Bildiyiniz kimi, "Xəzər Lənkəran”da aşağı yaş qrupu üzrə komandalara rəhbərlik edən Yuri Panfilov öz istəyi ilə postundan ayrıldı. Vətəni Ukraynada münasib iş tapdığını rəhbərliyə bildirmiş və klub prezidenti Mais Mənsimov da onun xidmətlərini nəzərə alaraq gedişinə mane olmamışdı.

            Artıq "Xəzər Lənkəran”da vakant posta mütəxəssis tapılıb. Bunu cənub klubunun vitse-prezidenti Tuyqun Nadirovla dəqiqləşdirdik:-"Bəli, hollandiyalı mütəxəssislə danışıqlar aparmışıq. Fabian Veldviyk artıq Lənkəranda da olub. Baza və uşaq futbolçuların şəraiti ilə əyani tanış olmaq imkanı qazanıb. Böyük ehtimalla, yaxın günlərdə onunla müqavilə bağlayacağıq”.

Mənbə: "Futbol+” qəzeti (28 yanvar 2011)  

Daha sonra "Azerisport.az” saytının da bu barədə məlumatını diqqətinizə çatdırırıq:

            "Xəzər Lənkəran” yeni əcnəbi mütəxəssis dəvət edib. Azerisport.az xəbər verir ki, bundan sonra Lənkəran klubunun idman direktoru vəzifəsini hollandiyalı Fabian Veldviyk həyata keçirəcək. "Den Haag” və İngiltərə "Wolverhampton”unun sabiq oyunçusu cənub təmsilçisində gənc futbolçuların alınıb-satılmasına cavabdeh olacaq.

            Bir sözlə, "ağ-yaşıllar” gənc istedadların üzə çıxacağı əsl futbol akademiyası yaradırlar. Velviyk isə bu yöndə strukturun yaradılmasına cavabdehlik daşıyır. Hər halda o, bu haqda verdiyi açıqlamada belə qeyd edib: "Yeniyetmə və gənclərdən ibarət komandalar mənim rəhbərliyim altında olacaq”.

            Maraqlıdı ki, hollandiyalı mütəxəssislə müqaviləyə əsasən, iki il sonra o, "Xəzər Lənkəran”ın baş məşqçisi də ola bilər. Ancaq təbii ki, burda söhbət əvəzedici komandadan gedir. Axı əsas komanda Mirça Rednikin rəhbərliyi altındadı: "Klub rəhbərliyi ancaq gənc futbolçuların yetişdirilməsini və əsas komandada oynaya biləcək səviyyəyə çatdırılmasını istəyirlər”.