Əvvəlcədən xəbər verdiyimiz kimi "Xəzər Lənkəran” yaranmış fasilədən istifadə edərək Antalyaya toplanışa yollanıb. Komandamız özü ilə bərabər "Futbol+” qəzetinin bölgə müxbiri Hüseyn Cəbrayıloğlunu da Antalyaya, bu səfəri daha yaxından işıqlandırmaq üçün apardığını da deyək. İndi gəlin, Antalyadan Hüseyn Cəbrayıloğlunun "Futbol+” qəzeti üçün hazırladığı materialla tanış olaq.

            Antalya toplanışının üçüncü günündə komandasının günortadan sonra matça çıxacağını nəzərə alan Mirça Rednik səhər məşqində yüngül təmrinlərlə kifayətlənərək, futbolçuları elə də çox yükləmədi. Yüngül təmrinlərdən sonra cənublular demək olar ki, yalnız standart vəziyyətlər üzərində çalışırdı. Məşq bitəndən sonra inzibati heyət üzvləri də kiçik meydanda futbol oynadı və bütün heyət günorta yeməyini yeyib istirahətə çəkildi. Türkiyə vaxtı ilə saat 16:00-da "Xəzər Lənkəran” qaldığımız oteldən təxminən 5 km uzaqda yerləşən və "Kremlin Palace” kimi tanınan məşhur otelin arxa meydançasında planlaşdırılan ilk yoxlama matçına çıxdı. Əvvəl xəbər verdiyimiz kimi, təşkilatçılar rəqib qismində qrdaş ölkənin həvəskar komandalarından "Muradpaşa Bələdiyyəsi”ni seçmişdi. Rednik start heyətində bu futbolçulara güvəndi: Denis Romanovs, Adrian İordaşe, Radomir Todorov, Alim Qurbanov (K), Xaqani Məmmədov, Stelian Stanku, Kristian Kabral, Allan Lalin, Konstantin Arbanas və baxışda olan iki portuqaliyalı futbolçu. Artıq 1-ci dəqiqədə rəqibin uzaqlaşdırmaq istədiyi topu ələ keçirən, dayaq yarımmüdafiəçisi mövqeyində sınanan Simone təxminən 35-metrdən uzaq "doqquzluğ”a göndərdi. İlk yarının sonuna qədər Lalin iki, Kabral və Xaqani Məmmədov isə hərəyə bir dəfə fərqlənməklə hesabı 5:0-a çatdırdı. Fasilədən sonra heyəti demək olar ki, tam dəyişən Rednik yalnız baxışda olan iki futbolçunu saxlamaq şərti ilə Ruslan Poladov, Ramazan Abbasov, Dieqo Ruis, Asif Məmmədov, Katalin Doman, Emeka Opara və əvəzedici heyətdən cəlb olunan sadıq Ramazanov, Emin Əliyev və Ruslan Həsənovu da meydana buraxdı. Matçın bu bölümündə Opara və Doman dubl etməklə darmadağına səbəbkar oldu-8:0. Oyunu burda ayrıca oteldə qalan Stanku, Arbanas və Romanovsun ailələri də kənardan bəzi turistlərlə birgə izləyirdi.

            Baxışda olan legionerlərə gəlincə, hər iki futbolçu təcrübəli olduqlarını məşqlərdən sonra meydanda da sübut etməyi bacardılar. Xüsusən mərkəz müdafiəçisi mövqeyində oynadılan qaradərili futbolçunu oyun üslubuna görə eynən Elnur Allahverdiyevə bənzətmək olar. Elə qol vurmağı bacaran Simone də meydanı görmək, sakit oyun tərzi və uzaq, amma dəqiq ötürmələri ilə yəqin ki, rumın çalışdırıcının etimadını qazana biləcək.

            Bu gün səhər bərpa məşqindən sonra komandaya istirahət verilməsi planlaşdırılır. Srağagün isə "Xəzər Lənkəran”ın qaldığı otelə Rumıniyanın "Kluj” yox, "Paduri” klubu təşrif buyurdusa, dünən də "Şaxtyor” gəldi. Güman olunur ki, cənublular Donetsk klubu ilə də oynayacaq. Sonda bir məqamı da vurğulayım ki, "bələdiyyəçilər”lə oyunu yerli hakimlər briqadası idarə edirdi.

Hüseyn Cəbrayıloğlu, Antalya.