El
arasında, bayram günlərində və ya kiminsə, ailəsində xeyir bir iş olanda, toy ərəfələrində
ya ümumi ailə işləri ilə əlaqədar olanda, bütün qohumlara bu cür müraciət
olunur:-"Yığışın Babam Ocağına!”
Hamımız
bilirik ki, sabah İyul ayının 14-ü, Bakı vaxtı ilə saat 22:30-da "Xəzər Lənkəran”
komandası İsrailin paytaxtı Təl-Əvivdə yerli "Makkabi” klubu ilə görüşür. Bu çətin
səfər oyununda bilirsiniz ki, "Bosman” fanklubunun ideyası və əməli işləri nəticəsində
və "12-ci Oyunçu” azarkeş qrupunun yaxından dəstəyi ilə həmin oyunu "Fırtınalar
Meydanı”nın böyükölçülü monitoruna daşımaq və bütün azarkeşlərimizin yığışaraq
birlikdə bu həyəcanı yaşamaq haqqında stadion rəhbərliyi, xüsusən Höccət bəy
Hacıyevin köməyi ilə ölkədə və bəlkə də dünyada bir ilkə imza atması ərəfəsindəyik.
Bizdə
olan məlumatlara görə isə bu çətin səfər oyunu ərəfəsində komandamızın
legionerlərində yox, yerli oyunçularımızda bir az həyəcan hiss olunur. Bu həyəcana
səbəb əlbətdə həm rəqibin güclü olmasına qarşı olan bir məsuliyyətdirsə, digər
yandan onların Təl-Əviv aeroportunda incidilməsi və xüsusən İsrailə,
komandamızı dəstəkləmək üçün gedən azarkeşlərimizin geri qaytarılması da təsirsiz
ötüşməmişdir. Söz yox ki, bütün dünyada olan kimi, İsraildə də azərbaycanlılar
var. Onların özlərinin dedikləri kimi, komandamızı İsraildə tək qoymayacaqlar. Bunun
üçün biz də onlara sonsuz təşəkkürümüzü bildiririk.
Belə
bir çətin ərəfədə isə "Xəzər Lənkəran” azarkeşləri olaraq, çıxış yolu tapmışıq
desək daha düz olar. "Xəzər Lənkəran” azarkeşlərinin doğma "Fırtınalar Meydanı”na
yığılaraq buradan komandamıza misli görünməmiş formada dəstək olmaları isə bu
gün həyəcanlı olan futbolçularımıza ən böyük dayaq olmalıdır. Təsadüfi deyil
ki, artıq onların da bundan xəbəri var. Baş məşqçimiz Mirça Rednikin özü də bu
haldan mütəəssir olaraq, futbolçulara dediyi sözləri yada salmaqla, bunun nə dərəcədə
əhəmiyyətli tədbir olduğunu görə bilərik. "Bura gələndə qarşılaşdığımız
problemlərin oyun zamanı sizə təsir etməsini istəmirəm. Özünüzü toparlayın və
oyunda bütün bacarığınızı ortaya qoyun. Sizə maraqlı bir xəbərim var. Oyun
zamanı doğma stadionumuzda hansı ki, azarkeşlər oraya "Fırtınalar Meydanı”
deyirlər, tam dolacaq. Azarkeşlərimiz tribunalarında toplanaraq hamılıqla
stadionun monitorundan oyunu izləyəcəklər. Azarkeşlər sizinlədirlər, siz də
onlar üçün oynayın.”
Bəli,
biz bu tədbiri həyata keçirməklə, çətin səfər oyunu ərəfəsində komandamıza
inanılmaz dəstək vermiş olarıq. Necə ki, doğma komandamızın ev oyunları zamanı
dəstək vermişik, indi də elə. "Fırtınalar Meydanı”nda həmişəki kimi komandamıza
dəstək olaraq, barabanlarımızı guruldadıb, müxtəlif şüarlarımızı səsləndirməliyik.
Biz elə hayqırmalıyıq ki, "Fırtınalar Meydanı”ndan səsimiz nəinki uzaq "Blumfeld”ə
hətta bütün Avropaya çatsın. Qoy hamı görsün ki, "Xəzər Lənkəran” klubu azarkeşləri
ilə birlikdə Avropada öz sözünü deyir. Elə bərkdən qışqırmalıyıq ki, "Blumfeld”də
rəqib azarkeşlərin səsini batıraq. Elə bərkdən qışqırmalıyıq ki, "Makkabi” bura
cavab oyununa gələndə futbolçularının ayağı tir-tir əssin. Elə bərkdən
qışqırmalıyıq ki, bizim cismən uzaqda olduğumuzu komandamız hiss etməsin və nəhayət
elə bərkdən qışqırmalıyıq ki, cismən uzaqda olmağımıza baxmayaraq, ruhən və mənən
komandamıza nə qədər yaxın olmamızı hamı görsün! Bütün bunlara nail olmaq üçün
isə hamımız göstərilən anda bizim ocağımıza çevrilən "Fırtınalar Meydanı”na
yığışmamız gərəkdir. Odur ki, deyirik :-"Yığışın Babam Ocağına!”
Mirhafiz M. Babayev
|