Bu gün komandamız təsnifat mərhələsinin birinci dövrəsinin son oyununu XI tur çərçivəsində səfərdə "Qarabağ”a qarşı çətin oyunda qazanılan qələbə ilə başa vurdu. Oyundan əvvəl media vasitələri səfərdə "Xəzər Lənkəran”ın "Qarabağ”a qarşı sindromunun olduğunu və statistikaya əsasən "Qarabağ”ın qalib olacağını proqnozlaşdırırdı. Amma statistik proqnozların həmişə özünü doğrultmadığını "Xəzər Lənkəran” bu gün qazandığı çətin qələbə ilə sübut etməyi bacardı. Düzdür, "Qarabağ” ev oyununu Quzanlıda deyil, Bakıda Tofiq Bəhramov adına stadionda keçirirdi. Onu da qeyd edək ki, bu stadion da həmişə "Xəzər Lənkəran”a düşərli olmayıb. Buna baxmayaraq çətin səfər qələbəsi münasibəti ilə bütün "Xəzər Lənkəran”  sevərləri təbrik edirik.

            Matç "İdman Azərbaycan” telekanalı vasitəsi ilə canlı yayımlandığından "Xəzər Lənkəran” azarkeşləri bu oyunu canlı izləyə bildilər. Reportajın aparıcısının obyektiv şərhinə görə "İdman Azərbaycan” telekanalına təşəkkür etməyə dəyər. Həmçinin matçın baş hakimi Rövşən Əhmədovun da idarəçiliyini normal qiymətləndirmək olar. Bunu komandamız qələbə qazandığı üçün demirik. Baş hakim ara-sıra bəzi xətalara yol versə də, bunu qərəz saymaq olmaz. Sadəcə peşəkarlıq baxımından azca axsayan referi son zamanlar futbolumuzda "başıbəlalı hakimlik” problemi yaşatmadı. Bunun üçün də ümumiyyətlə hakimliyi normal qiymətləndirib, onlara da təşəkkür etməyə dəyər.

            Matça gəlincə, nə "Xəzər Lənkəran” nə də "Qarabağ” çox da səviyyəli oyun nümayiş etdirə bilmədi. Birinci hissə ümumiyyətlə qarşılıqlı ötürmə səhvləri hər iki komandanın oyununun əsasını təşkil edirdi. Düşünülmüş kombinasiyalar qurma baxımından axsamalar bəlkə də hər iki komandanın bir neçə əsas futbolçularının zədə səbəbindən oynaya bilməməsi ilə əlaqədar idi. Amma buna baxmayaraq komandamızdan daha gözəl oyun gözləyirdik.

            Hakimlər, Konstantin Arbanasın gözəl zərbəsindən sonra topun qapı tirinə dəyərək qapı xəttindən içəridə yerə toxunaraq qapı xəttini keçməsində heç bir tərəddüd etmədillər və Rövşən Əhmədovun dərhal mərkəzi göstərməsi isə bəlkə də matçın ən gözəl anı idi desək yanılmarıq. Beləliklə, "Xəzər Lənkəran” bu çempionata qələbə ilə başladığı kimi, ilk dövrəni də qələbə ilə tamamladı. Bu münasibətlə bütün azarkeşlərimizi təbrik edir, onlara bundan sonrakı matçlarda da qələbə sevinci arzulayırıq.