"Xəzər Lənkəran”ın yerli futbolçulardan ibarət heyəti Bakıda toplanaraq təlim-məşq toplantısı keçmək üçün Almaniyaya yollanıb. Legioner futbolçular, eləcə də yeni transferlər bu gün Misbah şəhərciyinin "Hotel Best Western Premier Bayerischer Hof Miesbach” adlanan mehmanxanasında hamılıqla bir araya gələrək komandaya qoşulacaqlar. Baş məşqçi Con Toşakın transfer siyahısında adları olan yeni futbolçuların da artıq sabah komandanın düşərgəsində olacaqları gözlənilir. Qeyd edək ki, mövsüm bitəndən sonra  Franko Nildo, Zohair Benouahi, Rasim Ramaldanov və Nikola Qliqorovu heyətinə qatan "Xəzər Lənkəran” daha altı futbolçunu transfer etməyə hazırlaşır. Ümumilikdə üç mövqeni möhkəmlətmək istəyən Con Toşak "Sumqayıt” klubunda top qovan 25-yaşlı Pərdis Fərcad Azadı sərəncamında görmək istəyir. Daha bir futbolçu isə kluba menecerlər tərəfindən təklif olunub. Bu Hollandiyanın "Volendam” klubunun bombardir hücumçusu Cek Tuypdur. "Uçan holland”ın keçidi Toşakın son sözündən asılıdır. Nəhayət uelsli çalışdırıcının özünün komandada görmək istədiyi daha dörd legioner futbolçu vardır ki, bunların adlarını da hələlik kimsəyə açıqlamayıb. Çox güman həmin futbolçuların kimliyinə yaxın bir iki gündə aydınlıq gələcək.

Ümid edirik ki, təcrübəli çalışdırıcının başçılığında komandamız Almaniya toplantısından səməri istifadə edərək Avroliqaya lazımi şəkildə hazırlaşa biləcək.

Mənbə: "12cioyuncu.info”