IX tur öz nəticələrinə görə sevimli komandamızın xeyrinə tamamlandı. Belə ki, "Xəzər Lənkəran” 19 xalla turnir cədvəlinə liderlik edirdisə, "Simurq”a da qalib gəlməklə xal ehtiyatını 22-yə çatdırdı və şəriksiz olaraq turnir cədvəlinin zirvəsini uzun müddətdir ki sanki özəlləşdirib. Əslinə baxanda həm stabil və həm də oyun səviyyəsinə görə yaxşı mənada digər komandalardan fərqlənərək, "Xəzər Lənkəran” bunu haqq edir. Ədalət naminə demək lazımdır ki, hələ ki, heç bir mənada komandamıza rəqib ola biləcək birisi yoxdur. Göz dəyməsin deyərək, komandamızın marafonun sonuna qədər də belə irəliləməsini və sonda çempionluğu bayram etməsini arzulayırıq. Düzdür hələ marafonun sonuna çox qalıb. Lakin komandamız oyun keyfiyyətini daha da artıraraq buna nail ola biləcək gücdədir.

Ötən turun digər oyunlarının nəticələrinin də bizə sərfəli alınması komandamızın ikinci yerlə xal fərqini 5-ə çatdırdı. Belə ki, bu mövsüm o qədər də inamlı təsir bağışlamayan "İnter” komandası "Xəzər Lənkəran”dan sonra ardıcıl olaraq əsas rəqiblərimizdən biri olan "Neftçi”ni də məğlub etməyi bacardı. Bununla "Neftçi” 15 xalında qaldısa, "İnter” 17-xala sahib olub onu ikinci pillədən aşağı yuvarlandıraraq ikinciliyə sahib çıxdı. "Qarabağ”ın da "Rəvan”la oyunda xal itirməsi əslində əsas rəqiblərimizdən birini də hələlik nisbətən arxada qoydu. Qeyri-stabil oyunu ilə mövsümün doqquzuncu turunu da yekunlaşdıran "Bakı”nı isə X turda elə "Xəzər Lənkəran” bir az da uzağa sıxışdıracaq. Bu oyunun prinsipiallığını artıracaq daha bir məqam isə Uinston Parksın rəqib düşərgədə olması olacaq. İnşAllah bu oyunda da qələbə qazanmaqla həm xal ehtiyatımızı daha da artıracağıq və Uinston Parksı komandamızdan ayrılmasına görə peşiman edəcəyik. Bu oyunda azarkeşlərimiz daha da fəal olmaqla, Parksın "Xəzər Lənkəran”lı günlərini onun təəssüflə yadına salmasına səbəb olacaq. Axı "Xəzər Lənkəran”dan fərqli olaraq Parks "Bakı”da belə azarkeş dəstəyimi görüb?

Yox! Yalnız biz "Xəzər”sevərlər futbolçunu oyuna və oyunzamanı lazımi formada kökləyə bilirik.

Burax meydana "Bakı" sən Parksı

Onsuz oxur "Xəzər"lilər bax, qələbə şarkısı.