"Müsavat başqanı İsa Qəmbərə hücum edən şəxslərin əyinlərinə bizim klubun formasını geyinmələrindən xəbərdarıq. Amma İsa Qəmbər öz çıxışında da "Xəzər-Lənkəran” azarkeşləri haqqında bir şey söyləməyib”.   Bunu Modern.az-a açıqlamasında "Xəzər-Lənkəran” futbol klubunun  mətbuat katibi Yalçın Əliyev azarkeşlərinə qarşı səsləndirilən bəzi ittihamlara münasibət bildirərkən deyib.

Klub rəsmisi qeyd edib ki, "Xəzər-Lənkəran”ın formaları çox yerdə satılır və bunu çox adam alıb geyinir. "Bizim formalar, bayraqlar ictimaiyyət üçün açıq yerlərdə satılır. Hamı pul verib onu ala bilər. Bu qalmaqalı salanların "Xəzər-Lənkəran”la və kluba yaxın azarkeş qrupları ilə bağlılığı yoxdur”.

Xatırladaq ki, Müsavat başqanı İsa Qəmbər və partiya funksionerləri yanvarın 13-də Lənkərana səfər zamanı bir qrup şəxsin hücumuna məruz qalıblar. Həmin adamların əynində "Xəzər-Lənkəran” futbol klubunun formaları olub.

Aqşin Kərimov

"Modern.az”

O cümlədən biz də "Bosman” fanklubu olaraq heç bir təxribati işlərdə iştirak etmədiyimizi və siyasi fəaliyyətlə məşğul olmadığımızı bildiririk. Biz yalnız "Xəzər Lənkəran” klubunun və Azərbaycan futbolunun inkişafı naminə fəaliyyət göstəririk. Onu da demək istəyirik ki, "Xəzər Lənkəran” azarkeşlərinin hər hansı pozuculuq fəaliyyətlərinin iştirakçısı olmasını ortaya atanların bu əməllərini də qətiyyətlə pisləyirik.

"Bosman” fanklubu idarə heyəti 15 Yanvar 2013.