıvanın "Araz”, Stepanakertin (indiki Xankəndi) "Qarabağ”, Kirovabadın (indiki Gəncə) "Kəpəz” və sair komandaları, Gürcüstanı Qori şəhərinin "Dila”, Samtredianın "Lokomotiv” Suxumi və Batumi şəhərlərinin "Dinamo” komandaları və sair, Ermənistanı isə Abovyan təmsilçisi "Kotayk”, Leninakan təmsilçisi "Şirak” və sair komandaları təmsil edirdilər. Bu komandalar arasında o vaxt da daim rəqabət çox güclü idi. Onu da deyək ki, SSRİ-nin ikinci liqası adlanan bu çempionatda səviyyə yetərincə güclü idi. Bu prinsipiallıq xüsusən Azərbaycan və Ermənistanı təmsil edən komandalar arasında daha da kəskin hiss olunurdu. Hər dəfə belə qələbədən sonra azarkeşlərin sevincinin həddi-hüdudu olmurdu. "Neftçi” "Ararat”ı məğlub etdikdə sanki bayram ab-havası yaşanırdı. O cümlədən dediyimiz ikinci liqada da eyni ab-hava yaşanırdı. Sovetlər dönəminin süqutu ilə əlaqədar bu nağıl da bitmiş oldu. Çünki yeni təşəkkül tapmış respublikalar öz milli çempionatlarını təşkil etməyə başlamışdı. Daha onlar hər hansı bir ittifaqı təşkil etmirdi.

            SSRİ-nin dağılması, yerini yeni birlik olan MDB-yə vermiş oldu. Lakin bu əvvəlki birlik deyildi. Daha SSRİ çempionatı keçirilmirdi. Ayrılmış olan 15 respublika öz milli çempionatlarının təşkili ilə məşğul idi. Lakin bu birliyin qalmasında maraqlı olan Rusiya Federasiyası indiki "Birlik Kuboku” kimi bir turnirin keçirilməsinə nail oldu. Bu turnir ildə bir dəfə Rusiyanın paytaxtı Moskva şəhərində (sonralar Sankt-Peterburq da bu turnirə ev sahibliyi etdi) 15 respublikanın çempionları arasında keçirilməklə qalibi müəyyənləşdirirdi. Xatırladaq ki, "Neftçi” və "Xəzər Lənkəran” hərəyə bir dəfə müxtəlif illərdə turnirin qalibi olub.

            Bu turnir təşkil olunandan sonra yenə də Qafqaz respublikalarının komandalarının yolu bir-biri ilə kəsişməyə başladı. Beləliklə "Qafqaz nağılı”nın yenidən davamı gəldi. Bu nağılı ilk dəfə "Neftçi” davam etdirdi. 2006-cı ilin "Birlik Kuboku” turnirində Ermənistanın "Pünik” komandası ilə yolları kəsişən "Neftçi” komandası rəqibinin dərsini necə verdisə, növbəti ildə onlar yenə də komandamızla oynamaqdan imtina edərək turniri tərk etdilər. Bu nağıl belə başladı. Sonradan Azərbaycanı bu turnidə "Bakı”, "İnter”, "Xəzər Lənkəran” təmsil etsə də nədənsə Ermənistan komandaları ilə yolları kəsişməli olmadı. Bəlkə də "İnter” və  "Bakı” turniri tez tərk etdiyindən bu görüş baş tutmamışdı. Maraqlıdır ki,  "Xəzər Lənkəran” finala qədər irəliləyib turnirin qalibi olsa da qarşısına Ermənistan komandası çıxmadı.

            Bu il keçirilən bu turnirdə ölkəmizi son çempionumuz "İnter” hələ ki layiqincə təmsil edir, qrup lideri kimi ¼ final mərhələsinə vəsiqə qazanan komandamız nəinki maksimal xal toplayıb hətta rəqib qapılarına 7 top vursa da, öz qapısında bir top belə görməyib. ¼ final mərhələsinə vəsiqə qazanan "İnter” klubu digər qrupun 2-ci pillə sahibi olan Ermənistanın "Mika” komandası ilə görüşməli olduğundan bizi həm maraqlı həm də nigaran bir oyun gözləyirdi. Çünki bu oyun həm də "20 Yanvar” ərəfəsində baş tutacaqdı. Belədə "İnter” klubunun üzərinə ikiqat məsuliyyət düşürdü. Həm də bununla "Qafqaz nağılı”nın hansı formada davam edəcəyi maraq doğururdu. "Mika” komandasının həm məşqçisi həm də əksər oyunçuları ermənilər olsa da Azərbaycanı təmsil edən "İnter” komandası və onun baş məşqçisi isə gürcü olan Kaxaber Tsxadadze idi. Beləliklə bu oyunda hər üç Qafqaz respublikası təmsil olunurdu. "Qafqaz nağılı”nın nigarançılıqla gözlədiyimiz davamı "İnter” klubunun parlaq qələbəsi ilə yazıldı. Beləliklə "Mika” nın qapısından 4 cavabsız top keçirən "İnter” komandası rəqibə yerini göstərmiş oldu.

            Bu oyunu da nəzərə alsaq hələlik 4 oyun keçirən komandamız parlaq çıxışını davam etdirir. Bu 4 matçda rəqib qapılarına 11 top vuran komandamız qapısında bir top belə görməyib. "Neftçi” və "Xəzər Lənkəran”dan sonra "İnter”ə də bu turnirin qalibi olmasını arzu edirik. Bugünki nəticələrə görə başda "İnter” azarkeşləri olmaqla bütün Azərbaycan futbolsevərlərini təbrik edirik. "Qafqaz nağılı”nı uğurla davam etdirən "İnter”i vətəndə qalib kimi qarşılamaq arzusu ilə...