Artıq "Bosman” fanklubunun qış fasiləsi və müəyyən məsələlərin həlli ilə əlaqədar, "Xəzər Lənkəran” klubunun rəhbərliyi ilə görüş keçirilməsi təklifininin olduğunu xəbər vermişdik. Bu təklif klub rəhbərliyi tərəfindən qəbul olunmuş və hər iki tərəfin razılığı ilə bu, 26 dekabr tarixinə, saat 17:00-a təyin olunmuşdu. Nəzərdə tutulan görüş "Xəzər Lənkəran”nın Bakıdakı ofisində artıq baş tutub. Razılığa əsasən görüşdə iştirak etmək üçün digər fanklublara təkliflərin göndərilməsi kluba həvalə olunmuşdu. Görüşü aktuallaşdıran müəyyən hesabat dövrünün gəlib çatması idi. Belə ki, 09 oktyabr tarixindəki son görüşdə qaldırılan məsələlər əsasən həllini tapmış, baş məşqçi dəyişikliyi həyata keçirilmiş, klubun azarkeşlərə olan münasibətində müsbət yönlü dəyişikliklər baş vermiş, biletlərin qiymət məsələsindən tutmuş komandadan əksər azarkeşlərin görmək istəmədiyi futbolçular kənarlaşdırılmış və bu kimi bir çox məsələlərdə artıq böyük azarkeş kütləsi ilə klubun mövqeyində yaxınlaşma özünü göstərmişdir deyə növbəti azarkeş istəklərinə yenə də önəm veriləcəyinə inam yaranmışdı. Bu mənada fanklubumuzun rəhbəri ilə "12-ci Oyunçu” azarkeş qrupunun rəhbərinin birgə imzaladıqları müraciətin klubun sahibi Mübariz Mənsimova göndərilməsindən sonrakı dövr öz əhəmiyyətini göstərməkdədir.

            Beləliklə "Bosman” fanklubu olaraq növbəti sayılacaq bugünki görüşdə bir sıra üzvlərimizlə iştirak etdik. Məlum saatda  bizi, digər fanklub nümayəndələri ilə birlikdə klubun vitse prezidenti Tuyqun Nadirov və mətbuat katibi Yalçın Əliyev qarşıladı. "Caspian Ultras” və "12-ci Oyunçu” azarkeş qrupunun nümayəndələrinin də iştirak etdiyi bu görüşdə müzakirələr təxminən 4 saat davam etdi. Əvvəlcə keçən görüşdən sonra azarkeşlərin istəklərinin həyata keçirilməsində tutduğu yola və aradakı soyuqluğun əriməsindəki tərəfdaşlığa görə klub rəhbərliyinə təşəkkür olundu. Daha sonra azarkeşləri də maraqlandıran suallara cavab tapılması yolunda müzakirələr davam etdi.

            "Bosman” fanklubu olaraq dünən, bu görüşdə toxunacağımız məsələlərlə bağlı toplantı keçirmişdik. Toplantımızda bir sıra məsələlərə cavab alınması, həmçinin qış fasiləsi dönəmində komandanın necə gücləndirilməsi, azarkeşlərlə yaxınlığın daha da sıxlaşdırılması, bir camiə üzvləri kimi qarşılıqlı hörmətin davam etdirilməsi və bunun üçün əlbəttə tələblərin nəzərə alınmasının vacibliyi fonunda söhbət aparılması qərara alınmışdı ki, həmin mövqedən də çıxış etdik. Görüş əvvəlki kimi əsəbi fonda yox, kifayət qədər səmimi keçdi ki, bunun da əsas səbəbi artıq yuxarıda qeyd olunduğu kimi klub rəhbərliyinin azarkeşlərin istəklərinə doğru addım atması idi. Zatən azarkeşin istədiyi də budur yəni arzuladığı komandanı görmək istəyi yolunda klubun lazımı addımları atması. Əlbəttə bu belə olmayacağı təqdirdə bizim etiraz hüququmuz yenə də əlbətdə ki, özümüzdə qalır. Lakin arzumuz odur ki, daha əvvəlki kimi anlaşılma problemləri olan dövr daha arxada qalsın. Çünki, bu bütövlükdə komandamıza ziyan vurur və əbəs yerə vaxt itkisinə səbəb olur.

            Görüşdə müzakirə olunan məsələlərdən biri, komandamıza yeni dəvət olunan Karles Martorell Bakesə dəstək  verilməsi idi. Bunun üçün hər hansı təzyiq baş verəcəyi halda azarkeşlərin mövqeyinin klub tərəfindən də müdafiə olunması təklifinin klub rəhbərliyinin də uyğun fikirdə olmasını qeyd etmək olar. Tuyqun Nadirov Bakesin necə nizam-intizam qaydalarına riayət etməsini və onun elmi-praktik məsələlərinin düzgün tətbiqi sayəsində komandada yeni ab-hava yaratmasından bəhs etdi və bunu faktlarla qeyd etdiyini çatdıra bilərik. Onun yerli oyunçulara necə həssas yanaşdığını qeyd etdi. Elnur Abdullayevin böyük potensialının olduğunun Bakes tərəfindən qeyd olunmasını diqqətimizə çatdırdı. Bununla əlaqədar klubun onunla müqaviləsinin artırıldığını qeyd etdi. Sonra stadionun ot örtüyü məsələsinin yay aylarına planlaşdırıldığını diqqətimizə çatdırdı. Uşaq futbolu ilə bağlı planların detallarından danışdı ki, bunları da məntiqli izah etdi. Yeni transfer siyasətinin detallarından danışıldı və çox ümidverici vəziyyətin olduğunu diqqətimizə çatdırdı. Daha sonra klubumuzun tarixi ilə bağlı olan və əvvəllər də səsləndirdiyimiz lakin soyuq yanaşılan bu məsələdə isti mövqe nümayiş etdirərək, azarkeşlərin özləri belə bir araşdırıcı qrup yaratsalar biz də bu işə dəstək olar və həmin tarixi qəbul edərik deyə söylədi.

            Bütün bunları qısaca qeyd etsək də, çox uzun müzakirələrin getdiyini deməliyik. Aparılan müzakirələrdəki məsələlərin reallaşacağına olan ümidlər isə əvvəlkindən fərqli olaraq həqiqi və səmimi xarakter daşıyırdı. Müəyyən məsələlərin isə hələ açıqlanmasının məsləhət olmaması səbəbindən bəzi nüansları qeyd etmirik. Lakin komandamızın gələıcəyinə olan inamın isə artmış olduğunu deyə bilərik. Biz həqiqəti dedik və məsuliyyət daşıdığımızı dərk edirik. Əks halda mübarizə hüququmuz özümüzdədir.