”Xəzər Lənkəran” - ”Şaxtyor”la yoldaşlıq oyunu keçirmək istəyir
Klubun rəsmi saytının verdiyi məlumata görə, "Xəzər Lənkəran” klubu UEFA kubokunun son qalibi, Ukrayna çempionu "Şaxtyor” (Donetsk) komandası ilə yoldaşlıq oyunu keçirmək niyyətindədir. Hazırda bununla bağlı iki klub arasında danışıqlar gedir. Danışıqları adı çəkilən komandaların baş məşqçiləri Mirça Rednik və Mirça Luçesku aparırlar. Nəzərdə tutulduğuna görə, oyun Lənkəranda oktyabr ayında baş tutacaq. Qeyd edək ki, UEFA kubokunun son qalibi olan Donetskin "Şaxtyor" komandası ilə "Xəzər Lənkəran" bir dəfə yoldaşlıq oyunu keçirib. Həmin oyun komandamızın bu ilin Almaniya və Avstriyada keçirilən təlim-məşq toplanışına təsadüf edib. Ağasəlim Mircavadovun rəhbərliyi altında keçirilən və xeyli sayda yeni futbolçuları sınaqdan keçirən komandamız, 0-2 hesabı ilə məğlub olmuşdu. Həmin yoldaşlıq oyununu "Bosman.at.ua" saytı canlı olaraq azarkeşlərimizə təqdim etmişdi. İndi isə "Şaxtyor" kimi adlı-sanlı klubun doğma Lənkərana gələrək yoldaşlıq oyunu keçirməsi Mirça Rednikin beynəlxalq aləmdə olan nüfuzundan xəbər verir. Bəli bu oyunla Lənkəran şəhəri diqqət mərkəzinə düşərək, daha bir uğura imza atmış olacaq. İndi komandamız əvvəlki oyuna nisbətən xeyli güclənib və heyətinə bir neçə məşhur futbolçu da qatmaqla bizə daha gözəl bir oyun bəxş edəcək. Uğurlar sənə "Xəzər Lənkəran"!
|