2012/2013-cü illər futbol üzrə Azərbaycan çempionatının ilk dövrəsi olmasa da əsas hissələrindən biri arxada qaldı ki, buna da qış fasiləsi kimi dəyər verilir. Altılıq sistemi ilə keçirilən çempionatımızda daha dörd oyun keçirilməlidir ki, altılıqların tərkibinə aydınlıq gəlsin. Bu da qış hazırliq dövründən sonraya təsadüf edəcək ki, bu dövrə Antalyada keçiriləcək hazırlıq keyfiyyəti, komandanın tərkibini necə müəyyənləşdirməsi, yəni gedəcək və yeni qoşulacaq futbolçuların düzgün seçilməsindən, deməli, transfer siyasətindən və bu transfer siyasətinin necə həyata keçirilməsindən asılı olacaq. "Xəzər Lənkəran” qış fasiləsinə turnir cədvəlinin 6-cı pilləsində yollandı. Altılığın müəyyənləşməsi üçün qalan 4 oyunda 12 xal toplanması mümkündür ki, bu bir az əslində çətin də görünə bilər. Özü də qalan bu 4 oyunun 2-ni altılığa düşmək baxımından belə demək mümkünsə, əhəmiyyəti olmayan komandalarla keçirməli olan komandamız, altılığa düşmək baxımından daha əhəmiyyətli olan iki komanda ilə keçirməli olacaq ki, bu da cəmi 6 xal imkanı deməkdir.

Belə ki, demək olar praktik olaraq ilk altılıqda yerini artıq təmin etmiş olan "İnter” komandası üzərindəki qələbə, heç də bu komandanı ilk altılıqdan sıxışdıraraq çıxarıb yerini əlindən almaq anlamına gəlmir. "Rəvan”ın isə praktik olaraq ilk altılıq şansları qalmadığından onların da bizim ilk altılıqdakı yerimizə şərik çıxma ehtimallarının sıfıra bərabərliyini nəzərə alsaq, turnir cədvəlində 28 xalla bizdən bir pillə yuxarıda qərarlaşan "Qəbələ” klubu ilə və cəmi bizdən 4 xal və iki pillə geridə olan 20 xala malik "Turan” komandası ilə aramızda keçiriləcək oyunun əhəmiyyəti daha bizim üçün böyük rol oynaya bilər. Belə ki, 24 xala malik olan "Xəzər Lənkəran”, 28 xala malik "Qəbələ” klubu üzərində qələbə çalmaqla aradakı fərqi 1 xala endirməli və növbəti 3 turların birində yenə də onun daha bir dəfə xal itkisinə məruz qalmasını gözləməlidir. 24 xala malik olan komandamız "Turan” üzərindəki qələbə sayəsində xal ehtiyatını artırıb onun yaxınlaşmasını əngəlləməlidir. Belə oyunlarda qazanılan 3 xal, futbol dilində deyilərsə, 6 xala bərabər sayılan xallar anlamına gəlir.

Əlbətdə situasiyaya müəyyən qədər nəzarət etmək baxımından bu olduqca əhəmiyyətlidir. Yəni bir növ özümüzdən asılı amil kimi sayıla bilər. Özümüzdən asılı olmayan faktorlar da kifayət qədərdir. Belə ki, bizimlə növbəti əhəmiyyətli bu 4 oyunda yolları kəsişməyən hər biri 20 xala malik "AZAL” və "Sumqayıt”, o cümlədən 19 xala malik "Bakı” komandaları ardıcıl qələbələr sayəsində və biz xal itirdiyimiz təqdirdə "Xəzər Lənkəran”ı ilk altılıqdan kənarda belə qoya bilərlər. Dediklərimiz reallıq olduğundan ruhdan düşməmək, daha doğrusu qarşıdakı mübarizənin əhəmiyyətini anlayıb,  qələbə ruhu ilə alışıb-yanan bir kollektiv formalaşdırmaqdır ki, bunun da öhtəsindən "Xəzər Lənkəran”ın gələ biləcəyinə bütün varlığımızla inanırıq.

Bunun öhtəsindən gəlməsək belə bu faciə sayılmamalıdır. Yetər ki, klubda bütün işlərin gələcək baxımından düzgün qurulması peşəkarcasına aparılsın. Bunun üçün isə bu işlərdə kifayət qədər təcrübə və səriştəsi olan Bakes kimi bir mütəxəssis var. İnanırıq ki, Martorell Bakes gələcək baxımından işlərin düzgün aparılması yönündən yorulmadan çalışacaqdır. Bakesin işlərinə müdaxilə etməməyi düşünərək mən də öz fikirlərimi bir azarkeş kimi bildirmək istərdim. Belə ki, komandamız heyət baxımından bəlkə də ən kasad dövrlərindən birini yaşayır. Belədə komandaya yeni futbolçuların cəlb olunması məsələsi qaçılmazdır. Son transfer dövrünün keyfiyyətsizliyinin nələrə gətirib çıxardığını nəzərə aldıqda isə bu işə daha diqqətli yanaşmanın vacibliyi bir daha önə çıxır.

Son bir neçə gündə qeyri rəsmi də olsa, Azərbaycanın nisbətən üzdə olan futbolçularının adı "Xəzər Lənkəran”la hallanmağa başlayıb. Fikrimcə burada heç də pis bir cəhət yoxdur.  Amma onu nəzərə alanda ki, bir qədər səviyyəli yerli futbolçular o qədər də çox deyil, bu bir az problemə yol açır. Deməli tələbin, təklifi üstələdiyi bazarda qiymət məsələsi fantastik həddə çata bilir ki, bu da komandamızın heç də xeyrinə sayıla bilməz. Bununla əlaqədar dediyimiz keyfiyyətdə futbolçuların azlığı onlarda təkəbbür, eqoizm və bir sıra xoşagəlməyən xarakterlər formalaşdırır. Sanki, bunlar olmasa "Xəzər Lənkəran” bir heçdir. Az olduqlarından müəyyən qrup halını da ala bilərlər ki, bu da komandamıza sonradan sözün məcazi mənasında baha oturur. Artıq bizlər bir neçə illərdir ki, ardıcıl olaraq bunun və bu kimi halların şahidiyik ki, bunun da komandamıza bir çox ziyanlarından hələ də qurtula bilmirik. Əlavə olaraq onu da deyim ki, kənardan da bəzi qüvvələr sanki, başqa klublarda yetişmiş belə futbolçulara bizim sonradan sahib çıxdığımızı önə çəkərək, hazırın-nazırı olduğumuzu dilə gətirərək, sanki minnət qoyur və onlarda formalaşdırdıqları xoşagəlməyən xarakterlərdən istifadə edərək, komanda daxili ab-havanı belə pozmağa cəhd edirlər ki, bu da bir neçə dəfə baş tutmuş sayılır. Zaur Ramazanov, Rəşad Abdullayev, Kamran Ağayev, Samir Əliyev və adlarını çəkmədiyim bir neçə futbolçular zaman-zaman "Xəzər Lənkəran”ın heyətində yer almış və komandamızla böyük uğurlara imza atmış futbolçular olsalar da, onların kaprizlərindən heç də bəxş etdikləri sevincdən az əziyyət çəkməmişik və bu da mənən böyük zərbələrlə yadda qala bilib. Onların gələcək karyeralarında və həyatlarında müvəffəqiyyət arzulayaraq, həm də bunlardan dərs götürməyimizin zamanının gəlib çatdığını deyə bilərəm. Əslində hər heyətə qatılan futbolçu, xüsusən də dediyimiz tipli futbolçular layiq olduqları və ya bəlkə də ondan daha çox əməkhaqqı alırlar deyə, minnət məsələsi arxa plana keçir. Lakin mənəvi olaraq "bizim yetişdirdiyimiz futbolçular sizə uğur qazandırdı”, deyənlərin cavabını isə verməyin vaxtının çatdığını düşünürəm. Reallıqda limitin, biri 21 yaşa qədər olmaqla meydana 4 futbolçu buraxmaqdan söhbət gedirsə, gəlin heyətimizə nəzər salaq. Rahid Əmirquliyev kimi komandamızda parlamış bir futbolçumuz varsa, Elnur Allahverdiyev kimi millidə də çıxış edən digər bir futbolçumuz, təcrübəli Mirça Rednikin böyük ümidlərlə komandamıza cəlb etdiyi və Bakesin də ona eyni qiymət verərək müqaviləsinin artırılmasını istədiyi və artıq bunun baş tutduğu Elnur Abdullayev kimi perspektivli daha bir futbolçumuzun olduğu təqdirdə, qalan 21 yaş limiti üçün öz yetirmələrimiz olan daha 4 futbolçumuz seçilirsə, deməli, bir neçə tanınmamış, lakin perspektivi olan və Rahid Əmirquliyev kimi onu da "Xəzər Lənkəran”ın ortaya çıxara biləcəyi bir neçə az ödənişli futbolçular komandamıza cəlb olunarsa, fikrimcə bu kifayət edər. Bu işin öhtəsindən də gənclərlə işləməyin sirrlərini bilən Bakes kimi bir məşqçimizin də olması kifayət qədər ümidverici sayıla bilər. Bunun nəticəsində də yetişəcək hər bir futbolçu, öz yetirmələrimiz kimi qürurverici faktora çevrilər. "Xəzər Lənkəran”ın özünəhörmət mənasında bunun nə demək olduğunu isə sözlə ifadə etmək mümkün deyil. Yerlilərdən Ruslan Abışovun adını qəsdən bayaq çəkmədim və ayrıca xarakterizə olunmağa ehtiyac olduğunu düşündüm.

Belə ki, mətbuatdan bildiyimizə görə Ruslanın əzəli rəqibimizdən heyətimizə qatılması üçün yerli bazar qiymətlərindən xeyli çox qiymətə başa gəlməsi və onun da oyunlarda heç yarısı qədər əməkhaqqı alan legionerlərdən fərqlənməməsi, deyilənlərə bir sübutdur. Xeyr, Ruslan pis futbolçu deyil. Amma onun da alababat qiymətə hər hansı xarici kluba keçmək ehtimalı və buna "Xəzər Lənkəran”ın əngəl olmama öhtəliyi bu barədə də komandamızın bəzi məsələlərdə uduzacağı anlamına gəlməsi deməkdir. Deməli, fikrimcə artıq sərf olunacaq vəsaitlərin hesabına kifayət qədər güclü legionerlər alınmaqla, güclü bir mexanizm formalaşdırmaq gərəkliyi ortaya çıxır. Bu güclü mexanizmin dişli çarxlarından bir neçəsinə çevriləcək yerli istedadlı gənclər də, istər-istəməz bu mexanizmin hərəkət detalına çevrilərək, futbolçu kimi bişməyə məhkum olmalıdırlar. Dediyim bu futbolçular isə, yalnız və yalnız ya "Xəzər Lənkəran”ın öz yetirmələri, ən azından isə yerli tapıntıları olmalıdırlar. Belədə komandamız müstəqil olaraq, heç bir kənar təsirlər olmadan güclü və arzuladığımız heyətə sahib olar ki, kompakt bir komanda kimi formalaşmağın əsasını qoyar. Bu yolda komandamıza uğurlar arzu edir və onun böyük gələcəyinə inanıram. Əlbətdə bu mənim öz fikirlərimdir və doğruluğuna inanıram.

Hörmətlə: Mirhafiz Babayev  

Qeyd: Yazı hazırlanarkən adı komandamızla hallanan və böyük ödənişli sayılan Rauf Əliyevin və Kamran Ağayevin artıq "Bakı” klubuna keçdikləri barədə sevindirici xəbər aldım.