Əslində bu tur və xüsusən bu turda baş tutan növbəti "Böyük Oyun” haqqında geniş yazı verməyi planlaşdırmışdıq. Amma sonra ölkəmizdə qeyd olunan və ən əziz həm də Azərbaycan xalqının milli dəyəri olan "Novruz” bayramı ərəfəsində bu fikirdən vaz keçməli olduq. Çünki söylənəcək hər bir fikr nə qədər obyektiv olsa da kiminsə yaralı yerinə toxuna biləcəyindən bu əziz bayram günləri bunu etməməyə çalışdıq. Amma mövzu haqsız müzakirələrlə davam edəcəksə, onda bayramdan sonra bu mövzuya nəzərdə tutduğumuz geniş yanaşma ilə çıxış edib fikirlərimizi bildirəcəyik.

            Bu bayram əhval ruhiyyəsini elə əsas diqqət mərkəzində olan ilk altılıq komandaları da müəyyən qədər turda qeydə alınan nəticələrlə davam etdirdi desək əsasən düzgün ifadə etmiş olarıq. Belə ki, ilk altılığın dödr komandası aralarındakı görüşdən eyni xal bölgüsü ilə ayrıldığından bu bayram ərəfəsində məğlubiyyət acısı dadmadı. "Qarabağ” isə bu tur da növbəti doqquzuncu qələbəsini qazanmaqla bayram günlərinə daha şən əhval-ruhiyyə ilə daxil oldu. Beləliklə təkcə "AZAL”ı çıxmaq şərti ilə ilk altılığın beş komandası məğlubiyyət acısı dadmadan "bayram istirahətinə” yollanır. "AZAL” isə bir tur əvvəl ilaxır çərşənbə günləri ərəfəsində, çoxlarının proqnozlaşdıra bilmədiyi halda "Xəzər Lənkəran”a qalib gəlmişdi deyə çox da ürəyini sıxmaya bilər. Bəli, bütün komandalar doğma Azərbaycanı təmsil etdiyindən və bu gözəl bayramı yüksək əhval-ruhiyyə ilə keçirməyə haqqı çatdığından bəlkə də elə məğlubiyyətsiz olaraq bu bayram günlərinə daxil olmaları xoş təsadüfün nəticəsidir. Nəzərə alsaq ki, bütün komandalarımızda həm məşqçılər korpusunda və həm də futbolçular arasında xeyli sayda legionerlər çıxış edir, onda bu lap yerinə düşər. Çünki biz ev yiyəsi, onlarsa qonaqdır. Əhvalı yaxşı olmayan ev yiyəsi isə bu gözəl bayram günlərində qonaqlarına lazımi münasibəti göstərə bilməz əlbətdə ki. 

            Fürsətdən istifadə edib həm birinci və həm də ikinci "altılıq” komandalarını bayram münasibəti ilə təbrik edirik, həmişə qələbə əzmi arzulayırıq.

            Sovet dönəmində bu "Novruz” bayramı dövlət səviyyəsində qeyd olunmasa da xalqımız gizli də olsa bu bayramı həmişə qeyd edib. Amma sovet dönəmində heç-heçə bitən yarış sonrası "Pobedila Drujba” deyilən, yəni "Dostluq qalib gəldi” kimi bir fikir çox səslənirdi. İndi də bu bayram ərəfəsində alınan nəticələrə görə qismən də olsa bu fikri səsləndirdik.